Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O anak-anakku, ui ngayud ini kuan muyuh, pad muyuh na nganau' sala. Kudeng idé lemulun nganau' sala', idi tau inan seburur Lun Ngedengan luk idi pa kiung Taman, ieh ineh Yésus Keristus luk matu.
2 Keristus mangun ku baré pedo' ngaceku amung-amung sala' tau, baken ngaceku sala'-sala' tau mo', iamo' ngaceku amung-amung sala' uang tana' ini teh.
3 Kudeng tau maya' ukum-ukum Allah, tau kali' tau pangeh nengiti Neneh.
4 Idi lemulun luk pebala, "Ui miti Neneh," iamo' na maya' ukum-ukumNeh, idi ieh mangun ku lemulun luk mebalih, idi luk matu ineh na idi bang neneh.
5 Iamo' idé-idé luk maya' balaNeh, idi matu awa Allah uen ngeriput bang neneh. Dengan luk kudeng ineh tau kali' idi tau mulun bang Allah.
6 Lemulun luk mala bururneh mulun bang Allah, do' ieh mulun mepad kudeng Keristus.
7 O amung-amung luk inanku mawa, baken ukum luk mebaruh luk ui ngayud kuan muyuh, iamo' ukum luk mon luk pangeh ilap muyuh rat pun-pun. Idi ukum luk mon ineh, ieh ineh bala luk pindenger muyuh.
8 Iamo' ui ngayud ukum luk mebaruh kuan muyuh, idi luk kudeng ineh pangeh ginala' matu bang Keristus idi bang nemuyuh pana', ngaceku dacem ineh pangeh netutu', idi acang luk matu pangeh merasat.
9 Idé-idé luk mala bururneh bang acang, iamo' ieh megateh inan kinanakneh, ieh ineh bang dacem pad macing nekini.
10 Idi lemulun luk mawa inan kinanakneh ineh, ieh tudo bang acang, idi bang lemulun ineh na luk idi anun-anun luk ngeraruh kinanakneh.
11 Iamo' lemulun luk megateh inan kinanakneh, ieh ineh bang dacem idi nalan bang dacem, idi na kali' su ulekneh, ngaceku matehneh pangeh inau' mebuser ngaceku ratnan dacem ineh.
12 O anak-anakku, ui ngayud kuan muyuh, ngaceku muyuh pangeh nengalap do' ratnan sala' ngaceku ngadan Keristus.
13 O amung-amung taman, ui ngayud kuan muyuh ngaceku muyuh pangeh nengiti Neneh luk idi rat pun-pun. O amung-amung lun anak adi', ui ngayud kuan muyuh ngaceku muyuh pangeh nengelaya' Luk Dat ineh.
14 O amung-amung anakku, ui pangeh nengayud kuan muyuh, ngaceku muyuh pangeh nengiti Taman ineh. O amung-amung taman, ui pangeh nengayud kuan muyuh, ngaceku muyuh pangeh nengiti Neneh luk idi rat pun-pun. O amung-amung lun anak adi', ui pangeh nengayud kuan muyuh ngaceku muyuh metueh, idi bala Allah ineh tudo bang nemuyuh, idi muyuh nengelaya' Luk Dat ineh.
15 Aleg muyuh mawa ku tana', idi amung-amung uangneh teh. Kudeng idé lemulun mawa ku tana', idi awa Taman ineh na idi bang neneh.
16 Amung-amung luk inan bang tana', ieh ineh lili burur, lili mateh, idi ulun luk dengan dita' niat ineh, baken ratnan Taman, iamo' ratnan tana' ini.
17 Tana' ini miak metutu', kudeng ineh teh lilineh; iamo' ieh luk maya' pian Allah mulun ruked-ruked.
18 O anak-anakku, ini kareb luk kekiped. Mepad kudeng luk pangeh pindenger muyuh idi Bunu' Keristus sikal macing teh, idi nekini pana' inan mula' bunu' Keristus. Ratnan luk kudeng ineh tau kali' idi ini kareb luk kekiped.
19 Lemulun ineh pangeh neremuat rat arang tau, ngaceku baken ideh rat netau; ngaceku kudeng ideh rat netau, kali' rungen ideh na miak na lutep pad-pad dengan tau. Iamo' ideh pangeh neremuat, pad megala' ratnan pundeh baken rat netau.
20 Iamo' muyuh pangeh inumau ku Roh Meligan ineh, idi muyuh kali' luk amung-amung.
21 Baken ui ngayud kuan muyuh ngaceku muyuh na kali' luk matu, iamo' ngaceku muyuh kali' ineh, idi ngaceku muyuh kali' na luk idi balih luk remuat ratnan luk matu.
22 Idéké lun mebalih ineh? Ieh ineh lemulun luk pebala, Yésus ineh baken Keristus. Idi lemulun luk ngarung Taman idi Anak ineh, ieh ineh luk bunu' Keristus.
23 Idé-idé luk ngarung Anak, kali' rungen na luk idi Taman bang neneh. Idi lemulun luk ngamo Anak ineh, kali' rungen Taman ineh pana' idi bang neneh.
24 Matar do'-do', pad anun-anun luk pangeh pindenger muyuh rat pun-pun, lutep bang nemuyuh. Kudeng luk pangeh pindenger muyuh rat pun-pun lutep bang nemuyuh, idi muyuh pana' miak lutep bang Anak idi Taman ineh pana'.
25 Idi luk pijani' Keristus kuan tau, ieh ineh ulun luk meruked.
26 Ui ngayud surat ini kuan muyuh ratnan lemulun luk sikal naluk nemuyuh.
27 Idi kuan muyuh ini, Keristus pangeh nengutang RohNeh luun muyuh. Seruked RohNeh idi bang nemuyuh, idi na ulek muyuh badén seburur lemulun peh. Ngaceku RohNeh ineh mada' nemuyuh ratnan luk amung-amung, idi luk badénNeh ineh matu idi na mebalih. Ngaceku ineh do' muyuh maya' bada' Roh ineh, idi do' muyuh lutep bang Keristus.
28 Nekini, O anak-anakku, do' muyuh lutep bang Keristus, pad tau mepanu' ku kuu' kareb Ieh megala' teh, idi na sigapung ku igu' kareb Aco acingNeh.
29 Muyuh kali' Keristus ineh matu. Ngaceku ineh, petulu muyuh kali' idi anid-anid burur lemulun luk nganau' luk matu, ieh ineh anak Allah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA