¹ Em ba habe anakan egwe gwenan? – aha nik de Kristen bose zemka gublunna, “Zen ano kire-kiresa sowekam golka,” ahaksa, “Zen ano wesya kahalo gwibirki,” em ba habe hwena Alapsa de tame tan srem teipsin zi sin dep kiresa olhal gwenan? – zewe de tap gun hupye. Diki Alapsa de dawemkam taibliblan wesyan dep emaka olhal gwenan– zen de tap gulzimdin hip.
² Em san home tame uꞌin? Alap mo hlil irin wenya nen esa lamkam okamanak de karek gol gwen zisi klis ul. Zep kirekam de lwankam, em ba habe bete-tekna insa ere mae mo ngirinnik klis ul srem gwe-gweꞌan?
³ Em san home anakan tame uꞌin? – “Nen dekam esa hen Alap mo dam taha nakore zini klis ul.” Zep em sap esa angkam okamana awe dena klis ul gwer.
⁴ Zep ebon mae onakon de banakare karek mae jowenkam, em san esa totore zi sin dep olsong gwe-gwer? – men zen eno mae mo jematnak bosena lwazim srem gweꞌanke, zen de ep tap gul gwizimdin hip.
⁵ Em kirekam ema enaka saher la gwibiꞌin. In dwan ere mae mo jematnak kike– aha-en mae, enlala blal tolaye! Zen zen maka tap gulsuk gwizimꞌira.
⁶ Hwena em Kristen zini ere mae mo kareksa ema tingare zi mo nwenak olwet so gwenan– eKristen gwen srem teipsin zi sin de gol hankamye.
⁷ Kristen zini ebon mae onakon ahanik de wal bose zemka teipsin zi hon gublunna, “Zen man asa sowe taka,” dekam mes dam gwesinin, “Em Kristen zi mo lowehen nakon mese elanga gwesik.” Diki dawemna emaka anakan eenlala gwe-gwenan, “Zen sap sa kirekam asa sowe ta gwera hen karek ta gwera.”
⁸ Hwena eno mae mo enlalana anakarekam lwa gwizimꞌira, “Ëe sap asa hwe-hwekam ere mae mo Kristen bosesa karek la gwibir.”
⁹ Em san mese eeititi gwek? – “Men zen kareksa nulin halasen gwenan, zen molya Alap mo irik ginnik biti gwek.” Bahem enaka boton ta gwibin! Anakare zini bejen biti gwen: swi enkam de elowehe gwen wenya, kahalo soson wenya, zi bosyan han de inisin makan egwe gwen wenya, hen we walya, we wal bose zeban de kirekam egwe gwen wenya, hen yang tasin dowal hap de boklesa kom so gweblan wenya.
¹⁰ Hen ahakon sowe tam wenya, te-ala beya gwen hap de hole-hle wenya, ho mamaksa de otdeblanda gwen wenya, aha zisi de lamang ta gwibin wenya, hen asaskam de zi mo kire-kiresa alal ta gwen wenya. Kirekam de wenya, zen molya Alap mo irik ginnik biti gwek.
¹¹ Orep em hen ahakon kirena. Hwena angkam Alap mes emsa kirekam de karek-karek nakon ngan tasibirki. Zep angkam em mese engan gweher. Em kime Bian Yesussu laibliblak, hen Alap mo Enhona kim emsa ing gwe hebiridaka, Zen dekam zep emsa gubiridaka, “Angkam zen mes edakastil– ere mo nwenakye.” Zep bahem etan kirekam de karekna syal gwe-gwibin.
¹² Hwena ebon mae onakon, ahakon sa ano ol jalse gwenna insa husus neibir. Zen anakan sa ding nul, “Nen Kristen zini sap esa banakare maesa syal ei gwibir.” Hwena ee ama kire zisi ding gulzimꞌin, “Banakare maesa de syal gwibinkim diki nonol enaka de anakan takensibirida gwenkam airis, ‘San ha syala an Kristen zini abe hap man sam gwesibliꞌan? San ha dowal mo kigi mo wan-wan tan sane dekam ang gweꞌan? – Yesussu dikim hli tan hap.’”
¹³ Hwena ahakon hen sa ano jalse gwen ola insa husus neibir, zep sa anakan egul, “Neno mae mo timni tembane hap man esam gwesik gwenan, hen tim niban tembane naban esa lamkam okamanak hli kosol. Alap ang en naka sa ngaya tabiri, zep sap esa angkam nenaka de goleinik gwe-gwen sremkam tembane ta gwer.” Zen hwena tembane en hap hom kirekam zenaka yasik da gwibirin. Zen hwena a kirekam mo srip nulsuk gwenan, “Sap esa okamana awe en dep de tim niban eswi soson gwe-gwer.” Hwena eiwa dena, Alap hom timni nebe mae hap golzimki– dekam de nere mae mo hole-hle san ang ta gwen hapye. Neno mae mo timni, zen Bian zere mo dena, hen Zen man kara ta gwibirida.
¹⁴ Sap Alap mes Bian Yesussu tin nikon tim niban ngaya taka. Zen in zep sa hen nesa zere mo sosonkam kirekam ngaya tabiri. Zep nen bap nen nere mae mo timni karek ta gwibin.
¹⁵ Em dwan mes-eme anakan tame uk, “Ano mae mo timni an, zen Kristus mo timnik mas gwinꞌin.” Ki san ha man sam gwesiꞌin? – Kristus mo hlina insa de swi soson wenyik mo tim niban aha-en son hapye. Kina ki bejen!
¹⁶ San ha em home anakan tame uꞌin? – “Men nara swi soson wenya ban swi enna, dekam zeno nik mo timni mes aha-en nenan.” Sap Alap mo olak man lwak, “Zen dekam san de aha-ere timni kiye.”
¹⁷ Diki Bian Yesus hun de zeraha-en gwenkam airis. Dekam Bian mo Enho naban zini in mo enho naban aha-en.
¹⁸ Kahalo gwen hap de enlalasa emki langa tasin. Sap tingare ahakore karekna, zen hom timnik makan gwe-gwenan. Hwena kahalo gwenkam, zen ere mae mo timsie kim karek ul gwenan.
¹⁹ Em san mese eeititi gwek? – “Eno mae mo timni in, zen Alap zere mo Enho mo gol sake.” Sap Alap mes zere mo Enhona eno mae mo enhonak ing ta soneka– Zen de dekon emsa golegwe gwen hap. Zep em en home ere mae mo timni bi eibiꞌin. Zen Alap bi gwibiꞌira.
²⁰ Zen mes emsa kwisisa de zerzimdinkim zere mo jala kon gwiswe soneka. Zep eno mae mo timni in, zen diki Alap zere mo bose ensa dikim teip gulsuk gweblan en hap zen lwa gwen.