Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lawes Daud ndahi Imam Ahimelek i Nop. Alu nggirgir reh Ahimelek ndarat njumpai ia janahna nungkun, "Ngkai maka si sada ngenca kam reh ku jenda?"

² "Aku reh ku jenda bekas persuruhen raja," nina Daud ngaloi. "Ikatakenna man bangku maka ula kupebetehken man ise pe kai si isuruhna kudahiken. Adi kerna temanku nggo kukataken man bana kerina gelah ijumpaina aku i bas sada ingan.

³ Genduari dage, kai lit si man pangan i bas kam? Berekenlah man bangku lima ngkibul roti ntah kai gia si deban si lit i bas kam."

⁴ Nina imam ndai, "La lit i bas aku roti si biasa tapi roti si badia ngenca lit; banci man bandu e adi temanndu ndai la mbaru ersada kula ras diberu."

⁵ "Tentu saja lang," nina Daud erjabap. "Teman-temanku tetap njaga dirina rusur bersih rikutken aturen agama aminna gia kami ndarat i bas tugas biasa; apai ka sekali enda kami i bas tugas khusus!"

⁶ Emaka ibereken imam e man Daud roti si badia e, sabap roti si ipersembahken man Dibata e ngenca lit i bas ia, si nggo ipindahken i bas meja si badia nari janah igantiken alu roti si mbaru.

⁷ (Doek, kalak Edom pengulu permakan Saul rembang sangana i je i bas wari e sabap arus isehkenna sada dahin agama.)

⁸ Nina Daud man Ahimelek, "Lit i bas kam lembing ntah pedang si banci ibereken man bangku? Perentah raja erbahanca terpaksa aku pedas-pedas lawes seh maka lanai aku sempat muat pedangku ntah pe senjata si deban."

⁹ Erjabap Ahimelek nina, "I bas aku lit pedang Goliat, kalak Pilisti si ibunuhndu i Baluren Ela; adah i pudi baju epod ibaluti alu uis. Adi bandu atendu, buatlah; e ngenca senjata si lit i jenda." "Enta dage," nina Daud. "La kap lit pedang si terjilen asa e i japa pe!"

¹⁰ Emaka lawes Daud lompat i bas Saul nari, ndahi Raja Akis, i Gat.

¹¹ Nina pegawai raja man Akis "La kin enda Daud, raja negerina? Enda me kalakna si iende-endeken diberu-diberu janahna landek-landek, 'Ibunuh Saul meribu-ribu, tapi Daud munuh erpuluh-puluh ribu.'"

¹² Mbages kal ertina kata enda ndai i bas Daud, janah erkite-kiteken si e mbiar kal ia man Akis raja Gat ndai.

¹³ Emaka adi i lebe-lebe kalak ndai, ipekulah-kulahna jajat ukurna janah adi icubaken kalak ndai pesinik ia, minter ibahanna langkahna bagi kalak mehado; isurat-suratina pintun gerbang janah ipelepasna tehtehna nehtehen ku janggutna.

¹⁴ Emaka nina Akis man pegawaina, "Nehenlah! Adon kap ia! Ngkai maka ibabandu man bangku?

¹⁵ Kurang kin i bas aku kalak adon? Ngkai maka ibabandu ka tole erbahanca ngilas kuakap ngidah lagu langkahna si rarat e i rumahku enda?"

1 Samuel

Video 1 Samuel 21

Ikuti Kami:

KONTAK | PARTISIPASI | DONASI