Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saellana seppo, Samuwel ngangkat tra-pottrana epadaddi hakim e Isra’il.
2 Pottrana se sareyang nyamana Yowël ban se nomer dhuwa’ nyamana Abiya. Se kadhuwa jareya daddi hakim e Bersyeba.
3 Tape se kadhuwa jareya ta’ nero eppa’na; pera’ nyare kaontongan malolo. Daddi narema go’-sogo’ ban ta’ adil mon motose parkara.
4 Daddi para pamimpinna ommat Isra’il padha akompol kabbi, pas ngadhep ka Samuwel e Rama,
5 oca’na reng-oreng jareya, "Pa’, panjennengngan ampon seppo, tra-pottrana panjennengngan ta’ padha sareng panjennengngan. Daddi langkong sae ngereng panjennengngan mele rato sopaja bangsa abdina gadhuwan rato jugan kadi sa-bangsa laenna."
6 Tape Samuwel ta’ senneng meyarsa parmenta’anna reng-oreng jareya, daddi pas adu’a ka PANGERAN.
7 PANGERAN adhabu. "Torodi karebba bangsa Isra’il jareya. Sabab sanyatana banne ba’na se etolak bi’ reng-oreng jareya, tape Sengko’. Reng-oreng jareya ta’ endha’ ngako rato pole ka Sengko’.
8 Molae bi’ Sengko’ epakalowar dhari nagara Messer, reng-oreng jareya la ta’ endha’ ngabas ka Sengko’ sarta nyemba ka ba-diba, ban sateya apa se elakowagi reng-oreng jareya ka ba’na, jareya se elakowagi reng-oreng jareya ka Sengko’.
9 Daddi la torodi karebba reng-oreng jareya; tape paenga’ gu-onggu ka reng-oreng jareya, ban balai baramma carana to-rato jareya e budhi are ngadhebbi reng-oreng jareya."
10 Apa se edhabuwagi PANGERAN jareya bi’ Samuwel epanapa’ kabbi ka ommat Isra’il se menta rato jareya.
11 "Kantha reya carana ratona ba’na ngadhebbi ba’na e budhi are," Samuwel nerrangngagi ka reng-oreng jareya. "Na’-ana’na ba’na bakal epaksa’a daddi tantara; badha se epadaddi pasukan se nompa’ kareta, badha se epadaddi pasukan se nompa’ jaran, ban badha pole se epadaddi pasukan se ajalan soko.
12 Badha se epadaddi parwira se ngoros oreng saebu, badha se epangoros oreng saeket. Ana’ lalake’anna ba’na bakal epaksa’a ananggala ba-sabana, anye hasella sabana, ban agabayyagi sanjatana ban pakakassa kareta perrangnga.
13 Ana’ babine’anna ba’na bakal esorowa agabayyagi mennya’ ro’omma, ekagabay tokang massa’na ban tokang rotina.
14 Gal-teggalla ba’na se paleng bagus bakal ekala’a pas ebagi ka ba-ponggabana, bariya keya kebbun anggurra ban kebbun jaitunna ba’na.
15 Ba’na bakal ewajibbagiya majar pajek aropa saparpolonna hasella teggalla ban kebbun anggurra, pajek jareya bakal ebagiya ka ra-parwirana ban ka ba-ponggabana.
16 Rato jareya bakal ngala’a nor-dunorra ban ebinna ba’na se paleng bagus, bariya keya mar-hemarra; jareya kabbi bakal epalakowa kaangguy kaparlowanna dibi’.
17 Saparpolonna bannya’na embi’ ban dumbana ba’na bakal ekala’a. Ban ba’na dibi’ bakal epadaddiya dunorra.
18 Mon bakto jareya la napa’, ba’na kabbi bakal aserrowana mekkere ratona se la epele ba’na dibi’ jareya, tape PANGERAN ta’ kera meyarsa’agi serrona ba’na pole."
19 Tape bangsa Isra’il jareya ta’ parduli ka dhabuna Samuwel, la’-mala’ ngoca’ kantha reya, "Diggal! Sanajjan kadi ponapa’a, abdina sadaja terro gadhuwana rato,
20 sopaja bangsa abdina padha’a sareng bangsa laen, eparenta rato sareng ekapalae rato e dhalem paperrangan."
21 Saellana meyarsa sakabbinna oca’na reng-oreng jareya, Samuwel pas matorragi jareya kabbi ka PANGERAN.
22 Dhabuna PANGERAN, "Torodi karebba reng-oreng jareya, berri’i rato." Samuwel pas nyoro reng-oreng jareya kabbi sopaja mole ka bengkona bang-sebang.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA