¹ Ano dang tininak de aya-wal oso-wal, suratna ansae ebe mae hap ale gulzimꞌin, dekam mese suratna ebe mae hap dan sozimnin. Sap ee eno mae mo enlalasa dikim ese ta gwizimdin hibe dwam gwe-gweꞌan– enho kles gwesin sremkam ekakim lowehe gwek.
² Zep men desa Alap mo ol ayang gul gwen zini orep nen gubirida gwek, hen men desa nesa de ngaya tabin hip de Teipsinni Yesus nesa gubirida gweka, desa bahem eititi gwibin. Yesus mo dam tasibin zini, ee mese desa ebe mae hap ayang ul gwizimk, hen angkam ee, Petrus, mese enlala sobiridanna emsa dan sozimnin.
³ Nonol tanganna ansa emki enlala gwe-gwibin: Aumwa hap denak zi mo hole-hle enlalana sa tangan taman kini gwera. Hen dekam emsa sa anakan swre da gwibir,
⁴ “Em ema ekil giꞌin, ‘Yesus sa etan lwahal zala.’ Hwena nonol men zen sap daibliblak, zen mes nama de sap esbla tine gwennak hendep juwesik. Alap kim okamana ansa yang gulsuku hendep angkam, kina ki banakan mae man wet gwesiꞌin!”
⁵ Hwena zen hom ola ansa de enlala gwibin hip edwam gwe-gweꞌan: Nonol lone sennak Alap ngli naban okama naban am ol-gun enkam yang sosuku– hina kim kles son hap gubirki hen otde weyana kim aha-erenak de tagal gwesin hip gubirkiye. Okamana an dekam zep hatasek.
⁶ Dekam zep hendep weyakam orep de okamana insa timbwas gulku– ho namwa yala insa kim hatan hap gubirkiye.
⁷ Hen kirekam sa etan Alap angkam de okama naban ngli naban ol-gun enkam timbwas sola. Dekam hwena syaukkum sa. Zen angkam kirekam de hen timbwas son hap lam soꞌara– aumwa hap de klis gun hup de yaklana iwe kim de hataꞌakye. Zen dekam sa hen syauknu inkam Zenaka de betek gweblan srem wenya insa timbwas tabiri.
⁸ Hwena aya-wal oso-wal, ansa bahem eeititi gwibin: Bian Alap hom zi mo kim yakla naban ben naban ait gwibirida. Neno mae mo aitbinkim seribu tahunna, zen hwena Bian hap san de aha-ere yaklana kiye. Bian mo aitbinkim yaklana aha-en, hwena nebe mae hap holona seribu tahun.
⁹ Bian hom zere mo gu-gubiridansa de syal gwibin hip holo gweꞌara– men kirekam zini anakan tim nul gwenan, “Yesus ba hap hata srem gweꞌara?” Hwena Zen kwasang tol hap nesa eissibiridaꞌara– nen dikim sap nere mae mo karek-karek nakon ehalen hap. Zen hom aha mae nik de tin hip dwam gweꞌara. Zen hwena kitak de ehalenkam de engaya gwen hap sap dwam gweꞌara.
¹⁰ Hwena Bian Yesus mo lwa halzan hap de yaklana, zen sowe zi mo kim sa lwal. Dekam nglina auku mamkam de tadre gwen naban sa jek-jak ner. Hendep dekam sa yakla nwena, keisni, hen benna ehwasder– hendep okamana hen zi mo syal gwibin kire-kirena kitak. Banakare maena molya lwak.
¹¹ Zep kirekam insa lwaꞌan, nen de deban etimbwas gwen srem hap, a kirekam nen eliwehen: Dam-dam enkam nen lowehe gwen– Alap en hon de etal gwesinkim.
¹² Deban salok-salokkam nen anakare enlala naban lowehe gwen, “Diki namen de Yesus hata zankam airis tangan.” Aumwa hap de yaklanak nglina an sap sa hwasdera, hen keis maena sap sa sal-sal hap eho gwer,
¹³ hwena nen okama ese naban ngli ese nabane kara ei gwizimꞌin– men kirekam Alap hamal hap nesa gu-gubirida gwekake. Zewe dam-dam enkam de lowehe gwen en nik sa biti gwer.
¹⁴ Zen in zep, aya-wal oso-wal, sap nen ema kirekam ngein sin dep dena insa kara ei gwibiꞌin, zep nen dawem enkam ealp gwe-gwen– dekam de zere mo nwenak enlala karek-karek sremkam hen ekun gwen sremkam lowehe gwen hap. Kirekam de lowehe gwenkam, ki nen zere mo taha terenak esa lowehe gwer.
¹⁵ Hen nen ki Bian Yesus mo lwa halzan hap de yakla hap anakan eenlala gwe-gwen, “Zen sap sa holo gwera, sap ahakon zen dekam sa hen engaya gwer.” Alap mes neno mae mo dang tininak de ayana Paulus hup enlala blala zerblaka, zen in zep hen kire hap dena
¹⁶ tingare zere mo suratnak nebe mae hap ale gul gwizimki. Zeno suratnak hen ki– olk san de enlala nabare naye. Yesussu de taibliblannak de etatete gwen srem wenya hen tame gun srem wenya zep desa karekkam dam nulsuk gwenan. Zen hen Alap mo aha ol ale gunnu kirekam hen totoresa srip gulsunkum namblak nul gwenan, hendep ahakon zep hendep syauk sun dep de ora san lwan dahal gwenan.
¹⁷ Zep ano dang tininak de aya-wal oso-wal, ee in zebe hamal hap suratkam emsa enlala sobiridal. Zen in zep salok-salokkam em lowehe gwen. Karek gol gwen zi mana emsa gwa san dep sil dibirhal gwenank. Sap em mese Bian onak etal gwesik. Dekon ema hwena altilink.
¹⁸ Diki nesa de ngaya tabin hip de Zini Bian Kristus Yesussu de tame tankam hen kwasang-kwasang zemka de tame gunkum em etatete gwe zahen. Dikire zeno bosena angkam hen hendep denaban teip nulsuk gweblak. In eiwa.