Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Asum Samuel nggo metua iangkatna anakna jadi hakim i Israel.
2 Anakna sintua Joel gelarna, janah agina Abia, duana hakim i Berseba.
3 Tapi la iusihna lagu langkah bapana. Duit saja ngenca atena, emaka ialokenna uang sogok janah iputuskenna perkara kalak alu la bujur.
4 Emaka pulung kerina peminpin Israel lawes ndahi Samuel i Rama,
5 janah ikatakenna man bana nina, "Kam nggo metua janah anakndu la ngusih lagu langkahndu. Dage angkatlah sekalak raja si merentah kami gelah lit raja kami bagi bangsa-bangsa si deban."
6 Sabap kalak enda mindo sekalak raja la mehuli iakap Samuel. Emaka ertoto ia man TUHAN.
7 Jenari nina TUHAN, "Begikenlah kai si ikataken bangsa e man bandu. Si tuhuna labo kam si nggo itulakna e. Aku nge si itulakna selaku rajana.
8 Mulai kin Kubaba ndarat i Mesir nari nggo itadingkenna Aku jenari isembahna dibata-dibata si deban; janah genduari sangana ibahanna man bandu kai si gelgel e nggo rusur ibahanna man bangKu.
9 Dage, begikenlah ia tapi persingeti lebe alu tangkas janah terangken man bana uga pagi pengelakoken raja-raja man bana."
10 Ituriken Samuel man bangsa si sangana mindo raja man bana e, kai si ikataken TUHAN man bana.
11 "Bagenda me pagi pengelakoken rajandu man bandu," nina Samuel nerangkenca. "Anakndu si dilaki ibahanna pagi jadi tentera; deba ertugas i bas gereta perangna, deba i bas tentera si erkuda, janah deba kiam arah lebe geretana.
12 Deba pagi jadi kepala si ertugas ngawasi 1.000 kalak, janah si deban ngawasi lima puluh kalak. Anakndu arus nenggalai jumana, peranisa, ras erbahan senjata bage pe perkakas man geretana.
13 Anakndu si diberu arus erbahan minak wangi man bana ras jadi si erdakanna ras si erbahan rotina.
14 Ibuatna pagi jumanndu, kebun anggurndu, ras kebun saitunndu si mehulina, jenari iberekenna man pegawai-pegawaina.
15 Perpuluhen i bas ulih gandumndu ras buah anggurndu nari ibuatna man pegawai istanana ras pegawai sideban.
16 Ibuatna budakndu, lembundu ras kaldendu si mehulina, jenari ipakena erdahin guna ia.
17 I bas asuh-asuhenndu nari ibuatna sepersepuluhna. Janah kam pe jadi budakna pagi.
18 Sanga si e pagi la banci la mesangat kam jungut-jungut perban raja si ipilihndu tapi TUHAN la nggit megiken jungut-jungutndu e."
19 Tapi la diate bangsa e kai si ikataken Samuel nina, "Lang! Merincuh kami sekalak raja,
20 gelah kami nggo seri ras bangsa-bangsa si deban, i ja raja kami jine si merentah kami ras si naruhken kami erperang ras si minpin kami i bas pertempuren."
21 Ibegiken Samuel kai si ikataken janah kenca e lawes ia, iturikenna man TUHAN.
22 Ngaloi TUHAN nina, "Bahanlah bagi sura-surana janah berekenlah bana sekalak raja." Kenca bage isuruh Samuel kerina kalak Israel mulih ku kutana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA