Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ai pe, halani na dob marsitaronon Kristus ibagas pardagingon, uhur sisonai ma gabe sinjata age bani nasiam, ai barang ise na manaron bani pardagingon, maronti do ia mangkorjahon dousa,
2 ase ulang be nasiam manggoluh marguru hubani hisap-hisap ni hajolmaon, tapi marguru bani rosuh ni Naibata ma, barang sadiha dokah nari nasiam ibagas goluh on.
3 Ai sungkup ma panorang na dob salpu in marpambahenan nasiam domu hubani harosuh ni sipajuh begu-begu, ai ma marparlahou ibagas goluh na so marrantei, hahisapon, parmabukon, parmangan-manganon, parminum-minumon, ampa pambalosion bani gana-gana sihagigihonon ai.
4 Ai na ganjil ma ai ninuhur ni sidea, na so dihut ai be nasiam mandalankon pambahenan ni sidea na butak anjaha na so margagan ai, gabe manrisai ma sidea.
5 Tapi maningon martanggung jawab do holi sidea bani Naibata, na sirsir manguhum na manggoluh ampa na matei.
6 On do halani ase iambilankon Ambilan Na Madear age bani na dob matei, ase manggoluh sidea ibagas partonduyon halani Naibata, age pe hona uhum ibagas pardagingon mangihutkon hajolmaonni.
7 Tapi domma dohor ujung ni haganup. Ai pe maruhur ma nasiam, anjaha torang ma uhur nasiam martonggo.
8 I lobei ni haganup, marsihaholongan botul ma nasiam, ai irungkub holong ni uhur in do buei dousa.
9 Marsitamueian ma nasiam, ulang ibagas ungut-ungut.
10 Marsipadear-dearan ma nasiam marhitei sibere-bere idop ni uhur na jinaloni bei songon sijolom anakkunsi na bujur bani bagei-bagei ni idop ni uhur ni Naibata.
11 Anggo adong na marsahap songon pangkatahon ni Naibata ma, anggo adong na marugas, domu hubani gogoh na binere ni Naibata ma, ase bani haganupan ai ipasangap Naibata marhitei Jesus Kristus. Bani ma hasangapon ronsi sadokah ni dokahni. Amen.
12 Nasiam hinaholongan, ulang ma pala longang nasiam pasal hamilason in, na roh manguji nasiam, ulang ma pala songon na ganjil in, ninuhur nasiam.
13 Tapi malas ma uhur nasiam, anggo saor nasiam bani sitaronon ni Kristus in, ase bani partalar ni hasangapon-Ni ai marmalas ni uhur homa nasiam anjaha marolob-olob.
14 Martuah do nasiam, anggo hona risa nasiam halani goran ni Kristus, ai sogop do bani nasiam Tonduy Hasangapon, Tonduy ni Naibata.
15 Ulang ma adong hun tongah-tongah nasiam na manaron halani mamunuh, barang manangko, barang marjahat, barang halani mangurus na so siurusonni.
16 Barang ise na marsitaronon halani halak Kristen ia, ulang ma maila ia, tapi ipasangap ma Naibata marhitei goran in.
17 Ai jumpah ma panorangni madabuh uhum, mamungkah humbani Rumah ni Naibata. Ai anggo parlobei hun banta, sonaha ma ujung ni na so mambalosi Ambilan Na Madear, na humbani Naibata?
18 Ai anggo narus lang maluah halak parpintor, huja ma gakni halak na so daulat anjaha sipardousa ai?
19 Halani ai, na marsitaronon halani rosuh ni Naibata, iondoskon ma tonduyni hubani Sipanompa hatengeran in, marhitei na mangkorjahon na madear.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA