Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Narapiki tuju bulang sallona ammantang ri Filistin anjo Patti ParjanjianNa Batara,

² nakio’mi tu Filistin sikamma imanna siagang sanro-sanro porea nampa akkuta’nang angkana, "Laniapami anjo Patti Parjanjianga? Punna nipoterangi mange ri tampa’na, antekamma carana?"

³ Appialimi ke’nanga angkana, "Anjo Patti ParjanjianNa Allata’alana Israel, teako poterang bawangngi, mingka musti nipirurungi hadia untu’ antangkasi dosa-dosanu. Lalang kammana anjo nulanipakabaji’ battu ri garrinnu, siagang lanuassemmi angkanaya apa saba’na natuli Nahukkungko Allata’alana Israel."

⁴ "Apami musti nipassareang mae ri Ia?" Kammaminjo pakkuta’nanna taua. Appialimi sikamma anjo imanga angkana, "Lima kambussulu’ bulaeng siagang lima balao bulaeng, situru’ bilanna sikamma karaenga ri Filistin. Sai anjo bala antabayako akkambu’-kambussuluki siagang sangkammai balao tanja’na, baji’ nara’yaka kammayatompa karaenga?

⁵ Jari, musti apparekko bulaeng sanrapang kambussuluka siagang balao ampanrasu-rasua ri pa’rasangannu. Lalang kammana anjo nupakala’biri’mi Allata’alana Israel. Lammarimi kapang anghukkungko siagang rewata-rewatanu kammayatompa pa’rasangannu.

⁶ Apa matu-matunnu ampatterassangi ulunnu sangkamma karaeng Mesir riolo? Teako kaluppai antekamma bateNa Allata’ala ampare’ karek-karenangi ke’nanga, sa’genna jarra ke’nanga, nampa Nalappassang anjo tu Israel ambokoi Mesir.

⁷ Lanri kammana, appasadia mako se’re karoba beru siagang ruang kayu sapi appasusua, ia tenayapa nale’ba’ nipake a’beso’ karoba. Patabami anjo sapi ruaya mae ri karobaya, nampa nubongka ammotere’ ana’-ana’na anjo sapia antama’ ri barana.

⁸ Nampa, allemi anjo Patti ParjanjianNa Batara, panaiki ri anjo karobaya, nampa nupadongko’ ri sa’rinna patti niaka bulaeng lalang, ia mustia nupassareang ri Ia untu’ antangkasi dosanu. Lappassammi anjo karobaya siagang sapia a’jappa kale-kale.

⁹ Parhatikangi jappana; punna anjo Patti Parjanjianga nierang mangei ri pa’rasangang kalenna, iamintu kota Bet-Semes, battuanna Allata’alana tojeng tu Israel ampabattui anjo kacilakang lompoa mae ri katte. Mingka punna tena na’lampa mange anjoreng anjo karobaya, laniassemmi angkanaya anjo balaya teai bala battu ri Allata’alana tu Israel, passangalinna kabutulanji bawang."

¹⁰ Amminawang turu’ ngasemmi anjo taua. Angngallemi ke’nanga ruang kayu sapi appasusua, nampa napataba mae ri karobaya; na ana’-ana’na anjo sapia nakurungi lalang ri baraya.

¹¹ Nampa napanai’ anjo Patti Parjanjianga ri karobaya, kammayatompa patti niaka lalang bulaeng akkambussulu’ siagang bulaeng balao.

¹² Ajappami anjo sapi-sapia tulusu’ mange ri Bet-Semes. A’jappa turusmi anjo sapia, tena le’bakai a’lili mae ri kanang yareka mae ri kairi battu ri agang lompoa. Amminawang turusmi anjo limaya karaeng ri Filistin sa’genna narapi’ pa’baeng-baenna Bet-Semes.

¹³ Anjo wattua sitabangi wattu akkatto gandung taua ri Bet-Semes ri lapparaka. Ri wattu nacini’na ke’nanga anjo Patti Parjanjianga naruppaimi ke’nanga siagang rannu pa’mai’na.

¹⁴ Ammantangi anjo karobaya ri ampi’na se’reang batu lompo ri kokonna Yosua, sitau pandudu’ ri Bet-Semes. Nabisa’-bisa’mi pandudu’na kotaya anjo kayuna karobaya, nampa napolong anjo ruang kayua sapi untu’ assare koro’bang mae ri Batara.

¹⁵ Nampa napanaung tu Lewia anjo Patti Parjanjianga siagang anjo patti niaka bulaeng lalang, nampa napadongko’ ri anjo batu lompoa. Le’baki anjo assaremi pandudu’ ri Bet-Semes iamintu koro’bang nitunu siagang koro’bang maraengannaya mae ri Batara.

¹⁶ Ri wattu nacini’na limaya karaeng Filistin yangasenna anjo, ammotere’mi ke’nanga mange ri Ekron, ia memang anjo alloa.

¹⁷ Kammaminjo nale’ba’mo appikatu tu Filistin mae ri Batara, iamintu passare untu’ antangkasi dosana ke’nanga pandudu’ limaya kota, niparentaya ri lima karaeng Filistin. Anjo kota-kotaya iamintu: Asdod, Gaza, Askelon, Gat, siagang Ekron. Anjo kotaya nia’ ammake tembo’ pannahang musu, nia’ todong tena. Massing-massingi anjo kotaya appikatu se’re kambussulu’ bulaeng siagang se’re bulaeng balao. Buttina anjo kajarianga, iamintu batu lompo tampa’na ke’nanga ampadongkoki Patti ParjanjianNa Batara. Manna sa’genna kamma-kamma anne tuli nia’ iji anjo batua ri kokonna Yosua, anjo tu Bet-Semes.

¹⁸ (6:17)

¹⁹ Mingka lanri attoa’na siapa are tau ri Bet-Semes antama’ ri anjo Patti Parjanjianga, nia’mo tujupulo tau ri ke’nanga mate nibuno ri Batara. Nampa natujumo susa ke’nanga nasaba’ nipitujui ke’nanga ri Batara bala lompo.

²⁰ Nampa nakanamo panduduka ri Bet-Semes, "Inai akkulle attahang ri dallekanNa Batara, Allata’ala Matangkasaka? Kemaei akkulle niantara’ anne Pattia sollanna bella battu ri katte?"

²¹ Akkirimmi tau ke’nanga mange ri pandudu’na Kiryat-Yearim nanapasang angkana, "Le’ba’mi napoterang tu Filistin Patti ParjanjianNa Batara. Battu mako mae siagang erammi anjo pattia mae ri tampa’nu."

1 Samuel

Video 1 Samuel 6

Ikuti Kami:

KONTAK | PARTISIPASI | DONASI