Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ri anjo wattua garring lattangi Karaeng Hizkia. Sanna’ sikali anjo garrinna sa’genna a’birimmo mate. Battumi Na’bi Yesaya ana’na Amos angkunjungi siagang nakana, "Appasangi Batara sollanna kipa’le’ba’ sikontu urusanga, nasaba’ tena kila’jari baji’. Tenamo nasallo kimate."

² Assaile maemi ri temboka Karaeng Hizkia nampa appala’ doang angkana,

³ "O Batara, Kiu’rangi laloi angkanaya le’ba’mi kupare’ ata kalengku mae ri Katte, majarreka’ siagang tulusuki pa’maikku mae ri Katte. Tuli kuusahai anggaukangi apa Kikaerokia." Nampa angngarru’ Hizkia sanna’ si’nana nasa’ring nyawana.

⁴ A’lampami Yesaya ambokoi Hizkia, mingka tenanapa nassulu’ battu ri paranglakkeng tangngana balla’ karaenga, nisuroi ri Batara

⁵ ammotere’ mange ri Hizkia, karaenna Umma’Na Batara, siagang napabattui pasang kammaya anne, "INakke, Batara, Allata’ala nisombaya ri boenu Daud, Kulangngere’mi pappala’ doannu siagang Kucini’mi je’ne’ matannu. LaKupammolleko battu ri garrinnu; ammembara’ la’lampako mange ri BallakKu.

⁶ LaKutambai umuru’nu 15 taung pole. Ikau siagang kota Yerusalem laKulappassangko battu ri karaeng Asyur. Anne kotaya laKula’langngi lanri kala’birangKu siagang lanri parjanjiangKu siagang atangKu Daud."

⁷ Nampa nasuro Yesaya taua a’lica’ rappo ara nampa napasapu mae ri lattanna karaenga sollanna ammolle.

⁸ Akkuta’nammi Karaeng Hizkia angkana, "Apa pammateina ma’nassana angkanaya laNapammollea’ Batara siagang ammembara’ lakkullema’ mange pole ri Balla’Na Batara?"

⁹ Appialimi Yesaya angkana, "LaNasareki’ pammatei Batara iamintu angkanaya laNarupai janjinNa. Kamma-kamma anne, kereanga kikaeroki: Nipamajui 10 garisi’ taung-taunna anjo pa’jo’jo’ orolojia yareka nipammunduruki 10 garisi’?"

¹⁰ Nakanamo Hizkia, "Tenaja nasusa ampamajui 10 garisi’ taun-taunna anjo pa’jo’joka. Lanri kammana anjo paunduru’mi 10 garisi’."

¹¹ Appala’ doammi Yesaya mae ri Batara, nampa Napaunduru’ Batara 10 garisi’ anjo pa’jo’jo’ orolojia.

¹² Anjo wattua karaeng Babel, iamintu niarenga Merodakh-Baladan ana’na Baladan, nalangngereki kabara’na angkanaya beru ammollei Karaeng Hizkia battu ri garrinna. Jari nia’mo tau nasuro angngerang sura’ siagang hadia mae ri Karaeng Hizkia.

¹³ Nabuntulu’mi Hizkia anjo sikamma tunisuroa, siagang napappicinikammi mae ri ke’nanga sikontu kakalumanynyangnganna, iamintu bulaeng, pera’, rampa-rampa siagang minynya’ wangi, kammayatompa sikontu pakkakasa’ bundu’na tantarana. Tena manna sike’de’ apa-apa niaka ri balla’ kakaraenganna siagang ri sikontu kakaraenganna tanapappicinikang mae ri ke’nanga.

¹⁴ Nampa andallekang Na’bi Yesaya ri Karaeng Hizkia nakkuta’nang angkana, "Battu kemae ngasengi anjo taua? Apa nakana ke’nanga?" Appialimi Hizkia angkana, "Tau battu ri Babel, pa’rasangang bella."

¹⁵ Akkuta’nammi pole Yesaya angkana, "Apa nacini’ ke’nanga ri balla’ karaenga?" Appialimi Hizkia angkana, "Yangaseng-ngasenna! Tena manna sike’de’ apa-apa niaka lalang ri pammolikang barang-baranna balla’ kakaraenganga takupappicinikang mae ri ke’nanga."

¹⁶ Nampa nakanamo Yesaya mae ri karaenga, "Nakana Batara angkanaya

¹⁷ nia’ sallang se’re wattu nanilaling mange ri Babel sikontu kakalumanynyangngang niaka lalang ri balla’ kakaraengannu siagang sikontu apa-apa napassareanga boe-boenu sa’genna anne alloa. Tena lammantang tassesa.

¹⁸ Nia’ battu ri ana’ cucunnu lanialle siagang lanipa’jari pagawe balla’ karaeng untu’ allayani karaeng Babel."

¹⁹ Appialimi Karaeng Hizkia angkana, "Baji’ tongi anjo pasanNa Batara nupabattua mae ri nakke." Appiali kammai anjo lanri nakana pikkiranna: "Assala’ tulusu’ sannangi siagang amangi kakaraengangku lalang attallasakku."

²⁰ Pau-pau maraengannaya ri passala’na Karaeng Hizkia, ri passala’na jasa-jasa kabaranianna, siagang antekamma batena appare’ kollang siagang solongang je’ne’ untu’ ampa’lo’loroki je’neka mange ri kotaya, yangasenna niaki nicata’ lalang ri kitta’"Riwaya’na sikamma karaeng Yehuda."

²¹ Matemi Hizkia, nampa ana’na niarenga Manasye ansambeangi a’jari karaeng.

2 Raja-raja

Video 2 Raja-raja 20

Ikuti Kami:

KONTAK | PARTISIPASI | DONASI