Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Rato Sulaiman lebur ka babine’an manca sabannya’na. Salaenna pottrena rato Messer, Sulaiman araji keya babine’an Het, Mo’ab, Amon, Edom ban Sidon.

² PANGERAN la adhabu ja’ oreng Isra’il ta’ olle akabin campor ban sa-bangsa jareya, sabab reng-oreng manca jareya bakal daddiya lantaranna oreng Isra’il nyemba ka la’-alla’an laen. Tape Sulaiman paggun araji babine’an dhari nagara manca.

³ Tre-pottre kaom agung se ekaraji Sulaiman badha pettong atos oreng bannya’na, dineng sellerra badha tello ratos oreng. Ji-rajina jareya se daddi lantaranna Sulaiman loppa ka Allah,

⁴ sampe’ e bakto seppona babine’an jareya ahasel nyacae Sulaiman nyemba ka la’-alla’an. Daud, ramana Sulaiman, esto ka PANGERAN, Allahna, tape Sulaiman ta’ padha ban ramana.

⁵ Sulaiman nyemba Asytoret, diba bine’na bangsa Sidon, ban Milkom, dibana bangsa Amon.

⁶ Kalaban cara se kantha jareya Sulaiman la dusa ka PANGERAN. Daud, ramana, atoro’ ka PANGERAN sampe’ ka dhalem atena, tape Sulaiman ta’ kantha jareya.

⁷ E attas gunong e temorra Yerusalim Sulaiman maddek kennengnganna kabakteyan ka Kamos, dibana oreng Mo’ab, ban kennengnganna kabakteyan ka Molokh, dibana bangsa Amon — se dhadhuwa’ jareya diba se majitjidan.

⁸ Ji-rajina se bangsa manca padha emaddeggagi bang-sebang kennengnganna ngobbar dupa ban ngatorragi kurban ka ba-dibana bang-sebang.

⁹ Sampe’ dhu kale PANGERAN, Allahna Isra’il, ngaton ka Sulaiman sarta maenga’ sopaja ta’ nyemba ka la’-alla’an laen, tape Sulaiman ta’ atoro’ ka PANGERAN. La’-mala’ mongkore PANGERAN, sampe’ PANGERAN duka.

¹⁰ (11:9)

¹¹ Dhabuna PANGERAN ka salerana, "Sarrena ba’na e dhalem kabadha’an enga’ etengnget nerrak parjanjiyanna ban Sengko’ ban ta’ ngestowagi Tang ta-parenta, bi’ Sengko’ karaja’anna ba’na ekala’a pas ebagiya ka sala settong dhari ponggabana ba’na.

¹² Sanajjan kantha jareya, polana Daud ramana ba’na, jareya bi’ Sengko’ ta’ ejalannagiya teppa’na ba’na gi’ odhi’. E bakto ana’na ba’na marenta, buru Sengko’ ajalannagiya jareya.

¹³ Tape ta’ sakabbinna karaja’anna jareya se ekala’a bi’ Sengko’ dhari ana’na ba’na jareya. Demi Daud Tang abdi, ban demi Yerusalim se bi’ Sengko’ la epadaddi Tang kottha reya, ana’na ba’na bi’ Sengko’ edina’ana bagiyan settong suku."

¹⁴ Daddi Hadad, toronanna rato Edom, bi’ PANGERAN epamosowan ka Rato Sulaiman.

¹⁵ La abit sabellunna jareya, saellana Rato Daud matellok Edom, Yowab, panglima angkadan perrangnga Rato Daud meyos ka Edom abendhemma reng-orengnga se mate. Nem bulan abidda Yowab ban reng-orengnga neng e Edom, ban e dhalem bakto nem bulan jareya mate’e sakabbinna oreng lalake’an e jadhiya.

¹⁶ (11:15)

¹⁷ Tape Hadad se e bakto jareya gi’ ngodha, buru ka Messer abareng ban reng-oreng Edom, iya areya la-kabulana ramana.

¹⁸ Se mangkat dhari Midian, terros ka Paran. E jadhiya badha reng-oreng laenna se noro’, pas padha abareng mangkat ka Messer ngadhep ratona. Bi’ rato Messer Hadad jareya eparenge bengko ban tana se daddiya kennengnganna sarta eparenge jaminan odhi’na.

¹⁹ Hadad pas akanca rapet ban rato Messer, sampe’ bi’ rato Messer, Hadad jareya eparenge eparra dibi’, iya areya ale’na din aju rato Tahpenes, epadaddi rajina.

²⁰ Saellana jareya rajina Hadad babar lalake’ se enyamae Genubat. Kana’ jareya eparaja bi’ din aju rato dibi’ ban epalenggi e karaton epapolong ban tra-pottrana rato.

²¹ E bakto Hadad narema kabar ja’ Rato Daud la seda, ban Yowab, panglimana angkadan perrangnga la seda keya, laju mator ka rato Messer, "Abdidalem nyo’ona edi abaliya ka nagara abdidalem."

²² "Ponapa?" ca’na rato. "Ponapa e ka’dhinto sampeyan kakorangan, me’ sampe’ abaliya ka nagarana?" "Abdidalem ta’ kakorangan pa-ponapa," saodda Hadad, "namong abdidalem nyo’ona edi palemana." Daddi Hadad laju abali ka nagarana.

²³ Rezon, ana’na Elyada, bi’ Allah epamosowan ka Sulaiman keya. Rezon jareya dunor se buru dhari lorana, iya areya Rato Hadadezer dhari Zoba.

²⁴ Rato Daud tao makala Hadadezer jareya ban mate’e ca-kancana Hadadezer dhari Siria. E bakto jareya Rezon buru dhari Hadadezer pas makompol reng-oreng sarta laju ngapalae garombolan jareya. Saellana jareya laju entar ka Damsyik ban reng-orengnga, terros neng e kottha jareya. E jadhiya bi’ reng-orengnga Rezon epadaddi rato Siria.

²⁵ Akantha Hadad, Rato Rezon ngamoso Isra’il e bakto gi’ odhi’na Sulaiman, sarta ngaco nagara jareya.

²⁶ Oreng laen se aberonta’ keya ka Sulaiman iya areya sala settong dhari ponggabana se anyama Yerobeyam. Yerobeyam jareya ana’na Nebat dhari Zereda e Efraim. Ebuna la randha, nyamana Zeruwa.

²⁷ Areya’ caretana pamberontaganna Yerobeyam jareya. Sulaiman nyoro sopaja tana e bagiyan lao’na Padalemman Socce etembuk, ban pagar alassa kottha sopaja epateppa’a.

²⁸ Yerobeyam alako e jadhiya keya. E bakto Sulaiman ngoladi ja’ Yerobeyam reya cakang ban bajeng, pas epassrae tanggung jawab, epakon ngawase lako paksa neng e dhaerana suku Manasye ban Efraim.

²⁹ E settong are Yerobeyam kalowar dhari Yerusalim. E tengnga lorong e talon aba’na epanggi’i Nabbi Ahiya dhari Silo, se e bakto jareya ngagem juba se anyar.

³⁰ Ahiya mokka’ jubana, pas ebit-sebbit sampe’ daddi dhubellas sebbidan.

³¹ Dhabuna Ahiya ka Yerobeyam, "Se sapolo sebbidan kala’ ba’na, sabab PANGERAN, Allahna Isra’il, adhabu kantha reya ka ba’na, ‘Karaja’an reya bi’ Sengko’ ekala’a dhari Sulaiman, sapolo suku bi’ Sengko’ ebagiya ka ba’na.

³² Settong suku paggun ekaandhi’a Sulaiman, demi Daud Tang abdi, ban demi Yerusalim, se bi’ Sengko’ la epele dhari saantero nagara Isra’il epadaddi Tang kottha.

³³ Bi’ Sengko’ epacara’a jareya polana Sulaiman la ta’ enga’ ka Sengko’ sarta nyemba la’-alla’an laenna, iya areya Asytoret, dewina bangsa Sidon; Kamos, dibana bangsa Mo’ab; ban Milkom, dibana bangsa Amon. Sulaiman ta’ atoro’ ka Tang parenta. Sulaiman ta’ akantha Daud ramana, se ta’at ka Sengko’ sarta atoro’ ka sakabbinna Tang parenta.

³⁴ Sanajjan cara jareya karaja’anna ta’ ekala’a kabbi ban Sengko’. Bi’ Sengko’ Sulaiman epapagguna neggu’ kakobasa’an saomorra. Sengko’ mapagguna Sulaiman neggu’ kakobasa’an jareya demi Tang abdi Daud, se la epele bi’ Sengko’ sarta se ta’at ka Tang kom-hokom ban sakabbinna Tang parenta.

³⁵ Karaja’an reya bi’ Sengko’ ekala’a dhari ana’na Sulaiman ban sapolo suku bi’ Sengko’ ebagiya ka ba’na.

³⁶ Tape settong suku se bi’ Sengko’ gi’ epapagguna ekaandhi’ ana’na, sopaja salanjangnga terrosa badha sala settong dhari toronanna Tang abdi Daud se marenta kaangguy Sengko’ e Yerusalim, kottha se bi’ Sengko’ la epele menangka kennengnganna oreng abakte ka Sengko’.

³⁷ Ban ba’na, Yerobeyam, bi’ Sengko’ epadaddiya rato Isra’il sarta ba’na olle marenta sakabbinna dhaera se ekakencengnge ba’na.

³⁸ Mon ba’na akantha Tang abdi Daud rowa, ta’at onggu ka Sengko’ sarta atoro’ ka Tang kom-hokom ban masenneng Tang ate kalaban ajalannagi pa-apa se eparenta’agi Sengko’ ka ba’na, bi’ Sengko’ ba’na ebarengngana terros. Bi’ Sengko’ ba’na epadaddiya rato Isra’il. Sengko’ ajamina ja’ toronanna ba’na daddiya rato Isra’il agante ba’na, padha ban se ejalannagi Sengko’ ka Daud.

³⁹ Polana dusana Sulaiman, Sengko’ ngokoma toronanna Daud, tape banne salanjangnga.’"

⁴⁰ E bakto meyarsa kabar jareya, Sulaiman pas aehteyar mateyana Yerobeyam. Tape Yerobeyam buru ka Rato Sisak e Messer, sarta neng e jadhiya sampe’ Sulaiman seda.

⁴¹ Careta laenna parkara Sulaiman, iya areya parkara sabarang se la elampa’agi sarta parkara pangataowanna, kabbi la ecathet e dhalem Caretana Sulaiman.

⁴² Sulaiman reya marenta Isra’il neng e Yerusalim abidda pa’ polo taon.

⁴³ Saellana jareya pas seda ban esareyagi e Kottha Daud, se agante daddi rato iya areya pottrana se anyama Rehabeyam.

1 Raja-raja

Video 1 Raja-raja 11

Ikuti Kami:

KONTAK | PARTISIPASI | DONASI