Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri wattunna a’jari Karaeng Yosia ri Yehuda nampami 8 taung umuru’na, siagang ammarentai ri Yerusalem 31 taung sallona. Amma’na niarengi Yedida ana’na Adaya, tu battu ri Bozkat.
2 Yosia nagaukangi apa Nangaia Batara. Naturuki panggaukanna boena iamintu Karaeng Daud, siagang naturuki tojeng-tojengi sikontu hukkunNa Allata’ala.
3 Nia’ sitau jurutulisi’na Yosia, iamintu niarenga Safan ana’na Azalya, cucunna Mesulam. Ri taung makasampulo assagantuju ammarentana Karaeng Yosia, appasulu’mi parenta kamma anne Yosia mae ri anjo jurutulisi’na, "A’lampako mange ri Imang Lompo Hilkia ri Balla’Na Batara, siagang pappalakki laporang ri passala’na siapa jaina doe’ le’baka napasse’re sikamma imang tugasaka ri pakke’bu’ antamaya ri Balla’Na Batara.
4 (22:3)
5 Suroi nanapassareang anjo doeka mae ri sikamma pangawasa’ jama-jamang pakabajikianna Balla’Na Batara. Musti napakei ke’nanga anjo doeka untu’ ambayaraki gajina
6 sikamma tukang kayua, tukang bangunanga, tukang batua, kammayatompa untu’ ammalli kayu siagang batu niparalluanga.
7 Anjo sikamma pangawasa’ jama-jamanga sanna’ lambusu’na, jari tenamo naparallu nipappalakki laporang ri passala’na doe’ nipassareanga mae ri ke’nanga."
8 Napabattui Safan parentana karaenga ri Hilkia, nampa nacarita Hilkia mae ri Safan angkanaya le’baki nagappa ammotere’ kitta’ hukkung-hukkunNa Batara ri Balla’Na Batara. Napassareangi Hilkia anjo kittaka mae ri Safan, nampa nabaca Safan.
9 Ammotere’mi Safan mae ri karaenga siagang nalaporo’ angkanaya anjo doe’ nibolika ri Balla’Na Batara le’ba’mi nialle siagang nipassareang ri sikamma atanna karaenga, mae ri sikamma pangawasa’na jama-jamang pappakabaji’ ri Balla’Na Batara.
10 Nampa nakana Safan, "Anne kittaka nasareanga’ Hilkia." Nampa nabaca Safan anjo kittaka untu’ karaenga.
11 Nalangngere’na karaenga antekamma bonena anjo kittaka, nakae-kaemi pakeanna napakamma si’na pa’mai’na.
12 Nampa naparentakang karaenga mae ri Imang Hilkia, Ahikam ana’na Safan, Akhbor ana’na Mikha, Safan jurutulisi’na pa’rasanganga, siagang Asaya pambantuna karaenga, angkana,
13 "A’lampako mange akkuta’nang ri Batara untu’ inakke siagang untu’ sikontu ra’ya’ Yehuda ri passala’na anne kittaka. Larroi Batara mae ri katte lanri tenana nagaukangi boe-boeta parenta-parenta niaka tattulisi’ lalang ri anne kittaka."
14 Jari a’lampami Hilkia, Ahikam, Akhbor, Safan siagang Asaya mange appala’ pangngunju’ ri sitau baine niarenga Hulda, iamintu na’bi niaka ammantang ri pakkampongang berua ri Yerusalem. Bura’nenna niarengi Salum ana’na Tikwa, cucunna Harhas; jama-jamanna iamintu pangurusu’ pakeang sambayang ri Balla’Na Batara. Le’ba’na nalangngere’ kasingaranna ke’nanga,
15 nasuromi ke’nanga ammotere’ mae ri karaenga na napabattu kananNa Batara kammaya anne:
16 "LaKuhukkungi Yerusalem siagang sikontu pandudu’na sangkamma niaka tattulisi’ lalang ri kitta’ beru nibacaya ri karaenga.
17 Le’ba’Ma’ nabokoi ke’nanga siagang assaremi ke’nanga koro’bang mae ri rewata-rewata maraenga. Sikontu anjo apa nagaukanga ke’nanga napanaiki larroKu. LarroA’ mae ri Yerusalem, siagang tena nakkulle nipanaung larroKu.
18 Mingka ri passala’na Karaeng Yosia, iaminne pasangKu, Karaeng Allata’alana Israel, ‘Le’ba’namo nulangngere’ apa niaka tattulisi’ lalang ri anjo kittaka,
19 assesse’lalang mako siagang nupakatunami kalennu ri dallekangKu. Le’ba’mi Kugammara’ Yerusalem siagang pandudu’na angkanaya eroki Kuhukkung. Eroki Kupa’jari anjo kotaya sanna’ appakamalla’na nicini’, siagang laKupa’jari anjo arenna Yerusalem kana pattunra. Mingka ri wattunna nulangngere’ anjo kana panggammarakKu, angngarru’ mako siagang nukae-kaemi pakeannu napakamma si’na pa’mai’nu. Kulangngere’mi pappala’ doannu,
20 lanri kammana anjo tena nalaKuhukkung Yerusalem lalang attallasa’nu ija. Lasannangko sallang punna lamateko.’" Jari ammotere’mi anjo sikamma tau nisuroa mae ri karaenga nampa napabattu anjo pasanga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA