Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Bije-bije tiang! Tiang tulis surat niki tipaq side pade adẽqde ndẽq piaq dose. Laguq lamun araq saq piaq dose, make ite bedowẽ sopoq perantare lẽq arepan Bapa, nike Deside Isa Almasih saq adil.

² Dait langan Ie, ite bau tedamẽang lẽman selapuq dose-dosente, dait ndẽqne umaq dose-dosente doang, laguq ẽndah umaq dose-dose seantẽro dunie.

³ Niki tandene bahwe ite kenal kance Allah, nike lamun ite taat lẽq prẽntah-prẽntah-Ne.

⁴ Dengan saq bebase, "Tiang kenal Allah," laguq ndẽq taat lẽq prẽntah-prẽntah-Ne, dengan nike penduste, dait kebenaran ndẽq araq lẽq dalem atẽne.

⁵ Laguq dengan saq taat lẽq Manik Allah, make kasih tipaq Allah sempurne gati lẽq dengan nike. Siq care nike ite nenaoq bahwe ite idup lẽq dalem Allah.

⁶ Sai-sai saq bebase bahwe ie idup lẽq dalem Allah, ie harus idup pade maraq care Almasih idup.

⁷ Semeton senamian saq tiang kasihin! Saq tiang tulis niki ndẽqne prẽntah saq baru. Niki prẽntah saq laẽq saq sampun tesampẽang ojok side sewaktu side baruq percaye lẽq Almasih. Nike Manik lẽman Allah saq sendẽqmanne sampun side pade dengah.

⁸ Timaqne maraq nike, prẽntah saq tiang tulis niki baru ẽndah. Sẽngaq kebenaranne nyate lẽq dalem Almasih dait lẽq diriq side pade. Sẽngaq peteng kenyeke telang dait cahaye saq kenaq mulai besinar.

⁹ Dengan saq bebase bahwe ie araq lẽq dalem cahaye laguq dengan nike masih meriq lẽq semetonne, make dengan nike masih araq lẽq dalem peteng jangke mangkin.

¹⁰ Dengan saq ngasihin semetonne, ie idup lẽq dalem cahaye, sehingge lẽq ie ndẽq araq hal-hal saq miaq dengan lain jari sesat.

¹¹ Laguq dengan saq meriq lẽq semetonne, ie araq lẽq dalem peteng. Ie idup lẽq dalem peteng, dait ndẽq nenaoq ojok mbẽ aningne, sẽngaq peteng nike miaq penentengne jari bute.

¹² Tiang nulis tipaq side, hai kanak-kanak, sẽngaq dosende sampun teampunin lantaran pesẽngan Almasih.

¹³ Tiang nulis tipaq side, hai bapaq-bapaq, sẽngaq side sampun kenal kance Ie saq sampun araq lẽman penembẽqne. Tiang nulis tipaq side, dengan-dengan bajang, sẽngaq side pade sampun ngalahang Si Jahat.

¹⁴ Tiang nulis tipaq side, hai kanak-kanak, sẽngaq side pade kenal kance Bapa. Tiang nulis tipaq side, hai bapaq-bapaq, sẽngaq side pade sampun kenal kance Ie, saq sampun araq lẽman penembẽqne. Tiang nulis tipaq side, hai dengan-dengan bajang, sẽngaq side pade kuat dait Manik Allah araq lẽq dalem atẽnde, dait side pade sampun ngalahang Si Jahat.

¹⁵ Ndaq side ngasihin dunie niki, atao napi juaq saq araq lẽq dalem dunie niki. Lamun side pade ngasihin dunie, make kasih tipaq Bapa ndẽq araq lẽq side pade.

¹⁶ Sẽngaq selapuq saq araq lẽq dalem dunie niki -- kemẽlẽq tabiat manusie dait saq temelẽtang siq penenteng dait kesombongan idup -- selapuqne nike hal-hal saq asalne ndẽqne lẽman Bapa, laguq lẽman dunie.

¹⁷ Dunie dait selapuq kemẽlẽqne kenyeke telang. Laguq dengan saq turut pekayunan Allah, tetep idup jangke selaẽq-laẽqne.

¹⁸ Bije-bije tiang, niki jaman ahir! Sendẽqmanne sampun tebadaq tipaq side bahwe penentang Almasih gen dateng; dait mangkin sampun araq luwẽq dengan saq nentang Almasih. Nike tandene bahwe ahir jaman sampun rapet.

¹⁹ Mule ie pade dengan-dengan saq asalne lẽman ite, laguq ie pade ndẽqne bagian lẽman ite, sẽngaq lamun ie pade lẽman ite, pasti ie pade tetep bareng-bareng kance ite. Laguq ie pade bilin ite, adẽqne nyate bahwe ie pade selapuq mule ndẽqne bagian lẽman ite.

²⁰ Laguq side pade sampun nerimaq paice lẽman saq Mahesuci, dait side pade selapuq sampun nenaoq.

²¹ Jari, tiang nulis niki tipaq side pade ndẽqne lantaran side pade ndẽq kenal kebenaran, laguq malahan lantaran side pade sampun kenal hal nike, dait side pade ẽndah nenaoq bahwe ndẽq araq duste saq asalne lẽman kebenaran.

²² Sai saq beduste nike? Saq beduste nike dengan saq nilas bahwe Deside Isa nike Almasih. Dengan nike penentang Almasih, ie ndẽq ngakuq Bapa dait Bije saq asalne lẽman Allah.

²³ Dengan saq ndẽq ngakuq Bije saq asalne lẽman Allah, artine ndẽq nerimaq Bapa ẽndah. Dait dengan saq ngakuq Bije saq asalne lẽman Allah, artine nerimaq Bapa ẽndah.

²⁴ Keranaq nike, berite saq sampun side pade dengah lẽman penembẽq, harus side pade jagaq pacu-pacu lẽq dalem atẽnde. Lamun berite nike side pade perhatiang pacu-pacu, side pade gen tetep idup lẽq dalem Bije saq asalne lẽman Allah dait Bapa.

²⁵ Dait hal niki saq tejanjiqang siq Almasih tipaq ite; idup sejati dait kekel.

²⁶ Tiang tulis niki tipaq side mengenai dengan-dengan saq kenyeke berusahe nyesatang side pade.

²⁷ Laguq mengenai side pade, Almasih sampun curahang Roh-Ne tipaq side pade. Dait sengonẽq Roh-Ne araq lẽq side pade, ndẽq perlu araq dengan lain ngajah side pade. Sẽngaq Roh-Ne ngajah side pade mengenai selapuq hal; dait napi saq Ie ajahang nike kenaq, ndẽqne duste. Keranaq nike, side pade harus taat lẽq napi saq teajahang siq Roh nike, dait side pade harus tetep idup lẽq dalem Almasih.

²⁸ Jari, bije-bije tiang, pade tetep idup lẽq dalem Almasih, adẽq ẽraq sewaktu Ie rauh, ite parek tipaq Almasih siq keyakinan saq pasti dait ndẽq nyeboq lantaran ilaq.

²⁹ Side pade sampun nenaoq bahwe Almasih nike kenaq. Keranaq nike side pade harus nenaoq ẽndah bahwe sebilang dengan saq idup menurut kebenaran, ie asalne lẽman Allah.

1 Yohanes

Video 1 Yohanes 2

Ikuti Kami:

KONTAK | PARTISIPASI | DONASI