Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mangkami Almaseh mperasai kamapa'dikan jao kaju sitamben. Iamo joo moi kamu' la sadia toda kamu' mperasaii susi to naperasai Almaseh. Sanga ia to tomangkamo mperasai kamapa'dikan susi joo cia'mo mpugauk dosa.

² Jaji, ia mituo unapa lan tee lino la nturu' kamu' pakkaeloran-Na Puang Allataala, danggi' mituru' pakkaeloran penawammi.

³ Gaja sainmo kamu' mpugaukki to panggaukanna totangnturu' Puang. Susinna manggauk sala, nturu' kamadoangan gaja', pangmalangoan, kumande-mande, mangngiso'-iso', na passompan mesirisan lako dewata.

⁴ Na ia tee too jangngahhi joo totangnturu' Puang, sanga te'damo mituru'i panggaukanna tau to liwa' gaja', to da'tan bang mpugauk dosa. Jaji, iamo napau gaja' kamu'.

⁵ Apa la napebalii to panggaukan gaja'na lako Puang Allataala keanu'. Sadiamo Puang Allataala la rra'tah kara-karana la totuo, la tomate.

⁶ Iamo joo namangka toomo dipangpeissenan to Kareba Kasalamatan lako joo tomatemo, dikua nannampa' katuoan melo te'da cappa'na situru' pakkaeloran-Na Puang Allataala, moi namangka mate susi to biasa jaji lako tolino.

⁷ La ndete'mi tampakkana tee lino na sininna apa. Iamo joo la mita'tan to kalemi, na majaga too kamu' ammitatta' massambajang susi to sipato'na.

⁸ Na ia to kaminang parallu, la mattongan-tongan kamu' sipakamoja', ammisisulle sidampangan.

⁹ Tarima meloi to padammi tomatappa' jio bolami, danggi' mimangnuku-nuku.

¹⁰ Pada nabenmo kamu' Puang Allataala to mangrupa-rupa barakka'. Iamo joo pada la mipake meloi joo barakka' situlung.

¹¹ Ia to tomangngajah la mangngajahhi susi tonasuanni Puang Allataala. Na ia to tontulung padanna rupa tau, la mangtulung situru' kapakullean to nabenni Puang Allataala. Ia ke susimi joo la napakala'bih tau to Puang Allataala sanga Puang Isa Almaseh. Tomakuasa to Puang Allataala na sipato' dipakala'bih tarruh te'da cappa'na. Amin.

¹² Ee, tomala'bihku' to kupakamoja'! Liwa' kamu' maparri' tee too, sanga diujii to kamatapparanmi anna dikita kumua mattongan-tonganra kamu'ka matappa'. Apa danggi' mipujangngahhi susi kumua den apa makalaen-laen rratui kamu'.

¹³ Apa sibalikanna la mipumasannangri nasaba' turu' toomo kamu' mapa'dik sola Almaseh. Ia ke susii joo la mario tonganmo kamu' ke dipakitanmi tolino to kamala'biran-Na Almaseh.

¹⁴ Ia ke dicapa'-capa' kamu' sanga taun-Namo kamu' Almaseh, la masannang kamu', nasaba' ia joo mpamanassai kumua nakuasai kamu' Roh Mala'bih, iamo to Roh Allataala.

¹⁵ Danggi' lalo naden tau lan tangnga-tangngami to mperasai kamaparrisan nasaba' pabunoi, pangbokoi, togaja'i iarika tonnurusu' jamanna tolaen to tangngia urusanna.

¹⁶ Ia ke maparri' kamu' sanga Tosarani kamu', danggi' mipumasiri'i, apa sibalikanna la mpakala'bih kamu' Puang Allataala, nasaba' tonturu'mo kamu' Almaseh.

¹⁷ La nadete'mi wattunna Puang Allataala la rra'tah kara-karana tolino. Ia to kita' umma'-Na Puang Allataala la nara'tah jolo to kara-karata'. Ia ke susimi joo, apa pole'pa la naperasai tuu lako tau to cia' ngkatappa'i to Kareba Kasalamatan jio mai Puang Allataala.

¹⁸ Den diuki' lan Sura' Allataala kumua, "Ia ke masussai dipasalama' to tomelo, apa pole'pa la jaji lako to tomadosa, to cia' mpesa'dingngi Puang!"

¹⁹ Iamo joo, ia ke den tau maparri' nasaba' nturu'mo pakkaeloran-Na Puang Allataala, la sande'i lako Puang Allataala na mpugauk tarruh kameloan. Sanga ia to Puang Allataala, to mpadenki', tuli napugauk to basse-Na.

1 Petrus

Video 1 Petrus 4

Ikuti Kami:

KONTAK | PARTISIPASI | DONASI