Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yosiya yuswana ballung taon e bakto jumenneng rato Yehuda ban marenta e Yerusalim tello polo settong taon abidda. Asmana ebuna Yedida pottrana Adaya, dhari Bozkat.
2 Yosiya alampa’agi barang se masenneng panggaliyanna PANGERAN; nerowe contona Rato Daud bangatowana, sarta’anna atoro’ ka sakabbinna hokomma Allah kalaban gu-onggu.
3 Rato Yosiya kaagungan sekettarissa nagara se anyama Safan ana’na Azaliya, kompoyya Mesulam. E taon se kapeng ballu bellas pamarenta’anna Rato Yosiya, rato apareng parenta reya ka sekettarissa jareya, "Kassa’ ba’na entar ka Imam Agung Hilkiya e Padalemman Socce, ba’na menta laporan barampa bannya’na pesse se epakompol bi’ para imam se atugas e labang se egabay jalanna oreng mon maso’a ka Padalemman Socce.
4 (22:3)
5 Pesse jareya soro bagi ka pangawassa reng-oreng se mateppa’ Padalemman Socce. Pesse jareya bi’ para pangawas gella’ kodu epamajar opana
6 para tokang kaju, tokang geddhong ban tokang bato, sarta epamelle kaju ban bato se ekaparlo.
7 Para pangawassa lalakon jareya ce’ jujurra, daddi ta’ osa epentae laporan pangalowaranna pesse."
8 Safan manapa’ dhabuna rato jareya ka Hilkiya, Hilkiya laju abala ka Safan ja’ aba’na nemmo ketab kom-hokomma PANGERAN e Padalemman Socce. Bi’ Hilkiya ketab jareya ebagi ka Safan, bi’ Safan laju ebaca.
9 Saellana jareya Safan abali ka ratona pas areppot ja’ pesse se badha e Padalemman Socce la ekala’ ebagi bi’ para abdina rato ka para pangawassa reng-oreng se mateppa’ Padalemman Socce.
10 Saellana jareya Safan mator, "Hilkiya marengngagi ketab ka’dhinto ka abdidalem." Safan pas maca’agi ketab jareya ka rato.
11 E bakto meyarsa essena ketab jareya rato laju bit-nyebbit rasoganna menangka tandha sossa.
12 Saellana jareya rato pas apareng parenta ka Imam Hilkiya, Ahikam ana’na Safan, Akhbor ana’na Mikha, Safan sekettarissa nagara, ban Asaya ajudanna rato:
13 "Kassa’ sengko’ ban ra’yat Yehuda nyo’onnagi petodu ka PANGERAN parkara essena ketab reya. PANGERAN duka polana bangatowana sengko’ ban ba’na ta’ ajalannagi ta-parenta se badha e dhalem ketab reya."
14 Daddi Hilkiya, Ahikam, Akhbor, Safan ban Asaya pas mangkat menta petodu ka oreng babine’ se anyama Hulda. Hulda jareya nabbi se alenggi e kampong anyar e Yerusalim. Rakana anyama Salum pottrana Tikwa, bajana Harhas, se ngoros pangangguyya kabakteyan e Padalemman Socce. Saellana meyarsa katerranganna reng-oreng jareya,
15 Hulda makon reng-oreng jareya abali ka ratona epakon manapa’
16 dhabuna PANGERAN se kantha reya essena: "Sengko’ ngokoma Yerusalim ban sakabbinna pandhudhu’na akantha se kasebbut e dhalem ketab se buru ebaca rato jareya.
17 Reng-oreng jareya la loppa ka Sengko’ ban ngeba kurban ka la’-alla’an. Sabarang se elakone reng-oreng jareya mapeggel Sengko’. Sengko’ peggel ka Yerusalim, ban peggella Tang ate ta’ bisa epaterep.
18 Tape parkara Rato Yosiya, areya’ pessen dhari Sengko’, GUSTE Allahna Isra’il, ‘Saellana ngedhing essena ketab jareya
19 ba’na atobat sarta ngasorragi aba’na e adha’na Sengko’. Sengko’ la ngoca’ ja’ Sengko’ ngokoma Yerusalim ban pandhudhu’na. Kottha jareya bi’ Sengko’ ekagabaya settong paanaban se nako’e, dineng nyama Yerusalim bi’ Sengko’ ekagabaya nyama babaston. Tape e bakto ngedhing ja’ Sengko’ ngokoma Yerusalim ban pandhudhu’na jareya ba’na nanges ban nyebbit kalambina menangka tandha ja’ ba’na sossa. Sengko’ la ngedhing du’ana ba’na,
20 daddi okoman ka Yerusalim jareya bi’ Sengko’ gi’ ta’ eteba’agiya mon ba’na gi’ odhi’. Ba’na bakal mateya kalaban taremtem.’" Para otosan jareya laju abali ka ratona sarta manapa’ dhadhabun jareya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA