¹ Ola an eiwa de tanganna: “Men nara Kristen zisi de nol gwibiridan hap dwam gwenna, zen sap syala dawem naka dwam gwibiꞌira.”
² Hwena zen diki enho kles gwesin srem naka de dam tasinkim. We dan son zisi bejen. Zen diki aha zi de blikip gwesiblin naka, hen enlala tatete naka, hen zenaka de zerinik gwe-gwen naka, hen zisi de lup gulin gwen naka, hen zisi de Alap mo olkam tawa ta gwibin nika.
³ Hen Kristen zisi de nol gwibiridan hap, ho mamak otde gwen soson zini bejen. Darak soson zini hen bejen. Zen diki enlala sae-sae naka, hen umlae enlala naka. Hen te-ala hap de hole-hle gwe-gwen zisi bejen dam tasin.
⁴ Zen diki we wal walas zemka de dawemkam kara ta gwibin nika, hen walas zemka de dawemkam titi ta gwibin nika– zen dikim zenaka i-san i-san gwe-gweblan hap hen blikip gwesik gweblan hap.
⁵ Sap zi de dawemkam we wal walas zemka nol gwibiridan sremna, kire zini bejen dawemkam Kristen bose zemka nol gwibiridan.
⁶ Ner hom de Kristen gwen zini hen bejen. Ki hwena sa anakan bolte-bolte gwera, “Ëe an mamna.” Dowal mo kigina in kirekam bolte-bolte gwekake, zen in zep Alap hep tyaka.
⁷ Zen diki kitak de zi de sam gwesiblin naka, sap hen Kristen srem zi zen sam gwesiblin. Hwena sam gwesiblin sremkam, zen sa dowal mo kigi mo zolak kyan hera. Ki hwena ahakore nik sa swre dal.
⁸ Kristen zi mo tahasa de tri so gwizimdin hip de zini hen kirekam. Zen hen diki tingare zi mo sam gwesiblin naka em dam tasik gwibin. Mahal dare syakna bejen. Hen ho mamak otde gwen soson zisi bejen. Hen te-alasa dikim gul irin hip de boton gwe-gwen zisi bejen.
⁹ Zen diki engaya gwen hap de ol dawemna mensa Alap nep hil gilzimki, desa zen enho lalakkam gwirensin hen taiblibin.
¹⁰ Kristen zi mo tahasa de tri so gwizimdin hip de zini na-en bahem totoresa dam tasik gwibin. Diki nonol em akasibirida gwen. Mensa hla tanna, “An airis,” dekam sap esa dam lasik gwibir.
¹¹ We walkam dena, Kristen zi mo tahasa de tri so gwizimdin hip de dam gulsunnu, zen hen diki tingare zi mo sam gwesibin nika em dam tasik gwibin. Boton ol gol halasen gwenna bahem. Zen diki enlala tatete naka hen taiblibin nika.
¹² An ahana Kristen zi mo tahasa de tri so gwizimdin hip de zi hip dena: Zen hen we dan son zisi bejen. Zen hen diki we wal walas zemka de dawemkam kara ta gwibin nika de dam tasibin.
¹³ Zen de dawemkam Alap mo syalak mas gwibirida gwenkam, zen dekam sa desa hen blikip neisibirida gwer. Hen dekam sa Kristus hup dena udobe naban donbirida gwer, hen dekam molya nasalsibirida gwek.
¹⁴ Timotius Bak, suratna an ama ki sap ep ale gulbluꞌan, hwena ee ama tangan dwam gweꞌan– nabakam de sap emsa duweblazan hap.
¹⁵ Hwena ee de holo gwenkam, zen suratna ansa de karatda gunkum esa anakan tame gulu, “ËKristen gwen aya-wal oso-walya, zen diki kirekam de lowehe gwek.” Sap Ngaya Zini Alap mes eiwa de ola nebe mae hap hil gilzimki. Zep auhu-kamanak de jematna, zen men kiye– gol tenya hen gol mokona, ola insa de zen moko gun hup.
¹⁶ Eiwa, ol aning gunnu mensa Alap nep hil gilzimki, zen dawem tangaranna. Ola in nen dikim Alap hon etal gwesin hip dena. Zeno ausuna, zen kitak Kristus Yesus onak lwaꞌan: Zen zi timkim nwe-mase gwe zaka, Alap mo Enhona man nep Desa anakan zertreizimki, “An eiwa Zen tangan.” Alap mo dam taha nakore zini man hen kara da nasen gwek. Hwena ki zep Alap zere mo ngatannak dep zer ine halka. Zebe hap dena zi-e zi-e san mes nol haladak, hen Desa de taibliblan zini tingare langnak ki lowehen daꞌan.