¹ Emki eenlala gwen: Bian Alap mes kwasangna nebe mae hap sowehen tangankam golzimki, zep hendep nesa gubiridaka, “Em ano dang tini tabin walas.” Eiwa, wehasa hom, nen eiwa zeno walas tangan! Hwena auhu-kama enlala zini molya nesa anakan tame da gwibik, “An Alap mo walas,” sap zen hom Yesussu anakan tame dak, “Yesus Zen Alap mo Tane.”
² Ano dang tininak de wenya, nen an angkam eiwa zen– “Alap mo walas”kam de gubiridan wenyaye. Hwena Zen hom nebe mae hap golzimki– dekam de anakan tame gun hup denaye, “Alap mo walasna nen kirekam esa eliweher.” Hwena nen tawana: Yesus de etan lwahal zankam, zeno kim esa eliweher. Sap dekam damkam esa kara la gwer, zep zeno kim esa eliweher.
³ Zep nen men zene kirekam eenlala gwe-gweꞌan, “Ëe asa Lalak Zini Yesussu zertower,” nen zebe nere mae mo enhona lalak la gwibirin.
⁴ Zini men zen karekna nol gwenan, zen Alap mo olsa kim ja-ja nul gwenan. Sap kitak de karekna mensa zini syal nei gwibirin, zeno ausuna kitak Alap mo olsa dikim ja-ja gun hup dena.
⁵ Zep men zen Yesus hun zeraha-en gwenna, zen bejen kareksa gol tine gwen. Sap nen tawana: Yesus Zen neno mae mo karek-kareksa de ngan gulsuzimdin hip hata zaka. Sap Zebon onak hom tangan– karek mae naye. Hwena men zen karekna nol tine gwenan, zen Yesussu de tame tan srem wenya hen taibliblan srem wenya.
⁶ (3:5)
⁷ Ano walas, men zen ora srem san dep emsa titi da gwibirin, bahem salbirida gwen. Men zen dam-dam enkam ezauk gwenan, zen diki zen Kristussu nertroꞌan, sap Zena dam-dam enkam zauk gwenda.
⁸ Hwena men zen karekna nol tine gwenan, zen eiwa dowal mo kigi mo bi gwibiridan walas. Sap dowal mo kigina in zen nonol lonesen nakon karek gonna kon gwesik hanaka, hendep angkam nama gol tine gwenda. In zep Alap mo Tanena in hata zaka– zeno syal karekna insa dikim dri yulsublun hap.
⁹ Zep Alap mo wei-wik gun walasna, nen bejen kareksa de gol gwen ennak lowehe tine gwen, sap Alap mo Enhona, Zen enho nakon nesa golegwe gwenda. Nen sap kie kareknak altil gwenan. Hwena nen bejen zewe en edohon gwe-gwen, sap nen an Alap mo sipni.
¹⁰ Zep a kire nakon esa zisi tame la gwibir, “Zen Alap mo walas,” ahaksa, “Zen dowal mo kigi mo walas”: Men zen dam-dam enkam ezauk gwenan, zen Alap mo walas. Hwena men zen kirekam ezauk srem gwe-gwenan, zen Alap mo walassa hom. Hen men zen Kristen bose zemka kwasang neibirida srem gwe-gwenan, zen hen Alap mo walassa hom.
¹¹ Em kime eKristen gwek, dekam zep anakan emsa tawa da gwibik, “Kristen bose omka em kwasang gwibirida gwen.”
¹² Nen bap nen Kaen Bak mo kim egwe gwen– men zen oso zemka zip sokaye. Zen in dowal mo kigi mo bi gweblan walas. Zen mae hap zip soka: Sap oso zem in dam-dam enkam Alap mo nwenak gwe gweka. Hwena zena kareksa gol gweka. In zep husus gweblaka.
¹³ Zep aya-wal oso-wal, bahem tenggwanbirida gwen– auhu-kama enlala zi de emsa husus gwibirida gwen naye.
¹⁴ Sap menkam nen juwen ora sane sek gweꞌak, hwena angkam mese engaya gwen hap de orana dam lasil. Nen zebe nere mae mo Kristen bose walya kwasang eibirida gwenan. Zen in zebe hen anakan nenaka dam lasik gwibirin, “Nen angkam engaya gwen hap de ora sane sek gweꞌan.” Zep a kire nakon esa zisi tame la gwibir: Kristen bose zemka men zen kwasang neibirida srem gwe-gweꞌan, zen nama tin hip de ora san sek gweꞌan.
¹⁵ Hen Kristen bose zemka de husus gwibirida gwenna, zen nwe-masena apdenak– zi ta gwen zi nibanye. Kirekam de egwe gwen zini, zen hen nama tin hip de ora san sek gweꞌan.
¹⁶ Yesus kim nesa dikim ngaya tabin hip Zenaka sosok taka, nen dekon zebe anakan dam ulsuk, “Kwasangna zen kirekam.” Zen in zep nen hen diki kirekam nen nenaka kwasang gwibirida gwen, hendep nen hen nen nere mae mo timni sosok gul gwen– aha zisi dikim ngaya ta gwibin hipye.
¹⁷ Hwena emki eenlala gwen: Zi de tahalha sremkam gweꞌanam, zen de anakan tame guꞌunam, “Ano Kristen bosena wakin tahalhakam gwe gwenda,” hwena zen de mas gweblan sremkam, dekam man tangan dam gwesinin, “Alap onakore kwasangna hom tangan zebon onakye.”
¹⁸ Ano walas, nen bap nen ek enkam Kristen bosyansa waba hap kwasang gwibirida gwen. Hwena nen diki eiwakam nen kwasang gwibirida gwen– dawemsa de goltrei gwizimdinkim.
¹⁹ Nen de kwasangsa kirekam goltrei gwizimdinkim, zen dekam zebe nenaka dam lasik gwibirin, “Nen an eiwa Bian Alap mo bi gwibiridan walas sake.” Sap eiwa kirekam, hwena nen kime Alapsa abe la gwenan, dekam zep hwena titik gwen enlalana enhonak anakan hata gwenda, “Ëe ba hap de Alapsa goltil seblan hap?” Hwena Alap Zen kitak zi mo enhona tame ta gwizimnira. Zep Zen man neno mae mo enhonak de titik gwen enlalana insa nep tame ta gwizimnira. Hwena Zen hom kire hap nesa husus gwibirida gwenda. Zen in zebe Alapsa de abe ta gwenkam nere mae mo enlalana anakan se la sone gwibirin, “Ëe an zere mo walas sake. Zep ee ba hap de titik gweblan hap?”
²⁰ (3:19)
²¹ Ano dang tininak de wenya, nen de Alapsa abe tan nakon titik gwen sremna, ki sap esa banakare mae hap saher sremkam abe la gwer.
²² Sap dekam anakane dam ulsuk gwenan, “Ëe ama zere mo ol san hen dwam gwibin sin ang gwe-gweꞌan.” Kirekam de enho nakon titik gwen sremkam abe tanna, dekam zebe ulin gwenan.
²³ An zen tangan zere mo ola– nen de desan ang ta gwen hap denaye: “Ano tanena Kristus Yesussu em taibliblan, hen enaka em kwasang gwibirida gwen.”
²⁴ Men zen kirekam Alap zere mo ol san enlala tatete naban ang ta gwenan, zen mes zere han neraha-en gwek, hen Zen mes deban mae goleaha-en gweka. Hen nebe mae hap mes zere mo Enhona ing ta sonezimki, nen in zebe anakan dam ulsuk gwenan, “Eiwa, Zen mes tangan neban mae goleaha-en gweka.”