Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Hiram, rato Tirus, salanjangnga akanca rapet ban Rato Daud. E bakto meyarsa ja’ Sulaiman la jumenneng rato agante Daud, ramana, Hiram pas ngerem otosan ka Sulaiman.
2 Sulaiman pas malesse apessennan kantha reya ka Hiram,
3 "Rato Hiram Se Molja! Tantoepon panjennengngan oneng ja’ rama kaula Daud ros-terrosan tapaksa aperrang polana eserrang moso dhari ra-nagara e sakalenglengnga Isra’il. Sarrena PANGERAN gi’ ta’ apareng kamennangan e dhalem ngadhebbi so-mosona, rama gi’ ta’ sempat maddek geddhong kennengngannepon kabakteyan ka GUSTE Allahna.
4 Namong, samangken GUSTE Allah kaula ampon apareng kataremtemman e saantero baba kakobasa’anna kaula. Kaula ta’ gadhuwan moso, sarengngan tadha’ mosiba pa-ponapa e nagara kaula.
5 PANGERAN ampon ajanji kadi paneka ka rama kaula, ‘Ana’na ba’na se bi’ Sengko’ epadaddiya rato se aganteya ba’na, jareya se bakal maddegga geddhong kennengnganna oreng ajalannagi kabakteyan ka Sengko’.’ Daddi, Rato Hiram Se Molja, kaula, Sulaiman, ampon motossagi badhi maddegga geddhong gapaneka.
6 Panjennengngan ampon ngagali ja’ e antaraepon ra’yat kaula tadha’ oreng se penter moger kajuwan akadi ra’yattepon panjennengngan. Daddi, kaula nyo’ona tolong ka panjennengngan sopaja panjennengngan makona reng-oreng Tirus mogerragi bungkana comara Libanon kaangguy kaula. Ra’yat kaula epakona nolonge sareng kaula, parkara opana saponapa’a saos se etantowagi sareng panjennengngan, sareng kaula ebajara."
7 Hiram ce’ peragga narema kabar jareya. Dhabuna Hiram, "Molja’agi PANGERAN e are teya, sabab salerana la apareng ka Daud pottra se ce’ bicaksanana se epadaddi ratona bangsa se raja reya."
8 Hiram pas akerem jawaban kantha reya ka Sulaiman, "Kaula ampon narema pamondudda panjennengngan, kaula badhi norodi pamondudda panjennengngan. Kaula nyadhiya’agiya kaju comara Libanon sareng kaju comara biyasa menorot pamondudda panjennengngan.
9 Kaju gapaneka badhi ebakta’a sareng reng-oreng Tirus dhari Libanon ka tase’. Neng e tase’ ju-kaju gapaneka etaleyana epakadiya gitek, pas elanyo’agiya noro’ penggirra tase’ kantos ka kennengngan se etantowagi sareng panjennengngan. Sanapa’na ka kennengngan gapaneka tek-gitek gapaneka badhi ebungkara sareng epassra’agiya ka reng-orengngepon panjennengngan kaangguy orosan saterrossa. Dhari panjennengngan, kaula namong nyo’ona sopaja reng-oreng saessena karaton kaula eparengngana teddha’an."
10 Daddi Hiram ngereme Sulaiman kaju comara Libanon ban kaju comara biyasa, bannya’na menorot se ekaparlo ban Sulaiman.
11 Ban kaangguy makane reng-oreng saessena karatonna Hiram, sabban taonna Sulaiman ngeremmagi ka Hiram gandum bannya’na tello ratos dhu lekor ebu lema ratos kilo ban mennya’ jaitun asli bannya’na pa’ ebu pa’ ratos liter.
12 PANGERAN neptebbi janjina sarta apareng kabicaksana’an ka Sulaiman. Hubunganna Hiram ban Sulaiman becce’ terros, se kadhuwa jareya mabadha parjanjiyan parsahabadan.
13 Rato Sulaiman makompol oreng lalake’an dhari saantero nagara Isra’il, bannya’na tello polo ebu oreng epalako rodhi,
14 sarta mele Adoniram se epadaddi pangawassa. Reng-oreng jareya ebagi epadaddi tello galumpo’, bang-sebangnga bannya’na sapolo ebu oreng. Reng-oreng se tello galumpo’ jareya elir-gilir sabulan neng e Libanon ban dhu bulan neng e bengkona.
15 Sulaiman malako oreng ballung polo ebu bannya’na epamathel bato dhari gunong ban oreng pettong polo ebu bannya’na epangangko’ bato jareya,
16 sarta ngangkat mandhur tello ebu tello ratos oreng, epangawase lakona reng-oreng jareya.
17 Kalaban dhabuna rato jareya keya reng-oreng gella’ mathel bato se ja-raja ban gus-bagus se egabaya dhasarra Padalemman Socce.
18 Daddi li-kolina Sulaiman ban Hiram sarta reng-oreng dhari kottha Gebal nyadhiya’agi bato ban kaju se ekagagabaya Padalemman Socce.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA