Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nampa Nahas, iamintu karaeng tu Amon, napagio’mi tantarana nampa nakurung anjo kota Yabesh ri daera Gilead. Angngussulu’mi panduduka mae ri Nahas kamma anne, "Appare’ maki’ parjanjiang siagang ikambe, nampa latundu’ ikambe mae ri katte."

² Appialimi Nahas angkana, "Ero’ja’ appare’ parjanjiang, mingka anne sara’na, ‘Massing lakupasulu’ ngasengi mata kanannu salaku pammatei nihinana ngaseng sikontu Israel.’"

³ Nampa appialimo sikontu pamimping-pamimpinga ri kota Yabesh angkana, "Kisarei tempo ikambe tuju allo sallona, sollanna akkulle ikambe assuro tau mae ri sikontu butta Israel. Punna tena ero’ antulungi ikambe, latundu’mi ikambe mae ri katte."

⁴ Kammaminjo nabattumo anjo sikamma tunisuroa mange ri Gibea, tampa’ pammantanganna Saul. Napabattuna ke’nanga anjo kabaraka, angngarru’mi ra’yaka lanri tappu’ panrannuammi ke’nanga.

⁵ Anjo wattua silalonna Saul battu ri kokonna na naerang sapinna. Akkuta’nammi angkana, "Apa le’ba’ kajariang? Angngapa nangngarru’ ngaseng taua?" Jari nipauammi anjo kabara’ naeranga anjo tunisuroa battu ri Yabesh.

⁶ Nalangngere’na Saul anjo kabaraka, nikoasaimi ri RohNa Allata’ala.

⁷ Sanna’mi larrona. Na naallemo ruang kayu sapi nampa napolong na nakere’ a’jari jai kere’na. Nampa nakiring anjo kerek-kerekanga mae ri sikontu pa’rasangang Israel, na naparentakang angkana, "Inai-nai tena namaju ampinawangi Saul siagang Samuel a’bundu’, lanikerek-kere’ tongi sapi-sapinna kamma anne!" Malla’mi bansa Israel ri apa akkullea Nagaukang Batara. Jari yangasenna taua, sadia ngasemmi untu’ maju sipa’rurungang a’bundu’.

⁸ Nipa’rappungammi ke’nanga nampa nirekeng ri Bezek: Nia’ 300.000 tu Israel na nia’ 30.000 tu Yehuda.

⁹ Le’baki anjo nipauammi anjo tu battua ri Yabesh angkana, "Paumi mae ri sikamma panduduka ri Yabesh, angkanaya ammuko bari’basa’, ri tenanapa nattangnga alloa, langgappami ke’nanga pannulung." Nalangngere’na pandudu’ Yabesh anjo pasanga, sannang sikalimi pa’mai’na ke’nanga.

¹⁰ Nakanamo ke’nanga mae ri Nahas, "Ammuko latundu’mi ikambe, nampa akkullemi nigaukang apa ningaia ri atinta."

¹¹ Ammukona, ri bari’basa’na, nabagemi Saul anjo taua a’jari tallu pasukang. Na ammumbanamo alloa, majumi ke’nanga ri tangnga-tangnga kemana tu Amon na nabunduki ke’nanga. Ri tenanapa nattangnga alloa nabetami tantarana Saul anjo musua. Sikamma tu Amon akkullea ta’lappasa’ tassia’-siara’mi, sa’genna tenanniakka akkulle lari sipa’rua a’rurung.

¹² Le’baki anjo akkuta’nammi bansa Israel mae ri Samuel angkana, "Kemaemi anjo tau barania angkana tena nasiratang Saul a’jari karaenta? Kipassareangi mae ri kambe anjo taua bapa’, na nabuno ikambe."

¹³ Mingka nakanamo Saul, "Tenanniakka tau akkulle nibuno anne alloa, nasaba’ anne alloa Napasalama’mi Batara Israel."

¹⁴ Nampa nakana Samuel ri ke’nanga, "Umba ki’lampa ngaseng mange ri Gilgal na niresmikang Saul a’jari karaenta."

¹⁵ Jari a’lampa ngasemmi ke’nanga mange ri Gilgal. Nampa nipa’jari resmimo Saul a’jari karaeng anjoreng ri tampa’ passambayanganga. Assaremi ke’nanga koro’bang pappasiama’; na nasuarrimo Saul siagang sikontu bansa Israel anjo pa’gaukanga.

1 Samuel

Video 1 Samuel 11

Ikuti Kami:

KONTAK | PARTISIPASI | DONASI