Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri taung makaruampulona antuju ammarenta Karaeng Yerobeam II ri Israel, iaminjo wattua na’jari Karaeng Uzia ana’na Amazia ri Yehuda.
2 Anjo wattua nampa 16 taung umuru’na siagang ammarentai ri Yerusalem 52 taung sallona. Amma’na niarengi Yekholya, baine battu ri Yerusalem.
3 Sangkamma todong manggena, nagaukang tongi Uzia apa appakasannanga ri nyawaNa Batara.
4 Mingka sayanna, lanri tenana naputtai tampa’-tampa’ panynyombanga ri rewataya, sa’genna tuli assarena koro’bang siagang tuli attununa dupa ra’yaka anjoreng.
5 Nipa’jari garring salami ri Batara, na sa’genna mate, tena le’bakai a’jari baji’ anjo garrinna. Nisa’laki ammantang ri se’reang balla’ siagang tena nakkulle nagaukang sikamma tugasa’na. Jari ana’ bura’nena niarenga Yotam amwakkeli ammarenta ri ra’yaka.
6 Pau-pau maraengannaya ri passala’na Karaeng Uzia niaki nicata’ lalang ri kitta’"Riwaya’na sikamma karaeng Yehuda."
7 Matemi na nitarawang Uzia ri pa’jerakkanna sikamma karaenga ri Kota Daud. Nampa ana’na niarenga Yotam ansambeangi a’jari karaeng.
8 Ri taung makatallumpulona assagantuju ammarentana Karaeng Uzia ri Yehuda, iaminjo wattua na’jari karaeng todong Zakharia ana’na Yerobeam II ri Israel siagang ammarentai ri Samaria annang bulang sallona.
9 Sangkamma todong karaeng-karaeng ammarentaya rioloanganna, ia doraka tongi mae ri Batara. Naturuki kaja’dallanna Yerobeam I, le’baka angngerangi tu Israel mange ri gau’ dosaya.
10 Salum ana’na Yabesh assikongkoloki angngewai Karaeng Zakharia, nampa nabuno Karaeng Zakharia ri Yibleam, nampa nasambeang a’jari karaeng.
11 Lanri kammana anjo kajariammi apa le’baka Napa’janjiang Batara mae ri Karaeng Yehu angkanaya ana’ cucunna sa’genna lapisi’ makaappa’ la’jari karaeng ri Israel. Pau-pau maraengannaya ri passala’na Karaeng Zakharia, niaki nicata’ lalang ri kitta’"Riwaya’na sikamma karaeng Israel."
12 (15:11)
13 Ri taung makatallumpulo assalapang ammarentana Karaeng Uzia ri Yehuda, iatommi anjo wattua na’jari Karaeng Salum ana’na Yabesh ri Israel. Poro sibulanji bawang ammarenta ri Samaria,
14 lanri niaki Menahem ana’na Gadi battu ri Tirza mange ri Samaria ambunoi Salum, nampa Menahem ansambeangi a’jari karaeng.
15 Lalang ri pa’jappanna battu ri Tirza, naancuru’ taba sikalimi Menahem kota Tifsah siagang daera-daera niaka ri ampi’na kammayatompa nabunomi sikontu pandudu’na. Lanri tenana naero’ taua ri anjo kotaya manyara mae ri ia, naallemi napue battanna sikamma bai’-baine tiananga ri anjo kotaya. Pau-pau maraengannaya ri passala’na Karaeng Salum, kammayatompa pasikongkolang nagaukanga, niaki nicata’ lalang ri kitta’"Riwaya’na sikamma karaeng Israel."
16 (15:15)
17 Ri taung makatallumpulo assalapang ammarentana Karaeng Uzia ri Yehuda, iatommi anjo wattua na’jari karaeng Menahem ana’na Gadi ri Israel, siagang ammarentai ri Samaria 10 taung sallona.
18 Lalang sikontu tallasa’na tuli dorakai mae ri Batara lanri naturukinna kaja’dallang nagaukanga Karaeng Yerobeam I, le’baka angngerangi tu Israel mange ri gau’ dosaya.
19 Ri wattunna nia’ battu Pul iamintu karaeng Asyur ambunduki tu Israel, nisarei ri Menahem 34.000 kilogarang pera’ sollanna nibantu Menahem ampakajarreki kakoasanna ammarenta ri Israel.
20 Ia carana Menahem anggappai anjo doeka iamintu napassai sikamma tau kalumanynyanga ri Israel assare 50 doe’ pera’ tunggala’ tau. Lanri kammana anjo nabokoimi Pul anjo pa’rasanganga nampa ammotere’ mange ri pa’rasanganna.
21 Pau-pau maraengannaya ri passala’na Karaeng Menahem, niaki nicata’ lalang ri kitta’"Riwaya’na sikamma karaeng Israel."
22 Matemi siagang nitarawammi Menahem. Nampa ana’na niarenga Pekahya ansambeangi a’jari karaeng.
23 Ri taung makalimampulo ammarentana Karaeng Uzia ri Yehuda, iatommi anjo wattua na’jari Karaeng Pekahya ana’na Menahem ri Israel siagang ammarentai ri Samaria ruan taung sallona.
24 Doraka tongi mae ri Batara lanri naturukinna kaja’dallanna Karaeng Yerobeam I, le’baka angngerangi tu Israel mange ri gau’ dosaya.
25 Kalase’renna tau battua ri sikamma perwira tantarana, iamintu niarenga Pekah ana’na Remalya, assikongkoloki siagang 50 tau battu ri Gilead. Nampa nabuno ke’nanga anjo Karaeng Pekahya siagang rua tau maraengang niarenga Argob siagang Arye. Lalangi ri se’reang tembo’ pattahangngang ri balla’ karaenga ri Samaria nibuno Karaeng Pekahya. Nampa Pekah a’jari karaeng ansambeangi Pekahya.
26 Pau-pau maraengannaya ri passala’na Karaeng Pekahya, niaki nicata’ lalang ri kitta’"Riwaya’na sikamma karaeng Israel."
27 Ri taung makalimampulo anrua ammarentana Karaeng Uzia ri Yehuda, ia tomminjo wattua na’jari Karaeng Pekah ana’na Remalya ri Israel. Ammarentai ri Samaria 20 taung sallona.
28 Doraka tongi mae ri Batara lanri naturukinna kaja’dallanna Karaeng Yerobeam I, le’baka angngerangi tu Israel mange ri gau’ dosaya.
29 Ri wattu ammarentana Pekah, naallei karaeng Asyur iamintu niarenga Tiglat-Pileser kota-kota Iyon, Abel-Bet-Maakha, Yanoah, Kedes, Hazor, daera Gilead, Galilea siagang Naftali. Pandudu’na niengkaki mange ri Asyur a’jari tunitahang.
30 Ri taung makaruampulo ammarentana Karaeng Yotam ana’na Uzia ri Yehuda, assikongkoloki Hosea ana’na Ela untu’ angngewai Karaeng Pekah siagang nabunomi Karaeng Pekah, nampa ia ansambeangi a’jari karaeng.
31 Pau-pau maraengannaya ri passala’na Karaeng Pekah, niaki nicata’ lalang ri kitta’"Riwaya’na sikamma karaeng Israel."
32 Ri taung makarua ammarentana Karaeng Pekah ana’na Remalya ri Israel, ia tomminjo wattua na’jari Karaeng Yotam ana’na Usia ri Yehuda.
33 Anjo wattua 25 taung umuru’na siagang ammarentai ri Yerusalem 16 taung sallona. Amma’na iamintu Yerusa ana’na Zadok.
34 Nagaukangi Yotam apa appakasannanga ri nyawaNa Batara, sangkamma todong nagaukanga manggena iamintu Uzia.
35 Mingka sayanna, katena naputtai tampa’-tampa’ panynyombanga mae ri rewataya sa’genna tuli assarena koro’bang siagang attununa dupa ra’yaka anjoreng. Iaminne Yotam ambangungi Pakke’bu’ Lompo Bageang Waraka ri Balla’Na Batara.
36 Ri wattu ammarentana Yotam, appakkaramulami Nakiring Batara iamintu Rezin karaeng Siria siagang Pekah karaeng Israel battu ambunduki tu Yehuda. Pau-pau maraengannaya ri passala’na Karaeng Yotam, niaki nicata’ lalang ri kitta’"Riwaya’na sikamma karaeng Yehuda."
37 (15:36)
38 Matei siagang nitarawangi ri pa’jerakkanna sikamma karaenga ri Kota Daud. Nampa ana’na niarenga Ahas ansambeangi a’jari karaeng.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA