Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E taon se kapeng petto lekor pamarenta’anna Rato Yerobeyam II e Isra’il, Uziya pottrana Amaziya jumenneng rato Yehuda.
2 E bakto jareya yuswana gi’ nem bellas taon ban marenta e Yerusalim saeket dhuwa’ taon abidda. Ebuna Yekholya asmana, babine’ dhari Yerusalim.
3 Akantha ramana, Uziya alampa’agi se masenneng panggaliyanna PANGERAN.
4 Tape emanna, kennengnganna panyemba’anna diba se badha e man-dhimman ta’ epatadha’, daddi ra’yat paggun ngeba kurban ban ngobbar dupa ka jadhiya.
5 Bi’ PANGERAN Uziya jareya epanyandhang panyaket kole’ budhuk, ban panyaket jareya ta’ endha’ baras sampe’ sedana. Gi’ songkanna epajau dhari oreng esaba’ e settong bengko ban epabebas dhari gas-tugassa. Pottrana se anyama Yotam makkele marenta ra’yadda
6 Careta laenna parkara Rato Uziya ecathet e dhalem ketab Sajarana To-rato Yehuda.
7 Uziya seda pas esareyagi e pasareyanna to-rato e Kottha Daud, laju egante Yotam, pottrana.
8 E taon se kapeng tello polo ballu’ pamarenta’anna Rato Uziya e Yehuda, Zakhariya pottrana Yerobeyam II jumenneng rato Isra’il ban marenta e Samaria nem bulan abidda.
9 Akantha to-rato se marenta sabellunna, Zakhariya dusa keya ka PANGERAN, nero kajahadanna Rato Yerobeyam I se daddi lantaranna Isra’il alako dusa.
10 Salum pottrana Yabes asakongkel ngamoso Rato Zakhariya, Salum mate’e Rato Zakhariya e Yibleyam, laju agante daddi rato.
11 Kalaban cara se kantha jareya la kalakon apa se edhabuwagi PANGERAN ka Rato Yehu ja’ na’ potona sampe’ toronan se kapeng empa’ bakal daddiya rato Isra’il. Careta laenna parkara Rato Zakhariya ecathet e dhalem ketab Sajarana To-rato Isra’il.
12 (15:11)
13 E taon se kapeng tello polo sanga’ pamarenta’anna Rato Uziya e Yehuda, Salum pottrana Yabes jumenneng rato Isra’il, marenta e Samaria pera’ sabulan abidda,
14 sabab Menahem pottrana Gadi meyos dhari Tirza ka Samaria, laju mate’e Salum, pas agante jumenneng rato.
15 E dhalem parjalananna dhari Tirza, Menahem ngancor kottha Tifsah ban ra-dhaera e sabingkerra sampe’ tadha’ karena, ban pandhudhu’na epate’e kabbi. Sarrena kottha jareya ta’ endha’ atellok ka salerana, babine’an se ngandhung e kottha jareya laju padha eporak tabu’na. Careta laenna parkara Rato Salum, tamaso’ kasakongkellanna, ecathet e dhalem ketab Sajarana To-rato Isra’il.
16 (15:15)
17 E taon se kapeng tello polo sanga’ pamarenta’anna Rato Uziya e Yehuda, Menahem pottrana Gadi jumenneng rato Isra’il, ban marenta e Samaria sapolo taon abidda.
18 Saomorra rato jareya alako dusa ka PANGERAN sabab nero kajahadanna Rato Yerobeyam I, se daddi lantaranna oreng Isra’il alako dusa.
19 E bakto Pul rato Asyur alorok Isra’il, Menahem ngatorragi salaka tello polo empa’ ebu kilo ka rato Pul sopaja rato jareya abantowa makoko kakobasa’anna salerana e Isra’il.
20 Carana Menahem olle pesse jareya kalaban maksa reng-oreng sogi ngatorragi pesse salaka saeket rang-sorangnga. Daddi Pul laju abali dhari nagara jareya gubar ka nagarana dibi’.
21 Careta laenna parkara Rato Menahem ecathet e dhalem ketab Sajarana To-rato Isra’il.
22 Menahem seda pas esareyagi, sarta laju egante pottrana iya areya Pekahya.
23 E taon se kapeng saeket pamarenta’anna Rato Uziya e Yehuda, Pekahya pottrana Menahem jumenneng rato Isra’il ban marenta e Samaria dhu taon abidda.
24 Rato jareya alako dusa ka PANGERAN sabab nerowe kajahadanna Rato Yerobeyam I, se daddi lantaranna oreng Isra’il alako dusa.
25 Sala settong dhari para parwirana reya, iya areya Pekah pottrana Remaliya, asakongkel ban oreng dhari Gileyad se bannya’na saeket oreng. E dhalem settong binteng e karaton e Samaria reng-oreng jareya mate’e Pekahya ban oreng laenna kadhuwa se anyama Argob ban Arye. Saellana jareya Pekah laju jumenneng rato agante Pekahya.
26 Careta laenna parkara Rato Pekahya ecathet e dhalem ketab Sajarana To-rato Isra’il.
27 E taon se kapeng saeket dhuwa’ pamarenta’anna Rato Uziya e Yehuda, Pekah pottrana Remaliya jumenneng rato Isra’il, ban marenta e Samaria dhu polo taon abidda.
28 Rato jareya dusa ka PANGERAN lantaran nero kajahadanna Rato Yerobeyam I se daddi lantaranna Isra’il alako dusa.
29 E jaman pamarenta’anna Pekah, Tiglat-Pileser rato Asyur arebbu’ kottha Iyon, Abel-Bet-Ma’akha, Yanowah, Kedes, Hazor, dhaera Gileyad, Galilea ban Naftali. Pandhudhu’na eangko’ ka Asyur epadaddi tawanan.
30 E taon se kapeng dhu polo pamarenta’anna Rato Yotam pottrana Uziya e Yehuda, Hoseya pottrana Ela asakongkel ngamoso Rato Pekah, Rato Pekah jareya epate’e ban Hoseya laju agante jumenneng rato.
31 Careta laenna parkara Rato Pekah ecathet e dhalem ketab Sajarana To-rato Isra’il.
32 E taon se kapeng dhuwa’ pamarenta’anna Rato Pekah pottrana Remaliya e Isra’il, Yotam pottrana Uziya jumenneng rato Yehuda.
33 E bakto jareya yuswana sagame’ taon ban marenta e Yerusalim nem bellas taon abidda. Ebuna iya areya Yerusa pottrana Zadok.
34 Yotam alampa’agi se masenneng panggaliyanna PANGERAN, padha ban Uziya, ramana.
35 Tape emanna, ngan-kennengnganna panyemba’anna diba se badha e man-dhimman ta’ epatadha’, daddi ra’yadda gi’ terros ngeba kurban ban ngobbar dupa ka jadhiya. Yotam jareya se maddek Labang Saketheng Dhaja e Padalemman Socce.
36 E jaman pamarenta’anna Yotam, PANGERAN molae ngerem Rezin rato Siria ban Pekah rato Isra’il epalorok Yehuda. Careta laenna parkara Rato Yotam ecathet e dhalem ketab Sajarana To-rato Yehuda.
37 (15:36)
38 Yotam seda laju esareyagi e koburanna to-rato e Kottha Daud, sarta laju egante Ahas pottrana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA