Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Boritan ma si Hiskia bani panorang ia, narus-narus matei. Jadi roh ma marayaksi Nabi Jesayas, anak ni si Amos, anjaha nini ma hu bani, “Sonon do nini Jahowa, ʻPaturei ma rumahmu, ai matei ma ho, seng anjai manggoluh be ho.ʼ”
2 Jadi ipagoling si Hiskia ma bohini dompak dingding, martonggo ma ia hu bani Naibata, nini ma,
3 “Dingat Ham ma Ham Jahowa, naha ahu marparlahou i lobei-Mu ibagas hasintongan pakon gok ni paruhuran, huhorjahon do aha na madear i lobei ni bohi-Mu.” Anjaha gogoh-gogoh do tangis si Hiskia ai.
4 Tapi paima luar si Jesayas hun alaman partongah-tongah ai, roh ma hata ni Jahowa hu bani,
5 “Mulak ma ho, anjaha hatahon ma hu bani si Hiskia, pambobai ni bangsang-Kin, sonon do hata ni Jahowa, Naibata ni si Daud, ompungmai, ʻDomma Hutangar tonggomai, domma Huidah iluhmai; tonggor ma, pamalumon-Ku ma ho, patoluarianhon tarbahen ho ma tangkog hu Rumah ni Jahowa.
6 Tambahon-Ku ma sapuluh lima tahun nari ari-ari ni goluhmu. Paluahon-Ku ma ho pakon huta on hunbagas tangan ni Assur, anjaha ondingan-Ku do huta on halani Ahu pakon halani juakjuak-Ku si Daud.ʼ”
7 Dob ai nini si Jesayas ma, “Boan hujon jambu na nilintok.” Jadi dob iboan ai, anjaha inahkon bani bayoh ni raja ai, gabe malum ma iahap.
8 Nini si Hiskia ma hu bani si Jesayas, “Aha ma tandani, paboa na pamalumon ni Jahowa do ahu, anjaha na maningon tangkog ma ahu patoluarihon hu Rumah ni Jahowa?”
9 Jadi nini si Jesayas ma, “On ma tanda hun bani Jahowa bamu, paboa na maningon bahenon ni Jahowa bamu, aha na dob binagahkon-Ni: Hu lobei ma laho halinoh ai sapuluh garis barang dompak pudi sapuluh garis?”
10 Nini si Hiskia ma mambalosi, “Pahara na urah do ai laho halinoh ai sapuluh garis hu lobei. Lang, maningon dompak pudi do laho halinoh ai sapuluh garis.”
11 Jadi dilo-dilo ma Nabi Jesayas hu bani Jahowa, gabe ipaulak Jahowa ma halinoh ai sapuluh garis dompak pudi bani jam mata ni ari ni si Ahas.
12 Bani panorang ai isuruh si Merodak-Baladan, anak ni si Baladan, raja hun Babel ma suruhanni mamboan surat pakon siluah hu bani si Hiskia; ai ibogei do na boritan si Hiskia.
13 Jadi malas tumang do uhur ni si Hiskia mangidah sidea, gabe ipatuduhkon ma bani sidea ganup rumah parartaanni, pirak, omas, morum-moruman, minak na misbou, parsinjataanni, sagala na jumpah ibagas rumah parartaanni; seng dong na ibagas rumahni barang ibagas ganup harajaonni ai, na so ipatuduhkon si Hiskia hu bani sidea.
14 Dob ai roh ma Nabi Jesayas marayak Raja Hiskia, jadi nini ma hu bani, “Aha do na hinatahon ni halak in? Anjaha hunja do sidea roh marayak ham?” Nini si Hiskia ma mambalosi, “Hun tanoh na daoh do sidea na roh in, hun Babel.”
15 Nini ma, “Aha do na ni idah ni sidea i rumahmu?” Nini si Hiskia ma mambalosi, “I idah sidea do ganup na ibagas rumahku, seng dong ibagas rumah parartaanku, na so hupatuduh hu bani sidea.”
16 Dob ai nini si Jesayas ma hu bani si Hiskia, “Tangar ma hata ni Jahowa!
17 ʻTonggor ma, na roh ma panorangni, tarboan ma ijai hu Babel sagala na ibagas rumahmu pakon sagala na pinatumpu ni ompungmu ronsi sadari on; seng dong na tading,ʼ nini Jahowa.
18 Anjaha deba hun bani anakmu sandiri, na dob tubuh bamu, tarboan do; anjaha gabe sisuruh-suruhon ma sidea ibagas rumah ni raja Babel.”
19 Dob ai nini si Hiskia ma hu bani si Jesayas, “Dear do hata ni Jahowa na hinatahonmu ai.” Ai nini uhurni do, “Asal mardamei anjaha marhatotapon ahu sadokah manggoluh!”
20 Barita na legan ai ope pasal pambahenanni pakon ganup kuasani pakon parpaulini bani bongbongan ampa bondar gabe masuk bah hubagas huta ai, ai lang tarsurat do ai ibagas buku Barita ni Raja-raja Juda?
21 Dob ai modom ma si Hiskia rap pakon ompungni, anjaha si Manasse anakni ai ma gabe raja manggatihsi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA