Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Hiram, karaeng Tirus, tuli agangi siagang Karaeng Salomo. Nalangngere’na Hiram angkanaya a’jari karaemmi Salomo ansambeangi Daud manggena, akkirimmi tunisuro mange ri Salomo.
2 Nampa akkiring tommo Salomo tunisuro mange ri Hiram siagang appasang angkana,
3 "Karaeng Hiram mala’birika! Tantu kiassengi angkanaya manggeku tuli tarpassa a’bunduki lanri battui musua ambunduki, iamintu battua ri pa’rasangang niaka ri tammulilina ikambe. Na lanri tenapa nisarei ri Batara untu’ ambeta ngasengi musunna, tenapa nasawe ambangung tampa’ sambayang mange ri Karaeng Allata’alana.
4 Mingka kamma-kamma anne Nasarema’ Karaeng Allata’alaku kaamangngang ri sikontu daera kakoasangku. Tena musungku, siagang tena bala antujui pa’rasangangku.
5 Le’ba’mi a’janji Batara mae ri manggeku Daud angkana, ‘Ana’ bura’nenu laKuangkaka’ a’jari karaeng ansambeangko, iami lambangung tampa’ passambayangang mae ri Nakke.’ Lanri kammana anjo, Karaeng Hiram mala’birika, inakke Salomo, le’ba’mi kutappuki untu’ ambangungi anjo bangunanga.
6 Naassemmi Karaeng Allata’ala angkanaya ri tangnga-tangngana ra’yakku tena tau cara’de’ anna’bang poko’ kayu sangkamma ra’yatta. Lanri kammana anjo, kupalaki ri katte poro akkullei kisuro ra’yatta ampa’na’bangnganga’ poko’-poko’ camara ri Libanon. Lakusuroji ra’yakku ambantui ke’nanga, siagang manna siapa gaji kipattantua untu’ ke’nanga anjo taunta, lakubayaraki."
7 Sannang sikali nyawana Hiram nalangngere’na anjo kabaraka. Nakanamo, "Nipujimi Batara anne alloa, lanri Nasarena Daud sitau ana’ bura’ne sannaka baji’na pangngassenganna untu’ a’jari karaeng mae ri anjo bansa lompoa."
8 Nampa akkirimmo Hiram pappiali mae ri Salomo angkana, "Le’ba’mi kutarima anjo kabara’ pappalatta, siagang sadiama’ untu’ anturukiangki’ pappalatta. Lappasadia’ kayu camara Libanon, siagang kayu camara biasaya situru’ pappalatta.
9 Sikamma ra’yakku langngerangi anjo kayua naung battu ri Libanon mange ri tamparanga. Anjoreng, anjo batang-batang kayua lanasikkoki ke’nanga a’jari raki’ nampa lanapalo’loro’ ke’nanga ri biring tamparanga sa’genna mange ri tampa’ kipattantua. Anjoreng lanibongkaraki anjo raki’-rakika nampa nipassareang mae ri ra’yatta untu’ naurusu’ pole. Kupalaki battu ri katte nakipasadia apa-apa lanakanrea sikamma tau niaka ri balla’ kakaraengangku."
10 Jari nisaremi Salomo ri Hiram sikontu kayu camara Libanon siagang camara biasaya ia naparalluanga.
11 Na untu’ assarei kanre sikamma bone balla’ kakaraenganna Hiram, taung-taungi nisare Hiram ri Salomo 322.500 kilo gandung, 4.400 litere’ minynya’ zaitun asli.
12 Narupaimi janjinNa Batara, na Nasaremo Salomo pangngassengang mabaji’. Hiram siagang Salomo bajiki passisambunganna, siagang appare’mi ke’nanga parjanjiang passikko’.
13 Karaeng Salomo napagio’mi 30.000 tau bura’ne battu ri sikontu Israel untu’ anjama,
14 siagang naangka’mi Adoniram untu’ a’jari pangawasa’ mae ri ke’nanga. Anjo ke’nanga nabagei Salomo a’jari tallu pa’rappungang, massing 10.000 sipa’rappungang. Anjo tallua pa’rappungang a’le’basaki ke’nanga ammantang tassibulang ri Libanon na ruam bulang ri balla’.
15 Salomo napagio’ tommi 80.000 tau untu’ appa’a’ batu battu ri monconga siagang 70.000 tau untu’ ampisangi anjo batu-batua.
16 Angngangkaki 3.300 mandoro’ untu’ a’jari pangawasa’ mae ri anjo jama-jamanga.
17 Lanri parentana tommi nappa’a’ tommo ke’nanga batu-batu lompo bajika untu’ a’jari pundasina anjo Balla’Na Batara.
18 Kammaminjo sikamma pajamana Salomo siagang sikamma pajamana Hiram kammayatompa tau battua ri kota Gebal appasadiami batu siagang kayu untu’ pambangunanna anjo Balla’Na Batara.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA