Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ra-kera e bakto jareya Rato Hizkiya songkan bu-tombu ce’ sarana sampe’ para’ seda’a. Nabbi Yesaya pottrana Amos nyabis laju mator, "Dhabuna PANGERAN junandalem epakon malerres sadajana orosan, sabab junandalem ta’ kera sae pole. Ta’ abit pole junandalem badhi seda’a."

² Hizkiya atole addhep ka geddhung laju adu’a,

³ "Adhu, GUSTE, kaemodi ja’ abdidalem ka’dhinto ampon ngabdi ka Junandalem kalaban esto sareng tolos ehlas. Abdidalem ros-terrosan aehteyar norodi kasokannepon Junandalem." Hizkiya laju molar ce’ ngennessa.

⁴ Yesaya laju nyengla dhari jadhiya, tape sabellunna kalowar dhari pakarangan tengngana karaton bi’ PANGERAN epakon

⁵ abali ka Hizkiya, ratona ommadda PANGERAN, kaangguy manapa’ dhabuna se kantha reya, "Sengko’ reya PANGERAN, Allah se esemba Daud bangatowana ba’na, Sengko’ la ngedhing du’ana ba’na ban nangale’e aeng matana ba’na. Bi’ Sengko’ ba’na epabarasa; sadhumalem ba’na bakal entara ka Padalemman Socce.

⁶ Bi’ Sengko’ ba’na epaodhi’a lema bellas taon aggi’. Ba’na ban kottha Yerusalim bi’ Sengko’ epalopoda’a dhari kakobasa’anna rato Asyur. Kottha reya bi’ Sengko’ elindhungana bit kahormadanna Sengko’ dibi’ sarta Tang parjanjiyan ban Daud Tang abdi."

⁷ Yesaya laju makon pangladinna rato jareya nyecce buwana ara pas epakon beddha’agi ka bu-tombuna rato sopaja barasa.

⁸ Rato Hizkiya mareksane, "Ponapa tandhaepon ja’ PANGERAN badhi mabaras kaula ban ja’ sadhumalem kaula badhi kengenga entar ka Padalemman Socce pole?"

⁹ Saodda Yesaya, "PANGERAN badhi aparenga tandha ka junandalem ja’ Salerana neptebbi janjiepon. Samangken, ka’imma se ekasokane junandalem: jang-bajangan se noduwagi ejjam are badhiyanna Rato Ahas ka’issa’ maju sapolo garis otabana nyorot sapolo garis?"

¹⁰ Dhabuna Hizkiya, "Manabi mamajuwa jang-bajangan ganeka sapolo garis, gampang saos. Daddi samangken panyorot sapolo garis saos!"

¹¹ Yesaya adu’a nyo’on ka PANGERAN, PANGERAN laju manyorot jang-bajangan e panoduna ejjam are jareya sapolo garis.

¹² Ra-kera e bakto jareya keya rato Babil, iya areya Merodakh-Baladan pottrana Baladan, meyarsa ja’ Rato Hizkiya gi’ buru sae dhari songkanna. Rato jareya laju ngotos oreng ngeba sorat ban le-olle ka Hizkiya.

¹³ Hizkiya narema para otosan jareya se pas epataowe sakabbinna hartana se aropa emmas ban salaka, palappa ban mennya’ ro’om, sarta sakabbinna parabudda tantarana. Tadha’ settonga se badha e karaton ban e sabingkerra karaja’anna se ta’ epatao ka para otosan jareya.

¹⁴ Saellana jareya Nabbi Yesaya ngadhep Rato Hizkiya laju mareksane, "Dhari ka’dhimma reng-oreng ka’dhissa’? Ponapa ca’epon reng-oreng gapaneka?" Saodda Hizkiya, "Reng-oreng ka’dhissa’ dhari Babil, nagara se jau dhari ka’dhinto."

¹⁵ "Ponapa se etenggu reng-oreng ka’dhissa’ e karaton?" dhabuna Yesaya pole. "Sadajana!" saodda Hizkiya. "Tadha’ settonga essena karaton se bi’ kaula ta’ epatao ka reng-oreng ganeka."

¹⁶ Yesaya laju mator ka rato, "Dhabuna PANGERAN

¹⁷ e settong bakto sadajana harta se badha e karatonnepon junandalem sareng sadajana ollena se epakompol sareng bangatowaepon junandalem kantos are mangken, bakal eangko’a oreng ka Babil. Bakal tadha’a karena sakale.

¹⁸ Dhari na’ potoepon junandalem bakal badha’a se ebakta ka Babil epadaddiya ponggaba sareng epaladinana rato e ka’dhissa’."

¹⁹ Dhabuna Rato Hizkiya, "Sae jugan dhabuepon PANGERAN se epanapa’ sampeyan ka kaula ganeka." Kan adhabu kantha jareya lantaran ca’na panggaliyanna: "Sokor tang karaja’an paggun aman ban taremtem saabidda sengko’ gi’ odhi’."

²⁰ Careta laenna parkara Rato Hizkiya, parkara sa-jasana kapahlawananna, ban baramma carana se abadhi taman ban sellogan se eangguy magili aeng ka kottha, ecathet e dhalem ketab Sajarana To-rato Yehuda.

²¹ Hizkiya seda, laju egante pottrana Manasye.

2 Raja-raja

Video 2 Raja-raja 20

Ikuti Kami:

KONTAK | PARTISIPASI | DONASI