¹ Men zen Yesussu anakan daibli gweblanan, “Zen eiwa Alap mo Tane– nesa de ngaya tabin hip Dena,” kire zini zen Alap mo wei-wik gun walas. Kire zini hen Bi zem Alapsa man ensa nola gweblanan, hen Alap mo wei-wik gun walas bose zemka man kwasang neibirida gwenan.
² Zep nen de Alapsa ensa lwa gweblankam, hen zeno ol san de enlala tatete naban ang ta gwenkam, dekam mes dam gwesinin: Nen esa hen Bian mo tingare wei-wik gun walasna kwasang eibirida gwer.
³ Sap men zen Alapsa enna nola gweblanan, zen sa zeno ol san ang ta gwer. Hen zeno ol san de ang tanna hom nebe mae hap dohon-hon gwizimꞌin.
⁴ Nen an Bian mo wei-wik gun walas. Zen in zebe auhu-kama hole-hlena ja kul guk kini gwenan. Hwena desa de jaul guk kini gwen hap de sosonna, zen diki Yesussu de taibliblan en nakone ulin gwenan.
⁵ Men zen anakan daibli gweblaꞌan, “Zen eiwa Alap mo Tane,” zen zen auhu-kama hole-hlena insa ja nul guk kini gweꞌan. Kire srem wenya bejen.
⁶ Kristus Yesus Zen eiwa zi tangankam hata zaka. Te-lidak son nakon in zep zeno tim nikon ho naban kala ban wet nosok. Zen ho en hom wet sok. Hwena kala ban ho naban dang gulblun weina in kon wet nosok. Zep man tangan dam gwesinin: Zen eiwa zi tangankam hata zaka. Alap mo Enhona hen kirekam neno mae mo enhonak eiwa gul gwenda, “Zen eiwa zi tangankam hata zaka.” Hen Bian mo Enhona Zen Bejen boton gwen.
⁷ Zep Bian Alap mes dekam de nebe mae hap eiwa guzimdin hip dena dan-ahan goltreizimki:
⁸ Ahana hona in zen hlewe hezak. Ahana kala in zen wet sok. Hen ahana Alap zere mo Enho. Hwena dan-ahare eiwa de gunnu in mo dam gulsunnu, zen aha-en. An zen: “Yesus Zen eiwa zi tangankam hata zaka.”
⁹ Zen zep hen anakan lwaꞌan: Dan-ahare zi de banakare maesa eiwa gunnu, emaka laiblibiridaꞌan. An hwena angkam Bian Alap Zen dan-aharena inkam eiwa de guꞌura– nen dikim hen anakan taibliblan hap, “Zen Zen eiwa– zeno Tane naye.”
¹⁰ Nen men zene Alap mo Tanena insa laibli gweblaꞌan, Alap man neno mae mo enhonak kirekam hen eiwa de gul gwenda. Zen dekam zebe tangan anakan dam lasik gwenan, “An eiwa Zen tangan.” Alap Zen mes ki kirekam nebe mae hap eiwa de gulzimki, zep zi de kirekam Tane zemka taibliblan sremkam, zen ki Alapsa gu gweblaꞌara, “Zen boton tamna.”
¹¹ Hwena Alap sap mes anakan eiwa de gul gwizimki, “Ëre mo Tane naban de zeraha-en gwen wenya kip, Ëe mese hendep de engaya gwen hap dena golzimk.”
¹² Men zen Tane zemka taibliblankam neraha-en gweꞌan, zen mes hendep de engaya gwen hap dena nulin. Hwena men zen neraha-en gwe srem gweꞌan, zen hom nul inꞌin.
¹³ Em in zen kirekam laibliblak, ee in zebe kire hap denaka de ebe mae hap ale gulzimdin hip dwam gwer– em dikim anakan etawa gwen hap, “Ëe mese hendep de engaya gwen hap dena insa ulink.”
¹⁴ Zep angkam mes tangan dam gwesik: Bian man neno mae mo abena sal gwenda– nen de zeno dwam gwibin sin abe tankamye. Nen in zebe saher sremkam Alapsa abe la gwenan.
¹⁵ Hen Bian de neno mae mo banakare mae hap de abesa sal gwenkam, dekam mes dam gwesinin, “Zen sa kiresa nebe mae hap gol gwizimdi.” In zebe kirekam ulin gwenan.
¹⁶ Zep em de ere mo Kristen bosesa anakan tol hla tanna, “Zen man ora dawem nakon syal heꞌara,” dekam Biansa em anakan abe tan, “Emki etan zini ansa ora dawem san dep dam tasik sonen.” Dekam sa etan desa dam tasik sonera. Hwena ahakorena serkam tangan Kristussu de hli tankam syauk sun de ora san dep esyalhe gwenan. Kirekam de zi hip ee home emsa gubiridaꞌan– zebe mae hap de kirekam Biansa abe tan hapye.
¹⁷ Tingare kirekam-kirekamna, zen sap eiwa kitak karek. Hwena syauk sun dep de karekna hen ki. Hen syauk srem san dep dena hen ki. Syauk srem san dep de ekarek gwen zi hip, em de Biansa abe ta gwenkam, Zen sa tap gulsuk gwizimdi.
¹⁸ Nen tawana, Alap mo wei-wik gun walasna nen bejen kareksa gol tine gwen. Sap Alap zere mo Tanena man nesa kara ta gwibirida, zep dowal mo kigi ba kon dep? – nesa golek de tabir tine gwen naye.
¹⁹ Nena tawana: Nen an eiwa Alap mo wei-wik gun walas. Hwena tingare auhu-kama enlala wenya, zen kitak dowal mo kigi mo irik ginnik lowehe gweꞌan.
²⁰ Hen nena tawana: Ngaya Zini Alap mo Tanena mes hata zaka, hen Zen mes Bi zemka dikim tame tan hap dena nebe mae hap golzimki. Nen kime Tane Zem in han taibliblankam eraha-en gwek, zen dekam zebe hen Bi zeban eraha-en gwek. Kristus Yesus Zen hen eiwa Alap, hen Zen Zen– engaya gwen hap de ausu naye.
²¹ Zep ano dang tini tabin walas, yang tabin alap-alapsa aes eisibirida gwek.