Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Saellana pettong bulan abidda Petthe Parjanjiyan jareya badha e Filistin,

² oreng Filistin pas ngolok mam-imamma sarta kang-tokang seher, pas atanya, "Epakadi ponapa’a Petthe Parjanjiyanna PANGERAN paneka? Manabi epabaliya ka kennengngan se asal, kadi ponapa carana?"

³ Saodda mam-imam ban kang-tokang seher jareya, "Petthe Parjanjiyanna Allahna Isra’il jareya ja’ gun pera’ pabali malolo, kodu etoro’e tor-ator menangka tebbusanna dusana ba’na. Kalaban cara se kantha jareya ba’na tanto pas baras, ban ba’na bakal taowa arapa Allahna Isra’il me’ ros-terrosan apareng okoman ka ba’na."

⁴ "Tor-ator ponapa se ebadhiya panebbussa dusa gapaneka?" ca’na reng-oreng jareya. Saodda mam-imam gella’, "Dun-babudunan dhari emmas lema meggi’ ban kos-tekosan emmas lema meggi’ keya, padha ban bannya’na rato Filistin. Sabab ba’na kabbi, ra’yat ban ratona, padha ekenneng balai, katebanan panyaket bu-tombu ban tekos.

⁵ Daddi, ba’na kodu agabay terowanna bu-tombu ban tekos se teppa’na nyeksa reng-oreng e nagarana ba’na reya. Kalaban cara se kantha jareya ba’na ahormadi Allahna Isra’il. Pola Allahna Isra’il jareya pas ambu se ngokom ba’na, ba-diba ban nagarana ba’na.

⁶ Apa gunana ba’na macengkal akantha rato ban reng-oreng Messer lamba’? Ja’ kaloppae baramma carana rato ban reng-oreng Messer jareya bi’ Allah ekagabay en-maenan sampe’ dhi-budhina oreng Isra’il epanneng ondur dhari Messer.

⁷ Daddi, mara sadhiya’agi jikar se gi’ anyar ban sape dhadhuwa’; sape jareya kodu se gi’ nyosowe ban se gi’ ta’ tao epanarek jikar. Sape jareya pasang ka jikarra, budhu’na pabali ka kandhangnga.

⁸ Saellana jareya, Petthe Parjanjiyanna PANGERAN jareya kala’, saba’ e jikar jareya, kothak se aesse rang-barang dhari emmas se egabaya tor-ator ka Pangeran menangka tebbusanna dusana ba’na saba’ e seddi’na Petthe jareya. Sape ban jikar jareya dina me’ olle ajalan dibi’.

⁹ Abassagi ajalan dha’ emma jikar jareya; mon Petthe Parjanjiyan jareya egiba ka nagarana dibi’, iya areya ka kottha Bet-Semes, jareya artena Allahna Isra’il se madhateng calaka’ se nako’e reya. Tape mon jikar jareya ta’ nojju ka kottha jareya, balai reya banne dhari Allahna Isra’il asalla, coma kabendherran."

¹⁰ Petodu jareya etoro’ kabbi bi’ reng-oreng Filistin; reng-oreng jareya ngala’ sape se gi’ nyosowe dhadhuwa’, epasang ka jikar, dhu’-budhu’na epamaso’ ka kandhangnga.

¹¹ Petthe Parjanjiyanna epaongga ka jikarra, bariya keya kothak se aesse dun-babudunan emmas ban kos-tekosan emmas.

¹² Sape se dhadhuwa’ jareya terros ajalan nojju ka Bet-Semes, ta’ luk-bilugan sakale. Sambi ajalan sape jareya amonye terros. Rato Filistin se kalema terros noro’ bunte’ sampe’ ka batessa Bet-Semes.

¹³ E bakto jareya reng-oreng Bet-Semes teppa’na anye gandum e cora. E bakto reng-oreng jareya nangale’e Petthe Parjanjiyan jareya atena ce’ peragga, pas padha nyander ka jikar jareya.

¹⁴ Jikar jareya ambu e seddi’na bato se raja e teggalla oreng Bet-Semes se anyama Yusak. Reng-oreng kottha jareya thok-ngetthok jikar gella’, sapena se dhadhuwa’ esambelli ekagabay kurban obbaran ka PANGERAN.

¹⁵ Bi’ reng-oreng Lewi Petthe Parjanjiyan jareya epatoron, bariya keya kothak se aesse rang-barang dhari emmas gella’, jareya kabbi esaba’ e attassa bato se raja gella’. Saellana jareya oreng Bet-Semes ngatorragi kurban obbaran ban ban-kurban laenna ka PANGERAN.

¹⁶ E bakto rato Filistin se kalema gella’ ngoladi jareya kabbi, pas padha gubar ka Ekron e are jareya keya.

¹⁷ Daddi oreng Filistin la ngeba tor-ator ka PANGERAN menangka tebbusanna dusana oreng e tha-kotthana se eparenta rato Filistin se kalema. Tha-kottha jareya iya areya kottha Asdod, Gaza, Askelon, Gat ban Ekron. E antarana tha-kottha jareya badha se badha bintengnga, badha se tadha’. Sabban kottha settong ngerem dun-budunan ban kos-tekosan emmas settong ebang. Menangka buktena kadaddiyan jareya iya areya bato se raja se egabay panyaba’anna Petthe Parjanjiyanna PANGERAN gella’. Sampe’ sateya bato jareya gi’ badha e teggalla Yusak, oreng Bet-Semes rowa.

¹⁸ (6:17)

¹⁹ Tape e antarana reng-oreng Bet-Semes jareya badha oreng pettong polo nyongngo’ ka dhalem Petthe Parjanjiyan jareya; reng-oreng jareya bi’ PANGERAN epamate. Ra’yat pas padha sossa polana PANGERAN madhateng balai se ce’ rajana jareya.

²⁰ Reng-oreng Bet-Semes pas ngoca’, "Sapa se kowadda neng e ajunanna PANGERAN, Allah Se Socce rowa? Eaterragiya dha’ emma Petthe jareya sopaja jauwa dhari ba’na ban sengko’?"

²¹ Reng-oreng Bet-Semes jareya pas nyoro oreng entar ka Kiryat-Yearim, esoro manapa’ pessen kantha reya, "Petthe Parjanjiyan ampon epabali sareng oreng Filistin. Ngereng pondhut Petthe gapaneka dhari Bet-Semes, pas bakta ka kalenggiyanna sampeyan."

1 Samuel

Video 1 Samuel 6

Ikuti Kami:

KONTAK | PARTISIPASI | DONASI