Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sanggah si Samuel, parana ai marugas bani Jahowa i lobei ni si Eli, majarang do hata ni Jahowa, anjaha seng sadiha pangungkabon.
2 Bani panorang ai modom-modom ma si Eli bani iananni; matani domma rambon anjaha seng be tarbahensi mangidah.
3 Seng ope mintop palita ni Naibata, anjaha domma modom si Samuel ibagas Rumah ni Jahowa, hajongjongan ni Poti Parpadanan ni Naibata.
4 Jadi dilo-dilo ma Jahowa bani si Samuel, gabe ibalosi ma, “Eak, ijon do ahu!”
5 Dob ai marlintun ma ia hu bani si Eli, anjaha nini ma, “Tonggor ma, ijon do ahu, idilo ham do ahu.” Tapi ihatahon si Eli ma, “Seng dong hudilo ho, mulak ma ho, modom use.” Jadi mulak ma ia anjaha modom.
6 Dob ai iulaki Jahowa ma mardilo, “Samuel!” Jadi jongjong ma si Samuel anjaha laho ma ia hu bani si Eli, anjaha nini ma, “Tonggor ma, ijon do ahu, idilo ham do ahu.” Tapi nini ma, “Seng dong hudilo ho anaha, mulak ma ho, modom use.”
7 Tapi seng itanda si Samuel ope Jahowa, anjaha seng ope ipatalar bani hata ni Jahowa.
8 Dob ai iulaki Jahowa ma mardilo si Samuel patoluhalihon, jadi jongjong ma ia laho marayak si Eli, anjaha nini ma, “Tonggor ma, ijon do ahu, idilo ham do ahu.” Jadi mambotoh ma uhur ni si Eli, Jahowa do hape na mandilo anak parana ai.
9 Jadi nini si Eli ma hu bani si Samuel, “Laho ma ho, ulaki ma modom, anggo adong use na dilo-dilo bam, hatahon ma, ʻMarsahap ma Ham ale Jahowa, manangi-nangi do jabolon-Mu on!ʼ” Jadi laho ma si Samuel, iulaki ma modom bani iananni.
10 Dob ai roh ma use Jahowa, jongjong ijai anjaha dilo-dilo songon nongkan ai, “O Samuel, Samuel!” Jadi nini si Samuel ma, “Marsahap ma Ham, manangi-nangi do jabolon-Mu on!”
11 Nini Jahowa dompak si Samuel, “Tonggor ma, pamasaon-Ku ma sada uhum i Israel, sabonar marnginging do pinggol ni ganup na mambogei ai haduasi.
12 Bani ari na sasada ai parrohon-Ku ma hu bani si Eli haganup, na dob Huhatahon pasal ginomparni hun bani mungkahni das hu bani ujungni.
13 Ai domma Hulumbahon hinan bani, paboa na uhumon-Ku do ginomparni sadokah ni dokahni, halani ibotoh do pangapasi ni anakni ai bani Naibata, hape seng iajar sidea.
14 Halani ai domma pala marbija Ahu pasal ginompar ni si Eli: Sabonar na so tarungkab be hajahaton ni ginompar ni si Eli marhitei galangan sisayaton barang galangan sipanganon ronsi sadokah ni dokahni.”
15 Dob ai modom ma si Samuel ronsi siang ari; dob ai iungkab ma labah ni Rumah ni Naibata. Tapi mabiar do si Samuel patugahkon pangungkabon ai bani si Eli.
16 Jadi idilo si Eli ma si Samuel, nini ma, “Alo Samuel, anakku!” Nini ma mambalosi, “Ijon do ahu.”
17 Nini si Eli ma, “Aha do hata na pinatugah-Ni ai bam? Ulang ma porsou hu bangku! Sonai ma bahenon ni Naibata bam, anjaha lobih ni ai ope, anggo iporsou ho hu bangku age sada hata hun bani haganup hata na pinatugah-Ni ai hubam.”
18 Jadi ipatugah si Samuel ma hu bani ganup hata ai, anjaha aha pe lang iporsou bani. Dob ai nini ma, “Jahowa do Ia, ibahen ma barang aha na madear nini uhur-Ni.”
19 Dob ai lambin magodang ma si Samuel, anjaha ihasomani Jahowa do ia, anjaha seng dong hun bani ganup hatani na so saud.
20 Anjaha ganup do halak Israel, hun Dan nari das hu Berseba marhatongonkon si Samuel, Nabi ni Jahowa.
21 Dob ai ipagati Jahowa ma patalarhon diri-Ni i Silo, ai ipatalar Jahowa do diri-Ni hu bani si Samuel i Silo.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA