Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Buei do naboru hun bani bangsa na legan na iharosuhkon Raja Salomo sobali boru ni Parao ai ma boru Moab, Ammon, Edom, Sidon pakon Het.
2 Ai ma hun bani bangsa sipajuh begu-begu; pasal ai domma ihatahon Jahowa hinan hu bani halak Israel, ʻSeng bulih hanima marayak sidea, anjaha sidea pe seng bulih hu tongah-tongahnima, ai sai dari-darion ni sidea do uhurnima mangirikkon naibata ni sidea; hape hu bani naboru-naboru na sonai do longkot uhur ni si Salomo.ʼ
3 Adong do bani raja ai pitu ratus parinangon, ai ma panak boru-panak boru pakon tolu ratus siparorotni; jadi taruyun ma uhurni ibahen parinangonni ai.
4 Jadi dob sayur matua Raja Salomo, itarik parinangonni ai ma uhurni mangirikkon naibata na legan, gabe seng be gok dear ni uhurni bani Jahowa Naibatani, songon paruhuran ni si Daud bapani ai.
5 Iirikkon si Salomo do marsombah hu bani naibata ni halak Sidon, na margoran Astarte pakon Milkom, gana-gana ni halak Ammon.
6 Ihorjahon si Salomo do sogam ni uhur ni Jahowa, seng longkot be uhurni mangirikkon Jahowa, songon si Daud, bapani ai.
7 Ipadear si Salomo ma ijia sada ianan panggalangan bani Kamos, gana-gana ni halak Moab, i atas dolog hampit hapoltakan ni Jeruslem, ampa bani Molok, gana-gana ni halak Ammon.
8 Sonai do ibahen bani ganup parinangonni na hun bani bangsa na legan, na manutung dahupa pakon na manggalang bani naibata ni sidea bei.
9 Jadi manringis ma Jahowa hu bani Raja Salomo, halani marbalik uhurni hun bani Jahowa, Naibata ni halak Israel, na dob patalarhon diri-Ni hu bani, pala dua hali.
10 Domma pala ilumbahon bani pasal ai, na so bulih irikkononni naibata na legan; tapi seng iramotkon tonah ni Jahowa.
11 Halani ai nini Jahowa ma hu bani si Salomo, “Halani sonin pambahenanmu, seng iramotkon ho padan na Hubahen in, pakon titah-Ku, na Hutonahkon in bam, maningon rampason-Ku do harajaon in hunbam, anjaha bereon-Ku bani juakjuakmu.
12 Tapi seng bahenon-Ku ope ai sanggah goluhmu, halani si Daud bapamondi; hun bani tangan ni anakmu pe rampason-Ku ai.
13 Seng haganup harajaon ai rampason-Ku; berehonon-Ku do sada marga hu bani anakmu, halani juakjuak-Ku si Daud pakon halani Jerusalem, na Hupilih in.”
14 Dob ai ipapuho Jahowa ma sada halak imbang ni Raja Salomo, ai ma si Hadad, halak Edom, hun bani ginompar ni Raja Edom do ia.
15 Ai sanggah marporang Raja Daud i Edom, anjaha si Joab, pambobai ni bala ai tangkog laho mananom halak na matei marporang, ibunuh do haganup dalahi na i Edom.
16 Onom bulan do ijai marianan si Joab rap pakon ganup halak Israel paima isiapkon ganup dalahi na i Edom.
17 Tapi maporus do ijia si Hadad hu tanoh Masir, ia rap pakon deba halak Edom, juakjuak ni bapani; etek ope ijia si Hadad.
18 Bingkat ma sidea hun Midian, anjaha das ma sidea hu Paran; iarahkon sidea ma piga-piga halak hun Paran bahen hasoman ni sidea, gabe das ma sidea hu tanoh Masir hu bani Parao, raja ni Masir, na mamberehon bani sada rumah, bohal pakon tanoh sihorjaonkonni.
19 Jumpahan idop ni uhur banggal do si Hadad hun bani Parao, pala ibere anggi ni parinangonni sandiri bani, ai ma anggi ni si Tahpenes, raja naboru ai.
20 Dob ai itubuhkon anggi ni si Tahpenes ma bani sada anak, na margoran si Genubat, na pinagodang-godangni i rumah ni Parao. Marianan i rumah ni Parao ma si Genubat rap pakon anak ni Parao.
21 Jadi dob ibogei si Hadad i tanoh Masir, na dob modom si Daud rap pakon ompungni, na dob matei homa si Joab, pambobai ni bala ai, gabe nini si Hadad ma hu bani Parao, “Lopas ham ma ahu mulak hu tanohku.”
22 Nini Parao ma hu bani, “Aha dong na hurang bam i lambungku, ase isura uhurmu sihol mulak hu tanohmu?” Jadi nini ma, “Seng dong namin, tapi age sonai sai lopas ham ma ahu laho.”
23 Ambahni ai ipapuho Jahowa ma use sahalak nari imbangni, ai ma si Reson, anak ni si Eliada, na maporus sapari hun bani tuanni, ai ma si Hadad-Eser, raja ni Soba.
24 Ipatumpu-tumpu ma halak hu lambungni, anjaha ia do pambobai ni gerombolan ai, sanggah na ibunuhi Raja Daud pangisi ni Soba; jadi laho ma sidea hu Damaskus, lanjar marianan ijai, anjaha bangkit raja ma ia i Damaskus.
25 Imbang ni halak Israel do ia sadokah goluh ni Raja Salomo, sambor do pambahenanni songon si Hadad; magigi do uhurni masuk hu gomgoman ni Israel, gabe ia ma manrajai Aram.
26 Sonai homa si Jerobeam, anak ni si Nebat, marga Efraim hun Sareda, gamot ni Raja Salomo; inangni sada naboru, na dob mabalu, na margoran si Serua, ia pe manggeori do dompak raja ai.
27 Anjaha on do halani, ase manggeori ia dompak raja ai: Ipajongjong Raja Salomo do ijia milo, anjaha itambusi lombang ni huta ni si Daud, bapani ai.
28 Sada halak na magogoh do si Jerobeam ai, anjaha dob iidah si Salomo ringgas ni anak garama ai marhorja, ipabangkit ma ia gabe kopala ni parrodi na hun bani ginompar ni si Josep.
29 Ijia sanggah luar sahali si Jerobeam hun Jerusalem, jumpah Nabi Ahia na hun Silo ma ia i tongah dalan. Marmantel na baru do ia, anjaha sidea na dua ai do i ladang ai.
30 Jadi ijolom si Ahia ma mantel na baru, na pinaheini ai, iribakkon ma ai gabe sapuluh dua ribak.
31 Dob ai nini ma hu bani si Jerobeam, “Buat ma bamu sapuluh ribak, ai sonon do hata ni Jahowa, Naibata ni Israel, ʻTonggor ma, buaton-Ku ma harajaon in hun bani tangan ni si Salomo, anjaha bereon-Ku ma bam sapuluh marga.
32 Pitah samarga mando tading bani, halani juakjuak-Ku si Daud, pakon halani huta Jerusalem, na dob Hupilih ai hun tongah-tongah ni ganup marga ni halak Israel,
33 halani na dob tinadingkonni ai Ahu, gabe marsombah ia bani Astarte, naibata ni halak Sidon, bani Kamos naibata ni halak Moab, pakon bani Milkom, naibata ni halak Ammon, anjaha seng marparlahou ia bani dalan-Ku, seng ihorjahon na pintor bani matang-Ku, anjaha seng iramotkon titah-Ku pakon uhum-Hu, songon si Daud, bapani ai.
34 Tapi seng buaton-Ku ganup harajaon ai hun bani; paturuton-Ku do ia raja sadokah goluhni, halani si Daud juakjuak-Ku, na dob Hupilih ai, na manramotkon parentah-Ku pakon titah-Ku na dobni in;
35 tapi buaton-Ku do harajaon ai hun tangan ni anakni, anjaha berehonon-Ku ma bam sapuluh marga.
36 Tapi bereon-Ku ma hu bani anakni sada marga, ase tongtong adong sada palita bani si Daud juakjuak-Kai, i lobei ni bohing-Ku i Jerusalem, huta na dob Hupilih Bangku, bahen hajongjongan ni goran-Ku.
37 Antong Ahu do na pabangkitkon ho, ase rajaanmu ganup romban hu bani harosuh ni uhurmu, anjaha ho ma gabe raja manggomgom halak Israel.
38 Anjaha anggo itangihon ho ganup, na Hutitahkon in bam, anjaha marparlahou ho bani dalan-Ku, anjaha ihorjahon ho na pintor bani matang-Ku marhitei na manramotkon parentah-Ku pakon titah-Ku, songon na binahen ni juakjuak-Ku si Daud, jadi hasoman-Ku ma ho anjaha pajongjongon-Ku ma bam sada rumah na jonam tongtong, songon na dob Hubahen hu bani si Daud, anjaha ondoskonon-Ku ma bam Israel.
39 Jadi paetekon-Ku ma ginompar ni si Daud marhalanihon ni ai, tapi seng lalab.ʼ”
40 Halani ai ipindahi Raja Salomo ma sihol mambunuh si Jerobeam; jadi maporus ma ia hu Masir, hu bani si Sisak, raja ni Masir, anjaha i Masir ma ia paima matei Raja Salomo.
41 Barita ni si Salomo na legan ai, pakon ganup na binahenni ampa hapentaranni, ai lang tarsurat do ai bani buku Barita ni si Salomo?
42 Ia dokah ni Raja Salomo gabe raja i Jerusalem manggomgom ganup halak Israel ompat puluh tahun do.
43 Dob ai modom ma Raja Salomo rap pakon ompungni, anjaha itanom ma ia i huta ni si Daud, bapani ai; jadi si Rehabeam, anakni ai ma gabe raja gantihni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA