Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Daud pas meyos ka kalenggiyanna Imam Ahimelekh e Nob. Ahimelekh takerjat, kalowar manggi’i Daud, laju mareksane, "Aponapa panjennengngan meyos ka ka’dhinto me’ kadibi’an?"

² Saodda Daud, "Kaula epassrae tugas sareng rato; kaula ta’ eparengngagi atotoran ka pasera’a saos parkara tugas ganeka. Daddi reng-oreng se ngereng kaula sareng kaula epakon anante’ neng e settong kennengngan.

³ Ta’ langkong kaula terro atanya’a, sampeyan samangken kaagungan teddha’an ponapa, Pa’? Manabi badha, kaula nyo’ona roti lalema’, otaba ponapa saos se badha e ka’iya."

⁴ Ca’na imam jareya, "Abdina ta’ gadhuwan roti biyasa, se badha namong roti tor-ator ka Pangeran; eatore dha’ar, asal reng-oreng se ngereng panjennengngan ampon abit ta’ apolong tedhung sareng babine’."

⁵ Saodda Daud, "Tanto saos bunten. Manabi kalerressan atugas, reng-oreng kaula masthe ajaga sopaja kabadha’anna berse menorot agama; mangkana se kadi ganeka namong manabi ajalannagi gas-tugas se biyasa. Ponapa pole manabi kalerressan ajalannagi tugas se kusus akadi samangken paneka!"

⁶ Imam jareya laju ngatorragi roti tor-ator gella’ ka Daud, sabab ta’ andhi’ roti laen salaenna roti tor-ator ka PANGERAN jareya, se la ekala’ dhari mezba eganteyana roti anyar.

⁷ (Kabendherran, e jadhiya badha kabulana Saul se teppa’naajalannagi kawajibanna agamana, nyamana Doëg, oreng Edom, daddi kapalana tokang ngowanna ebinna Saul.)

⁸ Daud adhabu ka Ahimelekh, "Ponapa sampeyan kaagungan tombak otaba peddhang se ekenneng angguy kaula? Papakonna rato ka kaula dadagan kantos kaula mangkat ru-kaburu, ta’ sempat ngala’ peddhang otaba sanjata laenna."

⁹ Dhabuna Ahimelekh, "Kaula nyempen peddhangnga Goliyat, oreng Filistin se epate’e panjennengngan e Cora Ela ka’issa’; peddhang gapaneka badha e budhina efod, ebundu’ sareng kaen. Manabi ekaparlo, eatore pondhut, sabab e ka’dhinto tadha’ gagaman laenna." Dhabuna Daud, "Ka’imma! Peddhang ganeka peddhang se paleng sae e nagara paneka."

¹⁰ E are jareya keya Daud buru dhari Saul, terros meyos ka Akhis, ratona kottha Gat.

¹¹ Ba-ponggabana Rato Akhis mator kantha reya ka ratona, "Ka’issa’ gu ta’ Daud, rato e nagarana, ta’ enggi? Gu ta’ Daud ka’dhinto se ealem babine’an se ngamba’ sambi atari sareng anyanye kadi ka’dhinto, ‘Saul mate’e moso abun-ebun, tape Daud mate’e apolowan ebu?’"

¹² Meyarsa oca’na reng-oreng jareya Daud laju arassa ce’ tako’na ka Rato Akhis.

¹³ Daddi, e adha’na oreng se bannya’ e jadhiya Daud tha-kantha la-magila. E bakto etagenneya bi’ reng-oreng Daud terros atengka akantha oreng se ta’ baras; labang sakethengnga kottha ero’-koro’ ban jailla agili ka janggu’na.

¹⁴ Akhis laju adhabu ka para ponggabana, "Apa ba’na ta’ nangale’e ja’ oreng jareya gila? Arapa me’ egiba dha’ enna’?

¹⁵ Apa oreng gila gi’ ta’ cokop e nagara reya, ma’ daddi ba’na ngeba oreng gila ka tang bengko reya?"

1 Samuel

Video 1 Samuel 21

Ikuti Kami:

KONTAK | PARTISIPASI | DONASI