Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lalang kammana anjo, anjo Samuel, ana’-anaka ija, allayani ri Batara nipimping ri Eli. Anjo wattua langkara’ sikali nania’ pappasang siagang paccini’ battu ri Batara.
2 Ri se’reang bangngi, Eli ia sannakamo toana siagang la’biringamo buta, sitabangi attinro ri kamara’na.
3 Na Samuel attinroi ri ampi’na Patti ParjanjianNa Batara, lalang ri Kema Matangkasaka. Ri wattu tenanapa nammumba alloa siagang a’rinrana ija lampua,
4 nikio’mi Samuel ri Batara. Nampa appialimi Samuel angkana, "Iye’ bapa’!"
5 Nampa lari mange ri Eli na nakana, "Apa kutadeng bapa’? Apa kikiokanga’?" Mingka appialimi Eli angkana, "Tena nakukiokko, attinro poleang mako." Jari a’lampami Samuel attinro poleang.
6 Nampa nikio’mo pole Samuel ri Batara; mingka tanaassengai Samuel angkanaya Batara anjo angkioki, lanri tena le’bakapi a’bicara Batara siagang ia. Jari ambangummi nampa mange ri Eli nakkuta’nang angkana, "Apa kutadeng bapa’? Apa kikiokanga’?" Appialimi Eli angkana, "Tena nakukiokko na’; attinro mako ammotere’."
7 (3:6)
8 Nikio’mi pole Samuel ri Batara untu’ makapintallunna. Jari ambangummi nampa mange ri Eli nakkuta’nang angkana, "Apa kutadeng bapa’? Apa kikiokanga’?" Iaminjo wattua nanaassemmo Eli angkanaya Batara angkioki anjo anaka.
9 Jari nakanamo ri Samuel, "Attinro mako ammotere’. Napunna nikiokko pole, appiali mako angkana, ‘Appau maKi’ Batara, nappilangngeri atanTa.’" Nampa a’lampamo pole Samuel mange ri katinroanna.
10 Nampa battumo Batara, ammenteng ri anjo tampaka siagang akkio’ angkana, "Samuel, Samuel!" Nappialimo Samuel angkana, "Appau maKi’ Batara, nappilangngeri atanTa."
11 Nakanamo Batara ri ia, "Nia’ gau’ malompo ero’ Kugaukang mae ri tu Israel, sa’genna yangasenna tau allangngerekai lalingu ngasengi.
12 Anjo wattua laKugaukammi sikontu apa le’baka Kupau laKugaukang mae ri kaluargana Eli battu ri uru-urua sa’genna kala’busang.
13 Le’ba’mi Kupau mae ri ia angkanaya laKuhukkungi kaluargana sa’genna satunggu-tungguna, lanri le’ba’Ma nahina ana’-ana’na. Naassengi Eli dosa-dosana ke’nanga, mingka tena nakalarroi ke’nanga.
14 Lanri kammana, assumpA’ mae ri kaluargana Eli, angkanaya anjo dosana ke’nanga sannaka lompona, takkulleai nitangkasi siagang koro’bang apa-apa mamo sa’genna satunggu-tungguna."
15 Le’baki anjo attinromi pole Samuel. Na ri wattu bari’basa’na ambangummi siagang nasungkemi sikamma pakke’bu’ Balla’Na Batara. Mallaki ampauangi Eli anjo apa le’baka nacini’.
16 Mingka nikioki ri Eli, na nakana Eli, "Samuel, anakku." Appialimi Samuel angkana, "Iye’ Bapa’."
17 Akkuta’nammi Eli angkana, "Apa Napau Batara mae ri kau? Carita ngasemmi mae ri nakke. Punna nia’ apa-apa nucokkoi, mattantu Nahukkungko Allata’ala."
18 Nampa napau ngasemmo Samuel mae ri Eli. Tena manna se’re nacokkoi. Nampa nakanamo Eli, "Iami Batara, boli’mi kamma Nagaukang apa Nakanaya baji’."
19 Pila’ katambammi lompona Samuel. Nirurungangi ri Batara, siagang Napa’rupami sikamma apa napaua Samuel kajariang tojeng.
20 Iaminjo saba’na na sikontu umma’ Israel battua ri sikontu anjo pa’rasanganga namangakuimi angkanaya anjo Samuel na’biNa Batara. Kere-kere wattu na’bicara Samuel, sikontu bansa Israel mappilangngeri ngasengi. Tuli Napappicikikang iji KalenNa Batara ri Silo, ri tampa’ uru NapappicinikanNa KalenNa mae ri Samuel Na’bicara siagang ia.
21 (3:20)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA