Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Erkiteken Kristus nggo ngenanami kiniseran kula, kam pe arus ipersenjataindu bandu alu perukuren si lit i bas Ia tupung e. Sabap kalak si ersada ras Kristus i bas KiniseranNa, nggo ngadi erbahan dosa.
2 Emaka kidekah kam nggeluh denga i doni enda, kegeluhenndu arus ikuasai peraten Dibata, labo kerincuhen manusia.
3 I bas paksa si nggo lepas nggo cukup ndekah kam ngaloken perbahanen-perbahanen si merincuh usur kalak si la nandai Dibata ngelakokenca. Kam nggeluh alu la meteh mela, iikutkenndu kerincuhen dagingndu, mabuk-mabuk, pesta minem-minem si nggesuh, nagih minem inemen si erbahanca mabuk, janah nembah man berhala-berhala eme perbahanen si erbahanca manusia mbau.
4 Tapi genduari mamang ate kalak si la nandai Tuhan kenca lanai ikutkenndu ia i bas kegeluhen si la mehuli e. Perbahan si e me maka kam ihinana.
5 Tapi man Dibata arus ipertanggung jawabkenna dirina, e me man Dibata si nggo sikap ngadili kalak si nggeluh ras si nggo mate.
6 Erdandanken si emaka Berita Si Mehuli nggo iberitaken man kalak si genduari nggo mate, gelah aminna pe ia nggo kena ukumen kematen secara daging bagi kerina manusia, tapi secara pertendin ia terus nggeluh alu kegeluhen Dibata.
7 Kerina si nasa lit nggo ndeher kedungenna. Dage kuasailah dirindu janah petenenglah ukurndu gelah ngasup kam ertoto.
8 I babo si e kerina, sikeleng-kelengenlah kam alu tutus, sabap keleng ate namburi melala dosa.
9 Metemue lah kam alu la jungut-jungut.
10 Sekalak-sekalak, selaku pengurus si mehuli i bas pemere Dibata si pelain-lain e, si IberekenNa erpalasken lias AteNa, arus nggunaken pemere e guna kiniulin kalak si deban.
11 Kalak si ngerana, ngeranalah alu kata-kata si tempa-tempa rehna i bas Dibata nari. Kalak si nampati, isampatinalah kalak alu gegeh si ibereken Dibata man bana, gelah i bas kai pe ipuji kalak Dibata arah Jesus Kristus. Ia me si mada kemulian kuasa seh rasa lalap. Amin!
12 O senina-seninangku si kukelengi, ula kam sengget erkiteken percuban si mberat si sangana ngkenai kam, tempa-tempa kejadin si luar biasa sangana reh man bandu.
13 Tapi meriahlah atendu sabap kam ikut muat bagin i bas kiniseran Kristus, gelah kam dem alu keriahen asum kemulian Kristus ipetangkas.
14 Malem me atendu adi igombang-gombangi kalak kam erdandanken kam ajar-ajar Kristus. Si enda nuduhkenca maka i bas kam ringan kesah si mulia, e me Kesah Dibata.
15 Adi ngenanami kiniseran kin kam ula erkiteken ia sekalak pemunuh, ntah penangko, ntah kalak jahat, ntah pe icampurina urusen kalak si deban.
16 Tapi adi kam ngenanami kiniseran erkiteken kam kalak Kristen, ula iakapndu mela kerna si e. Tapi katakenlah bujur man Dibata erkiteken kam igelari alu gelar Kristus.
17 Nggo seh paksana Dibata mulai ngadili doni enda. Anak-anak Dibata me si perlebena iadili. Janah adi kita lebe iadili kuga nge dungna kalak si la nggit ngikutken Berita Si Mehuli si rehna i bas Dibata e nari?
18 Bagi lit tersurat i bas Pustaka Si Badia, "Kalak si bujur pe mesera guna iselamatken, apai denga ka kalak si la ngakui Dibata ras kalak perdosa!"
19 Emaka kalak si ngenanami kiniseran rikutken peraten Dibata, alu perbahanenna si mehuli iendeskenna min kerina geluhna man Si nepa ia, si tetap nehken PadanNa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA