Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kristus mboto nombarasai kasusa bo kapari tempo Ia natuvu ri dunia hitu. Jadi haitumo sabana komiu muni kana mompakaroo raramiu ala masadia mombarasai kasusa bo kapari nasimbayu mpo Ia. Apa isema-sema nombarasai kasusa bo kapari ri karona mboto domo nadota novia dosa.

² Jadi da natuvu riara dunia hitu, komiu kana matuvu mangoseaka dota nu Alatala, nee mangoseaka dota rara manusia anu nadaa.

³ Apa naganamo logamiu bara ipia nangoseaka pokainggu-pokainggu ntona ledo nosisani nte Alatala. Bara ipia komiu aga natuvu nangoseaka dota raramiu nadaa ante pokainggu naruto, komiu nabiasa nalangu-langu, komiu nasiromu nangande mpebasa bo nanginu, bo komiu nompakande tupu-tupu ntanina, pokainggu anu nepakarunggu.

⁴ Tapi sii-sii nahera roa-roamiu sabana komiu domo nangoseaka ira nompebasa nokainggu nadaa ante ledo ria rekena, bo haitumo sabana niasalaira komiu.

⁵ Tapi makava tempona, ira kana mompangaku poviara nadaa haitu ri ngayo nu Alatala. Bo Alatala nasadiamo mombatangara pura-pura tona, nau tona da natuvu bo muni tona namatemo.

⁶ Haitumo sampe Kareba Belo nipatolele muni ka tona namatemo. Ira namatemo sabana pehuku nu Alatala, nasimbayu nte pura-pura manusia ntanina. Tapi Kareba Belo nipatolele ka ira ala nyawara mamala matuvu mabelo mangoseaka dota nu Alatala.

⁷ Naparamo kaupu nu dunia. Jadi komiu kana mainga bo mompakanoto raramiu ala komiu mamala mosambaya.

⁸ Tapi anu nelabi nopoko, komiu kana mpuu-mpuu mosimpotove. Apa ane kita mompotove roata, kita masadia muni mombaampungi tona ntanina.

⁹ Komiu kana majole mantarima torata riara banuamiu bo nemo mongau-ngau.

¹⁰ Kita simbo nidekeika pompakule ledo nasimbayu lako nte Alatala, bo kita kana mompake pakabelo pompakule nipatava ka kita mombatulungi tona ntanina.

¹¹ Jonjona, isema-sema nidekeika pompakule mompasimbayu Tesa nu Alatala kana motesa mpo tona niposumba nu Alatala mboto. Isema-sema nidekeika pompakule mantulungi tona ntanina, kana mantulungi ante karoso nidekei nu Alatala ka ia. Pakemo pompakule-pompakule haitu ala nau damo nuapa majadi, Alatala ratoiya bo rabila sabana anu nipovia i Yesus Kristus ri katuvumiu. Alatalamo nakuasa bo masipato ratoiya bo rabila sampe ri kasae-saena. Amin!

¹² Sampesuvu-sampesuvu nipotoveku, nee mahera komiu nombarasai susa bo pari nantamo mpuu, eva kapane nu apu. Haitu najadi mompakaliangu pomparasayamiu. Nee mahera bo nee rapekirimiu kasusa nirasaimiu haitu ledo ria kasimbayuna.

¹³ Kakanana komiu kana madamba, sabana komiu nombarasai kasusa bo kapari nasimbayu mpo anu nirasai i Kristus mboto. Apa ane komiu nombarasi susa bo pari mpo nirasai i Kristus, mambaso mpuu kadamba nu raramiu tempo Ia makava mpanjili. Tempo haitu, kaoge i Kristus anu nipokumaaka rapopakita ka pura-pura manusia.

¹⁴ Ane komiu rasalai ntona sabana komiu nangoseaka i Kristus, kana masana mpuumo komiu. Apa ane komiu rasalai sabana pomparasayamiu, batuana Nosa Gasa nu Alatala anu nakuasa, naria mpuu riara nggatuvumiu.

¹⁵ Nee sampe maria komiu mombarasai kasusa sabana nepatesi bara nangangga bara novia anu nadaa atau nombagalo urusa ntona ntanina.

¹⁶ Tapi ane komiu mombarasai kasusa sabana komiu topomparasaya, nee maeya matamiu. Ulimo tarima kasi ka Alatala, apa komiu mpuu-mpuu topangoseaka i Kristus.

¹⁷ Nakavamo tempona Alatala mombatangara pura-pura manusia. Bo kita todeaNa mboto mokolu ratangaraNa. Ane kita todeaNa mokolu ratangaraNa natantu mantamo mpuumo pehukuNa ka tona ledo nadota nomparasaya Kareba Belo lako nte Ia!

¹⁸ Riara Buku Gasa nitulisi ivei: "Iyapa tona nanoa nakaja rapakasalama, Nemopa tona nadosa anu ledo natundu nte Alatala!"

¹⁹ Jadi sampesuvu-sampesuvu, ane dota nu Alatala komiu kana mombarasai kasusa bo kapari, nee menonto movia nabelo. Sarumakamo Alatala manjaliku komiu. Apa Iamo nompajadi komiu, bo Ia namala raparasaya mompakadupa pojanjiNa ka komiu.

1 Petrus

Video 1 Petrus 4

Ikuti Kami:

KONTAK | PARTISIPASI | DONASI