Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Saellana jareya Nahas, rato Amon, mamangkat tantarana epangeppong kottha Yabes e baba Gileyad. Reng-oreng Yabes ausul kantha reya ka Nahas, "Ngereng mabadha parjanjiyan sareng Yabes, reng-oreng Yabes pas atelloga ka junandalem."

² Saodda Nahas, "Sengko’ endha’ mabadha parjanjiyan, tape saradda kantha reya: mata kanganna ba’na padha econgke’a kabbi bi’ sengko’ menangka tandha ja’ sakabbinna bangsa Isra’il eya-seya bi’ sengko’."

³ Saellana jareya para pamimpinna kottha Yabes padha nyaot, "Abdidalem nyo’ona bakto pettong are parlo ngotosa oreng ka sabalattrana tana Isra’il. Manabi tadha’ se porona nolonge, oreng Yabes atelloga ka junandalem."

⁴ Para otosan jareya napa’ ka Gibeya, kalenggiyanna Saul. E bakto reng-oreng jareya manapa’ kabar gella’, ra’yat pas padha nanges polana arassa ta’ andhi’ pangarebban pole.

⁵ E bakto jareya Saul gi’ buru rabu dhari teggalla abakta pe-sapena. "Badha apa? Me’ padha nanges kabbi?" dhabuna Saul. Reng-oreng jareya pas notorragi parkara kabar se egiba oreng Yabes gella’.

⁶ E bakto meyarsa kabar jareya, Saul pas ekobasae Errohna Allah.

⁷ Panggaliyanna ce’ dukana, laju mondhut sape dhadhuwa’, esambelli, pas ethok-ketthok epadaddi sabannya’na. Thok-ketthoganna sape jareya pas epakerem ka saanterona tana Isra’il, etoro’e papakon kantha reya, "Sapa se ta’ noro’ aperrang bi’ Saul ban Samuwel, sapena ethok-ketthoga epakantha’a reya keya!" Bangsa Isra’il tako’ ka pa-apa se olle daddi elampa’agiya PANGERAN, daddi kabbi padha asadhiya mangkada aperrang areng-bareng.

⁸ Reng-oreng jareya epakompol e Bezek, pas ebitong: badha tello ratos ebu oreng Isra’il ban tello polo ebu oreng Yehuda.

⁹ Saellana jareya para otosan dhari Yabes ebalai kantha reya, "Kabala ka oreng Yabes, lagguna sabellunna beddhuk, oreng Yabes la olleya partolongan." E bakto ngedhing kabar jareya, pandhudhu’ Yabes ce’ peragga.

¹⁰ Atorra ka Nahas, "Lagguepon oreng Yabes badhi atelloga ka junandalem, eatore epakadi ponapa’a saos oreng Yabes ngereng kasokan."

¹¹ Kalagguwanna gu-laggu, reng-oreng se entara aperrang bi’ Saul ebagi epadaddi tello pasukan. Ban e bakto pajjar buru ngombar reng-oreng jareya padha nyerrang ka nga’-tengnga’anna parkemahanna oreng Amon. Sabellunna beddhuk, tantarana Saul la makala mosona. Reng-oreng Amon se ngenneng buru car-kalacer, padha buru bi’-dibi’ ebang.

¹² Saellana jareya bangsa Isra’il atanya ka Samuwel, "E ka’dhimma reng-oreng se ngoca’ ja’ Saul ta’ pantes daddi rato Isra’il? Ngereng parenge oneng, epateyana."

¹³ Tape Saul adhabu, "E are teya ta’ olle badha oreng se epate’e, sabab e are teya PANGERAN la masalamet Isra’il."

¹⁴ Samuwel adhabu ka reng-oreng jareya, "Mara sateya padha entar ka Gilgal kabbi, neng e dhissa’ mara Saul resmeyagi menangka rato Isra’il."

¹⁵ Daddi reng-oreng jareya padha entar ka Gilgal kabbi, ban e kennengnganna kabakteyan jareya Saul eresmeyagi menangka rato Isra’il. Reng-oreng Isra’il padha ngatorragi kurban karokonan, dineng Saul ban bangsa Isra’il kabbi padha araya’agi kadaddiyan jareya.

1 Samuel

Video 1 Samuel 11

Ikuti Kami:

KONTAK | PARTISIPASI | DONASI