Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai tangkog ma si Nahas, halak Ammon ai, anjaha ihubu ma huta Jabes na i Gilead; jadi nini sagala dalahi na i Jabes ma dompak si Nahas, “Bahen ma parpadanan bennami, ase ibalosi hanami rodimu.”
2 Jadi nini si Nahas, halak Ammon ai ma hu bani sidea, “Ra pe ahu mambahen parpadanan bani nasiam, asal ma palobei hupulsitkon haganup mata siamun ni nasiam, ase hiri ganup halak Israel.”
3 Nini pangintuai ni Jabes ma hu bani, “Lopas ma hanami marpingkir pitu ari on, ase isuruh hanami suruhannami hu ganup nagori ni halak Israel. Jadi anggo seng dong na roh paluahkon hanami, luar pe hanami marayak ham.”
4 Dob das suruhan ai hu Gibea, huta ni si Saul, ipatugah sidea ma hata ai hupinggol ni bangsa ai. Jadi ipagogoh sidea ma sorani doruh-doruh.
5 Tonggor ma, roh do tudu si Saul hun ladang mangalai lombu, jadi nini si Saul ma, “Aha do na masa bani bangsa in ase doruh-doruh sidea?” Jadi ituri-turihon sidea ma hu bani hata-hata ni halak Jabes ai.
6 Jadi dob ibogei si Saul hata ai, sogop ma Tonduy ni Naibata bani, gajag tumang ma ringisni.
7 Ibuat ma sapasang lombu, itoktoki ma ai, anjaha ipantongoskon hu bani ganup tanoh ni Israel marhitei tangan ni suruhanni, anjaha nini ma, “Barang ise na so bingkat mangirikkon si Saul pakon si Samuel, maningon sonin ma bahenon hu bani lombuni!” Jadi sogop ma bajora hun bani Jahowa hu bani bangsa ai, gabe luar ma sidea songon sada halak.
8 Sanggah na binilang sidea i Bezek, adong do halak Israel tolu ratus ribu halak anjaha halak Juda tolu puluh ribu halak.
9 Dob ai ihatahon sidea ma hu bani suruhan na roh ai, “Sonon ma hatahon nasiam hu bani halak Jabes na i Gilead, ʻPatar bani pardeteng ni mata ni ari dapotan pangurupion ma nasiam.ʼ” Dob roh suruhan ai anjaha ipatugah ai bani halak Jabes, jadi malas ma uhur ni sidea.
10 Halani ai nini halak Jabes ma, “Patar ma hanami luar marayak nasiam, jadi bahen nasiam ma bannami romban hu bani rosuh ni uhur nasiam.”
11 Patarni ai, ibagi si Saul ma bangsa ai gabe tolu bagian; dob ai, sanggah runda sogod-sogod, idorab sidea ma tongah-tongah ni parsaranan ai, gabe italuhon ma halak Ammon marayak deteng ni ari. Merap ma na tading ai, seng dong age dua halak saodoran.
12 Dob ai nini bangsa ai ma hu bani si Samuel, “Ise do na mangkatahon, ʻMintor si Saul ma na manrajai hita?ʼ Boan ma hujon halak ai, ase ibunuh hanami sidea.”
13 Tapi nini si Saul ma, “Seng bulih matei barang ise sadari on, ai sadari on do Jahowa mambahen haluahon bolon bani halak Israel.”
14 Dob ai nini si Samuel ma hu bani bangsa ai, “Barah, laho ma hita hu Gilgal, ase na paratah ijai harajaon in.”
15 Jadi laho ma ganup bangsa ai hu Gilgal pabangkitkon si Saul ijai gabe raja i lobei ni Jahowa i Gilgal. Igalangkon sidea ma ijai galangan pardameian i lobei ni Jahowa, jadi marmalas ni uhur banggal ma ijai si Saul pakon haganup dalahi hun bani halak Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA