Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb ui iné' nemuyuh atun, pad mada' baba' Allah luk inalum ineh, O kinanak-kinanakku, na ui makai bila' bala luk mekadang idi ileh luk medalem.
2 Ngaceku, ui pangeh nengerawé kudeng ini, laba' ui tudo arang muyuh, ui pian kelupan amung-amung luk baken, idi ngerawé ratnan Yésus Keristus sebuleng, idi meluun teh, ateNeh luun kayuh salib ineh.
3 Kareb ui iné' nemuyuh, ui melaya' idi megegker ku tot.
4 Idi balaku idi bada'ku baken dengan ileh lemulun, iamo' dengan bada' Roh idi lalud Allah luk miak ngeruid niat lemulun
5 pad anu muyuh baken ratnan ileh lemulun, iamo' ratnan lalud Allah.
6 Iamo' ui mada' ratnan ileh ineh kuan lun luk lutep bang Tuhan. Iamo' baken ileh tana' ini idi baken ileh lun luk ngimet tana' ini, luk miak talan.
7 Ileh luk badénku, ieh ineh ileh Allah luk inalum, luk inapung ratnan lemulun idi luk litep Allah kareb nateh tana' ini pinudut, mangun ku rayeh tau.
8 Idi seburur lun ngimet bang tana' ini pana' na nengiti ileh ineh. Kudeng ideh pangeh nengiti ineh, kali' rungen ideh na nenalib Tuhan luk rayeh ineh.
9 Iamo' maya' kudeng luk inayud, "Luk na sinier mateh, idi luk na pindenger lalid, luk na megala' bang niat lemulun, ieh ineh luk inau' Allah temina' kuan lemulun luk mawa Neneh."
10 Iamo' kuan tau Allah pangeh nengelio ineh dengan RohNeh, ngaceku Roh Allah ineh ngelio luk amung-amung, meluun teh terawé Allah luk medalem.
11 Idéké luk kali' niat lemulun? Roh luk bang niat lemulun ineh mo' luk kali'. Kudeng ineh teh na luk idi seburur pana' luk kali' niat Allah, iamo' Roh Allah mo'.
12 Na tau nengalap roh tana' ini. Tau pangeh nengalap Roh Allah, pad tau miak kali' amung-amung luk barén Allah kuan tau
13 Ngaceku ineh, kareb kai mada' bala luk matu ratnan Roh, na kai pebala maya' ileh lemulun, iamo' maya bada' Roh Allah.
14 Iamo' lemulun luk na inan Roh Allah na miak ngalap baré-baré luk ratnan Roh Allah ineh, ngaceku amung ineh mangun ku bacé kuanneh, idi na ieh miak ngiti ineh, kudeng na Roh Allah ngelio ineh.
15 Lemulun luk inan Roh Allah miak ngelio luk amung-amung, iamo' ieh sebuleng na miak uen lun ngesala'.
16 Maya' kudeng luk inayud, "Idéké luk kali' terawé Tuhan? Idéké miak mada' Neneh?" Iamo' tau ini inan terawé Keristus.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA