Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi dob sayur matua si Samuel, ipabangkit ma anakni ai manguhumi halak Israel.
2 Ia goran ni anak sikahananni si Joel do, anjaha goranni na paduahon ai si Abia do, i Berseba do sidea panguhum.
3 Tapi seng iirikkon anakni ai dalan ni bapani, tapi impolan do sidea bani pirak; ra do sidea manjalo sisip laho papeolhon uhum.
4 Jadi martumpu ma ganup pangintuai ni halak Israel hu bani si Samuel i Rama,
5 nini sidea ma hu bani, “Tonggor ma, domma sayur matua ham, tapi anggo anakmu seng dong iirikkon sidea dalanmu; on pe pabangkit ham ma bennami sada raja, ase ia manrajai hanami songon na bani ganup bangsa sipajuh begu-begu.”
6 Tapi sogam do uhur ni si Samuel bani hata na hinatahon ni sidea ai, “Bere ham ma bennami raja, ase ia manrajai hanami.” Jadi martonggo ma si Samuel hu bani Jahowa.
7 Jadi nini Jahowa ma dompak si Samuel, “Tangihon ma sora ni bangsa in pasal haganup na hinatahonni ai bam, ai sedo ho, Ahu do na niambungkon ni sidea ijai, ase ulang Ahu be raja bani sidea.
8 Romban hu bani haganup pambahenan na binahen ni sidea singgan ni na Huarahkon sidea luar hun tanoh Masir ronsi sadari on, itangihon sidea do Ahu laho mambalosi naibata na legan, sonai do homa ibahen sidea hubam.
9 On pe tangihon ma sora ni sidea ai, asal ma pangkei isaksihon anjaha ipasingatkon ho uhum ni raja na sihol manggomgomi sidea.”
10 Jadi ipadas si Samuel ma ganup hata ni Jahowa hu bani bangsa ai, na mangindo raja hun bani.
11 Nini ma, “On ma uhum ni raja na sihol manggomgomi nasiam: Buatonni do anak nasiam anjaha bahenonni ma sidea gabe pargareta pakon parhudani, ase marlintun sidea i lobei ni garetani.
12 Anjaha bahenonni ma sidea kopala ni marsasaribu, pakon kopala ni marlima-lima puluh, anjaha deba maninggala jumani pakon manabi sisabionni; manukangi parugas hu parporangan ampa parugas ni garetani.
13 Buatonni ma pakon boru nasiam laho manggiling minak na morum, barang pardahan barang parmasak.
14 Buatonni ma juma nasiam pakon anggur nasiam ampa hayu jetun nasiam, sagala sidearan, anjaha berehononni ma ai hu bani juakjuakni.
15 Buatonni ma parsapuluhan ni gandum nasiam pakon pohon anggur nasiam, anjaha berehononni ma ai hu bani juakjuakni pakon suruh-suruhanni.
16 Buatonni ma homa jabolon nasiam dalahi pakon jabolon nasiam naboru, sonai homa lombu pakon halode nasiam, sagala sidearan laho mamakei ai bani horjani.
17 Buatonni ma parsapuluhan ni biri-biri nasiam, anjaha gabe jabolonni ma nasiam.
18 Jadi bani ari ai mandoruhi ma nasiam halani raja nasiam ai, na pinilih nasiam bani nasiam; tapi seng balosan ni Jahowa nasiam bani ari ai.”
19 Tapi manjua do bangsa ai manangihon sora ni si Samuel, nini sidea ma, “Lang! Maningon adong do sada raja bennami,
20 ase dos hanami songon haganup bangsa sipajuh-begu-begu, ase rajanami ai ma, na maruhum bennami anjaha mambobahon hanami hu parmunsuhan.”
21 Ase dob ibogei si Samuel ganup hata ni bangsa ai, ipatugah ma ai hu bani Jahowa.
22 Jadi nini Jahowa ma dompak si Samuel, “Tangihon ma sora ni sidea ai, anjaha pabangkit ma bani sidea sada raja.” Dob ai nini si Samuel ma dompak halak Israel, “Laho ma nasiam ganup hu hutani bei.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA