Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Amangorik'an poí nia ka sia Kristus ka putubuat, oto kam leú et ka kam, buítá nuparon kam ka kam paatuatmui kelé pupaatuanan nenda. Aipoí sia sipangongorik ka putubuat, táan te ragagalai mitsá jo.
2 Oto kau ipaakkup puparaboananmui ka gogoi sibabara ka polak néné, kelé siripot obaket bagat Taikamanua, buí kelé ka siripot obaket bagadda sirimanua.
3 Siburú, bulat amaburúan anugalaiaké kam galajet siripot siobat bagadda sipuarat sabulungan. Tá maerú puririmanuamui. Siripot pubobot-bot akkulámui lé nugagalaiaké kam, iaté mupuineng, mupunen sabeu, muló, samba masibuluji sabulungan ka enungan kasit-sit'akenen.
4 Tápoi kineneiget geti, bulat amakiseian ka bagadda sipuarat sabulungan ka tubumui, kalulut taitutut'akémui galai tubudda, masinanam jo sitaiaatuakenen. Iaté lulunia rapalololoi kam.
5 Tápoi rapepertanggung jawab'aké te ka tubut Taikamanua, simatarek masiadili sipuririmanua sambat simamatei.
6 Iaté lulunia aitusegéaké Katuareman Simaerú néné ka tubudda sirimanua simamatei. Bulé sia siadili siripot ka putubuat, kelé pagalaiat sangamberi sirimanua buítá tuadili, bailiu murimanua siripot ka puketsanan, sipasesese ka siobat bagat Taikamanua.
7 Iaailingan lé te katukappulatnia sangamberinia. Oto kalulut néné, kau nukera kam tubumui ka sikataí, samba nupanuksuk kam, bulé ioi nupaniddou kam.
8 Bulat ka uddut sangamberinia, kau bulat nupakaté kam baga pasasambamui, kalulut ké apakatéan kam baga pasasambamui, bailiu matarekmuian leú te paappé jo pasasambamui.
9 Kau nusiló kam kaooira saalei ka lalepmui sene-senemui, tápoi tá ka sanet paatuat.
10 Aipoí kam sangamberimui anusilóan kam panguruat sitaimakeré sibara ka Taikamanua. Oto siripot sipuoni sipasikeli sipulelelek panguruat Taikamanua, kau nupakei kam puaagaimui néné, sibailiu puuktunganmui simakeré.
11 Sia sipakakra katuareman simaerú, buítá rapakakakra katuareman simaerú sibara ka Taikamanua; sia sipuukú sabagei, buítá rapasikeli sia, siripot ron sibara ka tubut Taikamanua, bulé ka sangamberinia, onin Taikamanua tuumun'aké, kalulut Jesus Kristus. Aipoí nia lé sibakkat gege simateú umun'akenen teret buru-burú. Amen.
12 Ale kam Sasarainamai simanuntut bagamai! Kineneiget bulat ai kam mangongorik simakopé, kalulut aituuji kam. Tápoi buí imakisei ka bagamui, nupaatu kam kelé ai sibabara bulat simakopé, ka tubumui.
13 Tápoi siripokatnia muaangká lé kam baga, kalulut aian kam ka kam mangongorik sambamui Kristus. Oto ké atupatoiláan baí pulatsanan Kristus, sedda peité puangkámuian baga.
14 Mauktuk te kam ké rapaloloi kam kalulut puoonimui sipasiului Kristus. Nenda te masipatoilá kababarania Ketsat sipulubeunan, iaté Ketsat Sipunenan, ka tubumui.
15 Buí lé ibara ka talagamui sipango-ngorik kalulut pasimamateiakéna sirimanua, elé pananangkou nia, elé kalulut kataí paraboatnia, elé kalulut ialá galajetda sabagei.
16 Tápoi ké geti kalulut pu-Kakaritenmui nupangorik kam, buí numaila kam kalulut nenda. Kua lé kam surá ka tubut Taikamanua, kaooinia nusegéaké kam onin Kristus.
17 Aiailingan te tetrenia iadili polak néné, Taikamanua. Iaadili boikí, iaté sapaamian Taikamanua. Oto ké ka tubutta boikí itaddaaké nia, kipangan lé muaaili ka tubudda ka sia sitaimatonem baga ka tubut Katuareman Simaerú sibara ka Taikamanua?
18 Ka Buko Sipunenan ai atusurat'aké kisé, "Ké beringan sia sirimanua simaerú paraboat amabesían itupaarau sia, kipangan pá muaaili ka tubudda ka sia sirimanua sijo, sitaiagai si Tuhan!"
19 Oto ké ai sia sipango-ngorik ka teú bagat Taikamanua, buítá rapuparaboat simaerú, samba rasegéaké tubudda ka tubut Sipasibabaraaké sia. Aipoí mariu-riu lé ipuaili sitonéakenennia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA