Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saellana jareya Rato Yosiya araya’agi Paska e Yerusalim kaangguy ahormadi PANGERAN. Ba-dumba kaangguy paraya’an jareya esambelli e tanggal pa’ bellas bulan settong.
2 Yosiya gi-magi ka para imam lalakon se kodu ejalannagi e Padalemman Socce, sarta ngajak sopaja lalakon jareya ejalannagi pateppa’.
3 Reng-oreng Lewi se la malolo epaladine PANGERAN, ban se daddi ru-guru e Isra’il, narema papakon kantha reya dhari Yosiya, "Saba’ Petthe Parjanjiyan PANGERAN se socce reya e dhalem Padalemman Socce se epaddek Rato Sulaiman pottrana Daud. Ta’ osa le-alle pole. Ladine GUSTE Allahna ba’na ban bangsa Isra’il ommadda.
4 Ba’na kodu padha badha e kennengnganna bang-sebang e Padalemman Socce menorot regguna bang-sebang sarta to-sabakto bisa ajalannagiya lakona bang-sebang, menorot pambagiyanna lalakon se la etantowagi ka ba’na bi’ Rato Daud sarta Rato Sulaiman pottrana.
5 Ator gu-regguna jareya pateppa’ sopaja e antarana ba’na ros-terrosan badha se bisa nolong kalompo’na oreng Isra’il e Padalemman Socce.
6 Ba’na kodu nyambelli dumba kaangguy paraya’an Paska. Daddi ba’na kodu nyocce’e aba’ sopaja patot nyemba PANGERAN, ban sadhiya’agi keya ban-kurban se kodu eatorragi ka PANGERAN, sopaja kalaban cara se kantha jareya reng-oreng Isra’il laenna bisa ajalannagi pa-apa se la epakonnagi bi’ PANGERAN kalaban parantara’anna Mosa."
7 Sopaja reng-oreng se hadir e dhalem paraya’an Paska jareya bisa ngatorragi kurban Paska, Rato Yosiya nyombangngagi sabagiyan dhari ebinna dibi’ aropa dumba, budhu’na dumba ban embi’ se gi’ ngodha tello polo ebu meggi’, sarta sape lake’ tello ebu meggi’.
8 Ba-ponggabana Yosiya aberri’ sombangan keya kaangguy mam-imam, oreng Lewi ban sakabbinna ra’yat. Ba-ponggaba se epassrae tanggung jawab kaangguy Padalemman Socce, iya areya Imam Agung Hilkiya ban Zakhariya, sarta Yehiyel, padha ngatore ka para imam budhu’na dumba ban embi’ se gi’ ngodha dhu ebu nem atos meggi’ sarta sape lake’ tello ratos meggi’ kaangguy tor-ator e dhalem paraya’an jareya.
9 Para pamimpinna oreng Lewi, iya areya: Konanya, Semaya ban Netane’el taretanna, Hasabya, Yeiyel ban Yozabad, aberri’ ka reng-oreng Lewi budhu’na dumba ban embi’ se gi’ ngodha lema ebu meggi’ sarta sape lake’ lema ratos meggi’ kaangguy tor-ator e dhalem paraya’an jareya.
10 Saellana kabbi la ranta kaangguy paraya’an Paska, mam-imam ban gu-regguna oreng Lewi ngennengnge kennengnganna bang-sebang akantha se la epakonnagi bi’ rato.
11 Saellana jareya ban-keban kaangguy paraya’an Paska jareya esambelli; bi’ oreng Lewi laju ekolet, dineng dharana eketessagi ka attassa mezba bi’ para imam.
12 Ban-keban se egabaya kurban obbaran jareya laju egi-bagi. Saneyap galumpo’na oreng se apolong sabala’an hadir e jadhiya narema settong, sopaja kabbi padha’a bisa ngatorragi kurban menorot atoran se esebbuttagi e dhalem ketab Hokomma Mosa.
13 Bi’ reng-oreng Lewi kurban Paska jareya laju epanggang e attassa apoy, menorot atoran; dineng ban-kurban se kusus laju eola e lo’-polo’, pennay ban bajan, saellana jareya dagingnga laju duli ebagi ka reng-oreng.
14 Saellana jareya buru reng-oreng Lewi nyadhiya’agi bagiyanna kaangguy aba’na dibi’ ban bagiyanna para imam toronanna Harun. Sabab sampe’ malem para imam jareya alalakon terros ngatorragi ban-keban menangka kurban obbaran, sarta ngobbar gajina ban-kurban jareya.
15 Para ahli mosik dhari kaom Asaf e dhalem suku Lewi badha e kennengnganna se la etantowagi bi’ Rato Daud. Areya’ ma-nyamana reng-oreng jareya: Asaf, Heman, ban Yedutun, nabbi se ngabdi ka rato. Para pangawalla bang-labang saketheng ta’ osa ngalle dhari eppossa bang-sebang, sabab reng-oreng jareya bisa araya’agi Paska e kennengnganna lalakonna bang-sebang kalaban bantowanna reng-oreng Lewi laenna.
16 E are jareya reng-oreng jareya ngalakone sabarang se epakonnagi bi’ Rato Yosiya kaangguy paraya’an Paska, tamaso’ tor-ator e mezba.
17 Pettong are abidda sakabbinna oreng Isra’il se hadir e jadhiya araya’agi Paska ban paraya’an Roti Se Ta’ Eragi’i.
18 Paska kantha jareya gi’ ta’ tao ebadha’agi pole sajjegga jamanna Nabbi Samuwel. Tadha’ settonga e antarana to-rato sabellunna se tao araya’agi Paska akantha se eraya’agi
19 e dhalem taon se kapeng ballu bellas pamarenta’anna Yosiya jareya, se eraya’agi rato jareya dibi’ ban mam-imam, oreng Lewi, oreng Yehuda ban Isra’il, sarta pandhudhu’ Yerusalim.
20 Saellana Rato Yosiya alampa’agi jareya kabbi kaangguy Padalemman Socce, Nekho rato Messer mimpin pasukanna aperranga e Karkemis e seddi’anna Songay Efrat. Yosiya ngoddi lang-ngalange,
21 tape Nekho ngerem kabar kantha reya ka Yosiya, "Perrang paneka banne orosanna sampeyan, rato Yehuda! Kaula ta’ entara merrange sampeyan, tape merrangana so-moso kaula, ban Allah makon sopaja kaula duliyan. Allah nolonge kaula, daddi sampeyan ja’ lang-ngalange Salerana, tako’ dhaggi’ sampeyan epaancor."
22 Tape Yosiya maksa alaban ban ta’ kasokan norodi apa se edhabuwagi Allah kalaban parantara’anna Rato Nekho. Yosiya nyamar, laju maso’ ka dhalem paperrangan e tana rendha Megido.
23 E dhalem paperrangan jareya Rato Yosiya ekenneng pana. La-kabulana laju epakon ngeba salerana kalowar dhari paperrangan jareya sabab lokana berra’.
24 Yosiya eangko’ dhari karetana, ealle ka kareta laen se badha e jadhiya, saellana pas egiba ka Yerusalim. E jadhiya Yosiya seda, laju esareyagi e pasareyanna to-rato. Ra’yat Yehuda ban Yerusalim padha sossa lantaran sedana ratona jareya,
25 Nabbi Yeremiya nganggit nyanyeyan tangesan se etojjuwagi ka Rato Yosiya. Sampe’ sateya nyanyeyan jareya gi’ eangguy e Isra’il bi’ para tokang nyanye, lalake’ otaba babine’, e dhalem parengeddanna kasossa’an lantaran sedana Yosiya. Nyanyeyan jareya epamaso’ ka dhalem kompolanna nyanyeyan tangesan.
26 Careta laenna parkara Yosiya, parkara kataresna’anna ka PANGERAN, ban kata’adanna ka kom-hokomma PANGERAN,
27 pandha’na parkara sakabbinna caretana odhi’na dhari adha’ sampe’ ka dhi-budhina, la ecathet e dhalem ketab Sajarana To-rato Isra’il ban Yehuda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA