¹ Zep asa Apolos han a kirekam em enlala gwe-gwizimdin, “Zen an Alap hon de babu en zi dare,” hen ano nik mo syala, a kirekam em enlala gwe-gwibin, “Ola mensa Alap orep aning gul gweka, zen in desa hwena angkam ol halada gweꞌara.”
² Bol-zaun tanganna abe nikip dena, zen syala insa de golsyalhen sremkam ol gwen hap– dekam de Bian Zen asa anakan aken hap, “Zen taiblizimdin tanganna.”
³ Zep em ahaksa aha zi de asa anakan kara ta gwenna, “Zeno syala dawemna,” ahaksa “Karekna,” zen abe hap bana hom. Aena hen home enaka anakan enlala gwe-gweblanan, “Ano syala dawemna,” ahaksa “Karekna.”
⁴ Ëre mo enaka de enlala gweblankam, ee ama Bian mo dwam gwibin sin syal gwe-gweꞌan. Hwena kirekam de ee enaka enlala gweblankam, dekon en bejen anakan asa dam tasin, “Bian mo nwenak ee eiwa dawemkame syal gwe-gweꞌan.” Zen diki Bian Zen sa ano syala ap klis gulblula.
⁵ Zen in zep, bahem na-en aha zisi gubirida gwen, “Zeno syala karekna,” ahaksa, “Zeno dawemna.” Zen diki Bian Zen de lwahal zankam sa kirekam klis gulzimdi. Karek-karekna mensa zini aning nul gwenan, desa sa golwet sozimdi. Hen men desa enhonak kalang ei gwibirin, zen dekam sa kitak Zen goltreizimdi. Men zeno mae mo syal zere mo nwenak sam gwesiꞌin, zeno mae mo bosena dekam sa hen mam gulzimdi.
⁶ Aya-wal oso-wal, ee ansa ale gulzim– Apolos han ere nikip dena, hwena zen em dikim abe nikip de en naka dam gulsun hup hom. Zen em dikim kitak anakan dam gulsun hup, “Kristen zini sap bejen Alap mo ol tatak nakon golsyalhen.” Zep bap nen ahakore en naka anakan boltere ta gwibin, “Zen dawem-dawemna,” hwena dekam ahakore nakae enbiridaꞌan, “Zen dawem-dawem tangan naka hom.”
⁷ Zen nara ki emsa gubiridaka? – em de teipsin zi mo kim aha zisi klis gul gwen hapye. San ki ebe mae hap ere mae mo syal en nakon Alap dawemna gol gwizimnira? – zep de kirekam ebola-bola gwe-gwen hapye. Zen syala kon hom. Zen Zen totoresa zere mo kwasang-kwasang nakon gol gwizimnira, zep bap nen nenaka anakan bolte-bolte ta gwibin, “Ëe ere mo dawem nakone gulink.”
⁸ Em ema bolte-boltekam etim gul gweꞌan, “Ëe mese tangan Alapsa hli-hli lasik. Asa ba hap de aha zi tawa tabin hip? Ëe an teipsin-teipsin nikake.” Em zebe asa enlala eibirida gwenan, “Ba hap de Paulus maesa etan salbiridan hap?” Hwena eiwa eme eteipsin-teipsin gweꞌanam, airis, sap dekam ee ere mo syal bose walya ban amaka hen eno mae mo ngirin klesnak eteipsiꞌin!
⁹ Hwena, eiwa, ano dam gulsunkum, Alap men Zen Yesus hup de olsa dikim gol halada gwen hap asa dam tasibirki, Zen emam-mam gwen hap hom asa gubiridaka. Hwena Zen otde tangannak de teinikirin hip asa gubiridaka. Ëe in zebe lowehe gwenan– san de bwinak de lowehen zi, tameran en hap de kalang gwibiridanna. Zep tingan asa nga-ngola ban kara da gwibirin– sap okamanak de wenya, hen Alap mo dam taha nakore zini.
¹⁰ Zep Kristus mo bose hap tingare zini man asa nenbirida gwenan, “Enlala joblo-topna hen sin-sinni.” Hwena em ema enaka bolte-bolte la gwibirin, “Ëe an enlala blala hen soson tanganna.” Em ema enaka kil li gwibirin, “Aha zi man asa blikip neisibirida gwenan,” hwena kirekam de lwankam, ki hwena asa ba hap lamang da gwibirin?
¹¹ Zep hendep angkam ee usak nabane lowehe gwenan– hen ho-hole naban. Hen ano mae mo pakeanna kalk-kalk tola. Asa man dangole gwibirin. Hendep zep angkam dawemkam de lowe henna banak dep?
¹² Ëe ere mae mo tahalhasa dikim sul sonen hap aene soson tokna dei kul guk gwenan. Asa kim lamang da gwibirin, ee hwena dekam Alapsa abe la gwenan– Zen de zebe mae hap dawemsa golzimdin hip. Zen kim asa karek da gwibirin, ee hwena ama eenlala gwe-gwenan, “Dikire zen en nesa karek da gwibik.”
¹³ Kim asa wakwak da gwibirin, ee hwena ol kwasang-kwasangkame ding ul gwizimnin. Zep aha zi mo asa de hlauludankam, ee san de okamana awe de ase nabare kire-kirena kiye– yal tan en hap dena. Kirekam zep hendep angkam serkam asa husus neibirida gweꞌan.
¹⁴ Ansae kirekam ep ale gulzimnin, zen emsa dikim saher tabin hip hom. Zen ama kim emsa enlala sobiridanan– san de ere mo walas tangansa de gubiridan makan.
¹⁵ An zebe emsa gubiridaꞌan: Emsa de oto gulsuk gwen hap de zini sap maka sepulu ribu enkam lowe heꞌan, hwena eno mae mo nonol bianna, ee an zen. Sap nonol eye Kristus hup de ol dawemkam emsa tawa ta gwibik. Em dekam zebe hendep Kristus hun eraha-en gwek. Zep em in kitak san de ano walas tangan.
¹⁶ Zen in zebe emsa gubiridaꞌan: Em diki asa em tana wei san zertron.
¹⁷ Zen in zebe Timotiussu ebon mae osan dep zer sonek. Zen in hen ano dang tininak de walas, hen Biansa de taibliblan tanganna. Zep ee men kirekame Kristussu tana wei san zertroꞌan, zen zen sa hwena emsa enlala sobirida gwera– men kirekame tingare jematnak tawa tabirida gwenanye.
¹⁸ Ebon mae onakon ahakon man ebola-bola gwek– anakan de eenlala gwenkam, “Paulus molya etan nesa amjanbirida zaka.”
¹⁹ Hwena Alap diki asa dwam gweblaꞌanka, ki asa emsa amjanbiridazal. Zen dekam asa bola-bola wenya insa anakan hlauludazal, “San ha zen mes eiwa asa nerapde gwer? – Alap mo Enho nakore sosonsa de gwirensinkimye, men kirekam zena egu gwenan. San ha zeno mae mo ol toran en ki yawal gwizimk?”
²⁰ Sap Alap mo irik ginnik de biti gwen wenya, nen diki Alap mo Enho nakore sosonkame lowehe gwenan. Ëk enkam de ol toran nakon home.
²¹ Zep en ki dam ulsuk: Ki san ee bi zik de walas zemka tangolebin makane emsa gweibiridazan? San ha kwasang nabare ol sin-sin nibane golhatazan?