¹ Aumwa hap ee anakane eenlala gwek, “Ëe banakan asa egwer– Tesalonikasa de amjanbin sremkamye?” Dekam zebe ola anakan aha-en uk, “Timotius em neik song gwe. Ëe Silas han ena Atenak asa er.” Dekam zep hendep nere mae mo osona in emsa amjanbir zika. Zen hen Alap mo nganak de syal gwe-gwen zi– Kristus hup de ol dawemsa de gol halada gwen hap dena. Ëe mae habe er sonek– zen de emsa Yesussu de taibliblannak de tatem ezauk gwen hap dena kim titi ta gwibin hip.
² (3:1)
³ Ëe mae habe emsa ngalap eibiridaꞌak, “Yesussu de taibliblan nakon mana etan lwanda halank, sap nesa man angkam karek da gwibiꞌin.” Ena tawana: Nesa de kirekam karek ta gwibin hip dena mes ki Alap mo kalang gwe gunnuk lwak.
⁴ Sap men kime apdekam lowehe gwek, ee hen mese dekam kirekam emsa enbirida gwek, “Nesa sa karek da gwibir.” Hen ena tawana: Zen mes ki hendep kirekam lwak.
⁵ Zep ee Paulus, ee home enlala nakon emsa sewe hebirida gwek, zen in zebe hendep Timotiussu ebon mae osan dep zer sonek– dekam de emsa tawa gwibiridan hap, “San ha nama Kristussu de taibliblannak tatem ezauꞌun?” Ëe ama emsa anakan ngalap gwibiridak, “Men zen nesa goleliwenda gwenda, san ha zen mes aha ora san dep sil tibir halka? Ki ee waba habe dan-sin niban syal eibirida gwek.”
⁶ Hwena Timotius mes ner hom ebon mae onakon lwahal zaka, hen zen mes ebe mae hap de ola isrip-sri gwibin tangan naka asa anakan tonzim zika, “Zen nama Yesussu de taibliblannak tatem ezauk gweꞌan, hen zenaka man kwasang neibirida gwenan. Hen zen nama nesa zolan-zolan neibirida gwenan, hen nesa de etan goletowen hap enlwan neibirida gwenan– nen men kirekame hen desa de hlauludan hap eenlwan gwe-gwenanke.”
⁷ In zep, aya-wal oso-wal, ee kime kirekam Silas han sane ek, ee dekam zebe enlalana oto eisik. Zep angkam ee sap asa karekna oltowe gwer, hen zini sap sa asa karek da gwibir. Hwena em de nama Yesussu de taibliblannak tatem ezauk gwenkam, ee ama tangan esam gwesiꞌin.
⁸ Zep angkam enlala nakon mese tangan eseweher, sap em namae Bian Yesus onak tatem ezauꞌun.
⁹ Zep ee kime Alapsa en sone gweblanan, isrip-srina ebon mae onakon zebe serkam eis gwibirin. Ëe zebe Alapsa isrip-sri ebla tine gwenan.
¹⁰ Zebe hen enlala zon tasiblin naban kam denaban yaklam denaban abe la tine gwenan– dekam de eban mae etan goletowen hap, hen dekam de etan emsa dawem enkam Yesussu dikim taibliblan hap denakim titi ta gwibin hip.
¹¹ Diki Eirzi-Bia Zen sa orana abe mae hap kles yasizimdi– emsa dikim amjanbiridan hap denaye. Ëe zebe anakan Biansa abe la tine gwenan,
¹² “Bian men kirekam Ena Tesalonikak de zi hip de kwasangna ano mae mo enhonak dohonse gul gwizimki, Emki kirekam etan zeno mae mo enhonak syal gwe-gwen– zen dekakim zenaka dawemkam kwasang neibirida gwek, hen eKristen srem zi hip dekakim hen kwasangsa noltrei gwizimk.
¹³ Bian, zeno mae mo enhosa emki tatete ta gwizimdin– zen dekakim enlala kles gwesin sremkam hen enho lalakkam lowehe gwek, hen zen dekakim ano mae mo Teipsinni Yesussu dawemkam nertowek, Zen de ngatan zi mo lang nakon zewe de wenya ban golelwan dahal zannak.”