Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali saba kita naka pei koro i ngKerisitu rasesai, see naka to tao-tao kita buya seja rayanta mangarata kesesa sewaju ewa Ia. Apa tau to buya rayanya mangarata kasesa sewaju ewa i Kerisitu, tau etu tamo nakuasang nu dosa.
2 Wali ane ewa see si’amo pamporani ndaya nto lino to naluluka ntau etu ri raya ngkatuwunya ri lino si’i. Pamporani i mPue Allah semo to naluluka ntau etu.
3 Wali anu kita mangalulu pamporani to si Ia, si’a pamporani to si kita, apa tempo ruyu gana kojomo palaong to maja’a to nika ngkita. Palaong etu semo palaong to mangalulu pamporani ndaya ntau to taa mangaya i Pue. Apa tempo etu kita mangika lengko ngkatuwu to maja’a kojo. Kita mangika palaong to masipato rapokea, kita ojo mangaluluka yau pamporani ndayanta to maja’a, kita kayangu apa bae kojo manginu tule, kita mangika roa-roa to mawali palaong to masipato rapokea, pasi kita mawali marotai. Pasi kita mangika seja palaong to maja’a kojo nakita i mPue Allah, etu semo mampue resi tau-tau.
4 Wali tempo si’i yunu ngkomi to tempo ruyu etu, sira ipu rayanya apa komi tamo rani sindara-ndara pei sira mangika wo’u palaong to mapari kojo kaja’anya. Wali see naka sira manganto’o maja’a komi.
5 Pei i Pue Allah damangabotus sira. Tempo etu sira damampongakung resi i Pue Allah mangkonong samparia palaong to naika nsira samba’a pei samba’a. Apa tamo masae darata temponya i Pue Allah damangabotus samparia to lino, to tuwuwa pasi to matem. Wali masipato kita mangalulu pamporani to si Ia, si’a pamporani to si kita.
6 Wali kamonsonya boros yunu ngkita to madota mangalulu pamporani i mPue Allah etu, pei sira tiroo mangarata kapate apa saba sira mangaya Ia. Wali ane ewa pampobuuka nto lino, tau to etu mangarata seja huku i mPue Allah maka mate koro nsira, wali ane ewa see tare pasisalanya tau to mangaya pei tau to taa mangaya. Pei si’a ewa wetu apa ane tau to mangaya, tonii nsira tuwu singkasaenya sewaju ewa i Pue Allah. Wali etu semo sabanya naka pei sira roomo rapakarebaka kareba matao tempo sira tawa mate, see tonii nsira maya tuwu.
7 Wali samparia anu to mawali ri lino si’i mosumo temponya daroo. Wali see naka to tao-tao komi masilonga pampobuuka ngkomi pasi ta’amaka rayamu see komi makoro makai-kai resi i Pue Allah.
8 Pasi ri temponya komi tiroowa tuwu ri lino si’i, to bae kojo batuanginya komi masiporayang kojo. Apa ane komi mamporayang yunu ngkomi, see naka boros sala nu yunu ngkomi to taa danukitanaka ngkomi.
9 Pasi pakasanang mampalinggona tau to rata resi komi, pasi ne’e mangkambumbuka linggona ngkomi etu.
10 Wali yako ri kanotonya, see naka i Pue Allah roomo mangawaika kita malagi kojo sora mpangaya-ngaya darapake masisawang. Wali pakadota samba’a pei samba’a mangampake sora to nasarumakaka i mPue Allah komi etu.
11 Rapanya ane tau to rawaika kapande mampakarebaka sa’e, to tao-tao gombo i mPue Allah semo to ia mampakarebaka etu. Pasi ane tau to rawaika mangansawang sa’e, to tao-tao ia mangika palaong etu yako karoso to nawaika i mPue Allah ia. Wali ika ewa wetu see tau damangkita samparia to nuika ngkomi paka i Yesu Kerisitu pu’unya, see naka sira damangabarong i Pue Allah. Wali masipato ewa wetu apa Ia semo to masipato rabarong pasi to masipato maporenta rataka ri singkasaenya. Amin.
12 Wali a’i-a’i to kuporayang, komi re’e mangarata soba to mapari kojo. Soba etu raporapaka ewa apu to mangansoba komi. Pei ne’e ipu raya ngkomi mampobuuka soba etu, apa soba etu si’a palaong to taa rapobiasa resi kita to mangaya.
13 Pei to tao-tao ndende raya ngkomi apa komi mangarata seja santila kasesa to narata i ngKerisitu seore. Pasi ane ewa see, bae wo’u kandende ndaya ngkomi ane ratamo temponya kayawa i ngKerisitu darapapokitaka.
14 Wali ane komi nato’o maja’a ntau apa saba komi mangaya i Kerisitu, komi tiroo mangarata rasi. Naka pei komi mangarata rasi apa Nosa to pu’u ngkayawa, etu semo Nosa i mPue Allah, Ia maroo-roo siwaka pei komi. Wali nempo sa’e manto’o maja’a i Kerisitu, pei komi mangabarong Ia.
15 Pei ane komi mangarata kasesa, ne’e apa saba palaong to maja’a naka pei komi mangarata kasesa etu. Ewamo mampopate sa’e, malima, kara-kara, bara sangkani rani manganto’oka sa’e ewa wimba danaika palaong to si sira. Wali ne’e mangika palaong to ewa wetu, apa ane mangika palaong to ewa wetu, masipato kojo komi mangarata kasesa.
16 Pei ane komi mangarata kasesa saba komi tau Kristen, ne’e mea. Ojo barong i Pue Allah apa saba komi tau Kristen apa bae kojo batuanginya resi komi.
17 Wali barong i Pue Allah, apa si’i semo tempo to darapangabotus to lino. Pasi kita to ana i mPue Allah, kita semo to uyunya rabotus. Wali ane kita to ana i mPue Allah taa maya taa rabotus, gete, taa manto’o tau to taa mampolaika kareba matao to yako resi i Pue Allah. Mapari kojo huku to danarata nsira!
18 Wali kono kojo gombo to ratulis ri raya ntuntu i mPue Allah, to manganto’o, “Sakowa tau to lengkonya singkonong pei i Pue Allah masesa nepenya panewa rapalaes. Wali ane ewa see, mapari wo’u huku to danarata ntau to mangewa i Pue Allah pasi to madosa.” Etu semo to nato’o ntuntu i mPue Allah.
19 Wali kamonsonya matempo-tempo kita mangarata kasesa apa ewa wetu pamporani i mPue Allah resi kita, wali ne’e kita mandoo mangika palaong to matao. Apa tau to mangansesai kita tamo masae sira darahuku. Wali anu kita ojo mansarumakaka resi i Pue Allah katuwu ngkita. Apa Ia semo to nampapowali kita pasi Ia masipato rasarumaka.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA