Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ A’lampami Daud mange ri Ahimelekh ri Nob. Ta’bangkami siagang assulu’mi Ahimelekh ambuntuli Daud nampa akkuta’nang ri ia angkana, "Angngapa nubattu mae na kale-kalennuja?"

² Appialimi Daud angkana, "Nisarea’ tugasa’ ri karaenga, nampa tena nakellaia’ ampaui anjo tugasaka manna pole ri nai. Lanri kammana anjo kusuromi ana’ buaku attayang ri se’reang tampa’.

³ Pammopporanga’, kamma-kamma anne erokka’ akkuta’nang, kanre apa nia’ ri katte Bapa’? Kisaresa’ limambatu roti yareka apa-apa mamo niaka anrinni."

⁴ Nakanamo anjo imanga, "Tena roti biasaya, poro roti eroka bawang nipakkoro’bangngang nia’; akkullei nialle, assala’ tenaja naberu le’ba’ ana’ buanu assikatinroang baine."

⁵ Appialimi Daud angkana, "Tantu tena nagaukangi ke’nanga. Salamanya punna tugasaki ikambe, tuli najagai ana’ buaku sollanna tuli tangkasa’ kalenna situru’ atorang agamaya, nampa anjo kammaya tugasa’ biasaji bawang. La’biangampa pole punna tugasa’ attantu kammaya anne!"

⁶ Jari napassareammi anjo imanga mae ri Daud anjo roti nipakkoro’bangnganga. Nasaba’ ia niaka ri ia poro iaji bawang anjo roti nipakkoro’bangnganga mae ri Allata’ala, siagang le’ba’mi niangka’ battu ri tampa’ pakkoro’bangnganga untu’ nisambei roti beru.

⁷ (Kabutulangi, Doëg tu Edom, kapala pakalawakinnaolo’-olo’na Saul, nia’ tongi anjoreng anjo alloa, untu’ ampapolei se’reang kawajibang agamana.)

⁸ Nampa akkuta’nammo Daud ri Ahimelekh angkana, "Maka nia’ poke yareka pa’dang kiboli’, akkullea kupake bapa’? Parentana karaenga battu silalonna dudui, sa’genna a’lampa karo-karo dudua’, natenamo kusawe angngalle pa’dang yareka sanjata maraengannaya."

⁹ Appialimi Ahimelekh angkana, "Nia’ kuboli’ pa’danna Goliat, anjo tu Filistin le’baka nubuno ri Lappara’ Ela. Anjo pa’danga niaki ri boko Efod, nirokoka kaeng. Punna erokko, alle mami, nasaba’ iaji anjo bawang sanjata niaka anrinni." Nakanamo Daud, "Anjo pa’danga, iami pa’dang kaminang bajika ri sikontu pa’rasangang, passareammi mae ri nakke!"

¹⁰ Ia memang anjo alloa nalarimo Daud battu ri Saul. Nampa battumo mange ri Akhis karaenna kota Gat.

¹¹ Nipauammi Akhis ri sikamma pagawena angkana, "Teaika anne Daud, karaenga ri pa’rasanganna? Siagang teaika untu’ iami na’joge’-joge’ sikamma bai’-bainea siagang akkelong angkana, ‘Saul ammuno assa’bu-sa’bu musu, mingka Daud appulo-pulo sa’bui nabuno?’"

¹² Niganggumi pikkiranna Daud ri anjo bicara kammaya, sa’genna a’jari malla’ sikalimi mae ri Karaeng Akhis.

¹³ Lanri kammana anjo, assara-saraimi pongoro’ Daud ri dallekanna tau jaia. Ri wattunna ero’ ke’nanga antahangi, sangkammami nicini’ Daud tau tena nasilolongang pikkiranna. Naallemi nakara’musu’ tojeng pakke’bu’ kotaya, siagang nalappassammi ta’bene-bene iloro’na naung ri janggo’na.

¹⁴ Jari nakanamo Akhis mae ri sikamma pagawena, "Tanucinikai angkana pongoroki anjo taua? Angngapa nanuerangi mae anrinni?

¹⁵ Kurangijika tau tenaya silolongang pikkiranna niaka ri tammuliliku, sa’genna nuerang antu tupongoroka mae anrinni ri ballakku?"

1 Samuel

Video 1 Samuel 21

Ikuti Kami:

KONTAK | PARTISIPASI | DONASI