Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lantaran ki Kristus ain nokorasa kon roriga in awak na'a, daí tua musti umuran kong gina makow baí umuran moropot im pirisaya monimu. Sing ki ine inta nokorasadon kon roriga in awak, yon diaí bidon in sia mogaid kon dosa.
2 Manangka intua, kobiagdon mo'ikow kon singgai mo'iduduimai podudui onu inta kino ibog i Allah, bo de'emanbií dumudui kon ibog in intau.
3 Sin nobayongdon totok in wakutu inta pinakeí monimu nogaid kon onu inta kino ibog in intau mita inta diaí nonota'au ko'i Tuhan. Diaí mopia ing kobobiag monimu. Mo'ikow dinumudui kon ibog in awak, monginum dapot im moḷoḷangu, umuran mogaid kon rame inta diaí im baragunanya, monginum moyotakin bo mosumbah kom berhala inta ilarang i Tuhan.
4 Tuamai intau mita inta diaí nonota'au ko'i Tuhan noherang sim mo'ikow nobiagbií naí kobobiag monia inta umuran mogaid kon dosa pomuḷoi makow. Manangka intua mosia moningkule ko'i monimu.
5 Ta'e mosiabií i motanggungjawab kom bayongan tua kon tayowon i Allah inta ain nobasadia mohakim kon intau inta nobiag bo intau inta aim minatoi.
6 Manangka intua Habar Mopia pinota'au domandon kon intau mita inta aim minatoi. Makusudnya baí mosia adilon doman naí intau mita inta koaíwakpa, bo roho monia mobiagdon podudui kon ibog i Allah.
7 Kopaḷutan yagi-yagi motoyongdon. Tuamai ḷukadaidon kopira in awak monimu bo umuran mokopo'onow kon raian simbaí mo'ikow mota'au mosambayang.
8 Tongaí soaáḷ tana'a inta totok moponting, mo'ikow musti totu-totu'u mositabian tobatuí bo tobatuí, sin aka mo'ikow bo mositabian daí mangalenya kon tua mo'ikow mo'ibog doman mosiampungan.
9 Bo mo'ikow musti mota'au mosipasiaran kom baḷoi takin diaí mogamui.
10 Mo'ikow komintan bidon noko'ulií kon totabi mita inta noyo-noyoposi nongkon i Allah. Tuamai saḷaku mogogaid mita inta mopia pakeídon kopira onu inta aim pinonotabi i Allah tatua sim pogaid kong kopontingan moyotakin.
11 Intau inta mopoyaput in habar, sia mustibií mopoyaput in habar nongkon i Allah, intau inta mobantung kon intau ibanea, mustibií pakeíonnya in ropot inta nongkon i Allah, simbaí kom bayongan yagi-yagi ki Allah in dayowon pongin i Yesus Kristus. Sia tua ing kitogi kamulia'an bo kawasa inta mononoi. Amin
12 Utat mita inta kotabiku! Tana'a mo'ikow mororiga totok sim ponungkuḷan ko'i monimu. Ta'e dikabií moherang, naonda bo oyuíon inta totok motoyang in nobalií ko'inimu.
13 Mokoposanangbií kong gina sim mo'ikow nokorasadon kon naí inta ain kinorasa'an i Kristus. Daí aka kamulia'an i Kristus popo'ontongdon, yo totokbií im mopia ing gina monimu.
14 Kopiabií ing gina monimu aka singkuleon sin lantaran mopirisaya ko'i Kristus, tua mangalenya Roho momulia inta Roho i Allah umuranbií kotaki-takin monimu.
15 Dikabií tobatuímai kon sigad monimu, roriga'an sin lantaran moḷoḷimod in sia, andeka mononakow, andeka nogaid kon inta mora'at, andeka intau inta mo'ibog kumapog kon urusan intau ibanea.
16 Ta'e aka mo'ikow bo roriga'an lantaran mopirisaya ko'i Kristus, daí dikabií i mo'ikow mo'oyak. Posukurdon ko'i Allah, sim mo'ikow nodia kon tangoi i Kristus.
17 Sin na'a bidon wakutu i Allah momangkoi mohakim kon dunia na'a, bo umatbií i Allah inta muna-munamai hakimon. Daí aka kita inta mopirisaya bo hakimon doman, yo onu im mobalií ko'i monia inta diaí mopirisaya kon Habar Mopia nongkon i Allah tua?
18 Kom bonu im Buk Mosuci aim pinais nana'a, "Aka intaupa mita inta mopia mororiga doman totok im posaḷamaton, yo onudon degaí im mobalií ko'i monia inta diaí mopirisaya ko'i Tuhan bo inta mogaidmai kon dosa?"
19 Manangka intua intau inta iroriga podudui in ibog i Allah, kobiagbií mokopotoḷutui in sia, bo posarakaidon ing kobiagannya ko'i-Nia inta nomia ko'i monia, sin Sia in umuranbií mogaid kon onu inta aim pinodandi-Nya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA