Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ale kam tatogakku! Akugalai suratku ka tubumui néné, bulé tá nugalai kam jo. Tápoi ké ai peilé sia sigalai jo, ai ka sita sara sipasibebela sita, iaté Jesus Kristus simaadil; ititiddouaké te sita ka matat Ukkui.
2 Oto kalulut Jesus Kristus, appéakénangan jotta Taikamanua. Iageti tá sarat jotta iaapéaké, tápoi sangamberi jodda taikapolak leú et.
3 Ké mareddet sita ka surukat Taikamanua, nenda te toggaiat agaita nia Taikamanua.
4 Sia sipasikukua, "Kuagai nia Taikamanua," tápoi tá mareddet sia ka surukatnia, sipaboboko lé sia, bulat tá anai Taikamanua ka bagat paatuatnia.
5 Tápoi ka sia geti simareddet ka tiboiet Taikamanua, bulat mamuiné punununtut bagania ka tubut Taikamanua. Nia té toggaiat ai sita patatabbra ka tubut Taikamanua.
6 Kasei sipasikukua ai nia patatabbra ka tubut Taikamanua, buítá itut'aké enung puririmanuan Kristus.
7 Ale kam Sasarainamai simanuntut bagamai! Sisurat'akenenku néné ka tubumui, tá te surukat sibau. Néné geti iaté surukat siburú sisegéakenen ka tubumui taddanangan anumatonem kam baga ka tubut Kristus; iaté Katuareman Simaerú sibara ka Taikamanua siarepmui siboikí.
8 Tápoi kenanen kisedda, surukat sinurat'akenenku néné, sibau leú et; kalulut ituaagai pusisineseatnia, matotoilá ka tubut Kristus samba ka tubumui leú et ka kam. Aipoí ka sia pugep-geman memei tatatá, tápoi toro bulat sibulatnia, aian itataddaaké iputoro.
9 Oto sikua tubuna aian nia muririmanua ka bagat pató, tápoi ai peilé ipulalagaki sia baga sasarainania, oto ai peilé sia ka bagat pugep-geman teret kineneiget.
10 Sia sipukateki baga sasarainania, ai sia muririmanua ka pató, pat beri sara apa pá ka tubunia sibaraaké jodda sirimanua.
11 Ka sia geti sipulagaki baga sasarainania, ai sia mukukuddu ka pugep-geman. Ka gep-gep lé ipueenung, samba tá iagai kaipa pá ieei, kalulut gep-gep nenda poí tá iooi ipaitsó.
12 Akugalai suratku ka tubumui kam Tatogakku, aipoí atuappéakéan jomui kalulut Kristus.
13 Akugalai suratku ka tubumui alé kam Saukkui, kalulut anuagaian poí kam nia siturerere kababara ka panandaatnia peilé. Kugalai suratku néné ka tubumui kam Sibautubu, kalulut anukalaakéan kam nia Si Jo.
14 Akugalai suratku néné ka tubumui kam Tatogamai, anuagaian poí kam nia Ukkui Taikamanua. Akugalai suratku ka tubumui kam alé Saukkui, kalulut anuagaian poí kam Tiboiet siturerere kababara baranangan ka panandaatnia peilé. Akugalai suratku ka tubumui kam Sibautubu, aipoi bulat maron pupaatuananmui. Ai ka bagat paatuatmui tiboiet Taikamanua, samba anukalaakéan kam nia Si Jo.
15 Buí nupununtuki kam baga polak néné, elé aponia pá sibabara ka bagat polak néné. Ké ka tubut polak néné lé manuntu bagamui, oto táan te amanuntu bagamui ka tubut Ukkui Taikamanua.
16 Sangamberinia sibabara ka matat polak néné, iaté siobat bagat pubobot-bot akkulára sirimanua sijo, itsó lepá besíaké, samba umun'akenen, sangamberinia néné, tá te sibabara ka Ukkui, tápoi sibara ka polak lé.
17 Aipoí ka sia polak samba sangamberinia sibabara ka bagania, sipuoni kiddiyet bagadda sirimanua, aian lé nia tatatá. Tápoi ka sia geti situt'aké siobat bagat Taikamanua, riu-riu lé rapurimanua teret buru-burú.
18 Ale kam Tatogakku, aian te malelegre iaili kalepakat polak! Atukuangan ka tubumui ka panandaatnia, kaooira Saggak Kristus; samba kineneiget aian sia maiigi sipasisasaggangi Kristus. Nia té nenda toggaiat kalelegrenia iaili kalepakat polak néné.
19 Saggak Kristus iaté, sia sipasikakaddiuaké sita, aipoí kirénangan tá saladdouta sia néné. Ké saladdouta baí sia néné, riu-riu lé takuddu kam sambatta. Tápoi arakaddiuaké lé sita, bulé imakopé kolounia bulat beri sia sara ka talagadda bulat oniakenen saladdouta.
20 Tápoi anusilóan kam Ketsat Sipunenan siuruakenen Jesus Kristus, iaté lulunia nuaagai kam nia sangamberimui ngantoman bulat sibulatnia.
21 Oto akugalai suratku néné ka tubumui, tá te kalulut taiagaimui kolounia ngantoman bulat sibulatnia, tápoi kalulut kolou aagaimui nia lé, samba anuagaian leú et kam tatá nia pabokoat ka bagat ngantoman bulat sibulatnia néné.
22 Oniakenen sipaboboko geti, iaté sia sipasikukua tá Rimata Sipaarau nia ka sia Jesus sitonéakenen Taikamanua néné. Bulat Saggak Kristus te sia néné; tá raakui Ukkui sambat Toga.
23 Oto ké tá raakui Toga, sia néné, tá leú te rasisiló nia ka sia Ukkui. Tápoi ké raakui Toga, Ukkui ka sia leú et, rasisiló nia.
24 Kalulut néné, bulé nujago kam sipulelelek ka bagat paatuatmui sangamberinia katuareman siarepmui siboikí, taddanangan anumatonem kam baga ka tubut Tuhan Jesus. Aipoí ké baí nulelelek'aké kam nia sipulelelek katuareman néné, riu-riu patabbaratmui ka tubut Toga sambat ka tubut Ukkui.
25 Oto néné te sitonéakenen Kristus ka sita iaté: purimanuaiat sipulelelek samba sitaitatatá.
26 Akugalai suratku néné iaté, masikua ka matamui pagalaiat sia sigelai masipataju kam kineneiget.
27 Tápoi kam geti ka kam, aiuruakéan Kristus Ketsatnia ka tubumui. Oto kaburut ikuddu Ketsatnia ka tubumui, táan leú anai lulunia raoi sabagei rapangantru kam. Aipoí igegelaiaké kam Ketsatnia ka sangamberinia; samba sangamberi sigelaiakenennia bulat sineseat, tá pabokoat. Oto kau numareddet kam ka singantruakenen Ketsat ka tubumui, samba kau mariu-riu patabbaratmui ka tubut Kristus.
28 Kau imariu-riu nupatabbra kam ka tubut Kristus, alé kam tatogakku, bulé ké iaili tetrenia ioi, maró bagatta patuggut mata, tá mulilipput sita kalulut ailatta.
29 Anuagaian kam puririmanuania ka sia Kristus, siripot siobat bagat Taikamanua lé. Oto buítá nuagai kam, sangamberi sipupaparaboat siripot siobat bagat Taikamanua, iaté oniakenen tatogat Taikamanua.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA