¹ Zep angkam, aya-wal oso-wal, ee ama emsa etan enlala sobiridaꞌan– Yesus hup de ol dawemna mensae orep ebe mae hap ayang gul gwizimkke. Em ema dawemkam ulink, in zebe angkam zewe en tatem ezauk gweꞌan.
² Em ol dawemna in dekone engaya gweꞌan, sap em ema dawemkam urensik gwenan. Hwena em de ol dawemna insa tapbla gunkum, ki menkam waba habe laiblibik.
³ Ol dawemna mensa nonol asa don gweblakke, ee hwena desae ebe mae hap ayang gul gwizimk. Bol-zaun tangan wenya zen anakan: Kristus Zen eiwa neno mae mo karek-karek hap tilki– men kirekam Alap mo olak zebe hap dena lwakke.
⁴ Desa man ner dwanuk, hwena yaklana dan-ahan ki zep etan tin nikon ngaya gweka– men kirekam zebe hap dena Alap mo olak lwakke.
⁵ Hwena ki zep Petrus hup Zenaka zertreblaka, hen etan dua-blaskam de dam tasibin zini in hap Zenaka zertreizimki.
⁶ Etan aha yaklakam Zenaka de taibliblan wenya kim beya enkam tagal gwekke, lima-ratus nukon man tamank, zewe zep zebe mae hap Zenaka zertreizimki. Zini in beya tangankam nama lowe heꞌan. Dan en mes juwek.
⁷ Hwena etan ki zep oso zem Yakobus hup Zenaka zertreblaka, hen ki zep tingare zere hon de ang ta gwen wenya kip Zenaka zertreizimki.
⁸ Aumwa tangan hap hwena abe hap zep Zenaka zertreblaka. Zep ee san de men kiye– walas de an zik mo unuk holokam gwenna, dakalkam de asa jaha gweblan makan. Sap ee lun tangane taibliblak.
⁹ Zep ee an zen– bose betek zi niye, tingare Kristus mo dam tasibin zi nikonye. Hwena ee home dakastiꞌin– kirenak de syal gwen hapye. Sap ee ama Alap mo hlil irin wenya orep karek ta gwibik.
¹⁰ Hwena Alap mo kwasang-kwasangna mes ki kirekam abe hap dena lwablak, zep asa hen dam tasiki– zewe de hen syal gwe-gwen hapye. Hen Zen waba hap hom asa kirekam kwasang gweblaka. Ahakore dam tasibin zini, ee ama kwei-kwik guludak– dan syal-syala ban de syal gwe-gwenkamye. Hwena ere mo sosonkam home ki kirekam syal gwe-gwenan. Hwena Alap mo kwasang-kwasangna in ano enhonak soson gwe-gwenan, in zep ano syala kirekam lwa gwenan.
¹¹ Zen in zep, sap ol dawemna insa de abon onakon esane gwenna, ahaksa Kristus mo aha dam tasibin zi nikon, zen apdenak taiblibin hip dena. Hwena bol-zaun tanganna, ee in kire enkame olzim halada gwenan. Hen em kire enkame laiblibik.
¹² Sap ee ebon mae osan Kristus de tin nikon ngaya gwen hap denakae kirekam ol halada gwek, zep em ba habe ahakon egu gweꞌan? – “Nen bejen etan tin nikon engaya gwen.”
¹³ Kirekam zen boton, sap Kristen zini nesa de etan tin nikon ngaya tabin sremkam, zeno dam gulsunnu, ki hen Alap hom Kristussu ngaya taka.
¹⁴ Hen Kristussu de ngaya tan sremkam, ki hwena ee waba habe ol dawemna insa ol halada gwenan, hen eno mae mo Kristussu de taibliblanna in waba tol hap.
¹⁵ Zep kirekam de lwankam, ki man dam gwesinin: Ëe Alap hap dena mese botonkam emsa tawa la gwibik. Sap ee anakane emsa tawa la gwibik, “Alap mes Kristussu tin nikon ngaya taka.” Hwena anakan de lwankam, “Zini bejen etan tin nikon engaya gwen,” ki hwena Alap hom Kristussu ngaya taka.
¹⁶ Sap nen de tin nikon engaya gwe srem gweꞌanam, zeno enlalana hen ki, “Kristus hom tin nikon ngaya gweka.”
¹⁷ Zep eiwa de Kristus tin nikon ngaya gwe srem gwenanam, ki em in botonsae laiblibik, hen eno mae mo karek-karekna nama hom Alap mo nwenak tap gweꞌan.
¹⁸ Zep hen Kristussu de taibliblannak men zen juwe gwek, zen hen molya ngatan zi mo langnak yaing gwek.
¹⁹ Zep neno mae mo Kristussu de taibliblan nakon de nen ngatan zi mo langnak yaing gwe srem gweꞌanam, ki aha zi eiwakam nesa nenbirida gwenan, “Kristen zini in eiwa joblo-top tanganna.”
²⁰ Hwena Kristus Zen eiwa tangan tin nikon ngaya gweka. Zen dekam nebe mae hap orasa kles tyasizimki– nen dikim hen juwen nakon etan lamkam engaya gwen hap. Zep neno mae mo teipsinni in nesa ngeirbiridaka– tin nikon de ngaya gwenkamye. Zen in zep nen hen kirekam esa zeno kim engaya gwer.
²¹ Sap Adam, zen aha-ere nik juwe gwen hap de orana nebe mae hap kles tyasizimki. Hen kirekam, Kristus Zen aha-ere nik nen de engaya gwen hap de orana nebe mae hap kles tyasizimki.
²² Sap zini nen kitak Adam han de zeraha-en gwen nakone juwe gwenan. Hen kirekam, tingan men zen Kristus hun neraha-en gweꞌak, zen zen sa engaya gwer.
²³ Hwena Alap mes ki yaklana dan-dan dam sosuku– dekam de tin nikon engaya gwen hap dena. Nonol yaklanak mes Kristus ngaya gwenkam ngeir guku. Hwena Zen de etan lwahal zankam, Zebon de ang ta gwen wenya nen hwena dekam esa engaya gwenkam ertrol.
²⁴ Zen zep Kristus angkam irik giꞌira, hendep ki sa zere mo tana iltikinnik zere mo jal zini kitak sisik gulin gwera. Zen sa tingare dowal-dowala yal gulne gwera– sap nglinak de teipsin-teipsin dowal-dowala, hen okamanak de wenya. Aumwa hap in desa de se tya inꞌinka, zeno bosena Juwen Zi Bak. Dekam hyanak zini etan molya juwe gwek. Zen dekam sa aumwa hap denak zaul– kim de irik gin hip dena etan Bian Alap hap golblaꞌanka, Zen dikim kitak irik gin hip.
²⁵ (15:24)
²⁶ (15:24)
²⁷ Sap Alap mo olak anakan ngatan zi mo lang nakore Zi Tangan hap dena lwak, “Alap mes kitak zeno tana iltikinnik sisik gul inki.” Zep zeno enlalana, Yesus de kitak irik gil gwen hap, diki aha-en: Alap Zenaka bejen irik tan. Sap Zen in Zen Yesus mo tana iltikinnik kitak sisik gul inki.
²⁸ Hwena Tane zem in Kristus, Zen kim kitak irik giꞌinka, Zen dekam sa Zenaka Alap mo tana iltikinnik se tya iri– dekam de anakan dam gwesin hip, “Angkam Alap Zen kitak tangan irik giꞌira.”
²⁹ Zep nen eiwa esa juwen nakon engaya gwer. Kirekam de lwan sremkam, ki ba hap Kristen zini ahakon eabe gwe-gweꞌan– iye swe zik mo bose hap de baptis tan hap, iye swe zem in dikim lamkam ngaya gwen hapye. Eiwa de anakan lwankam, “Juwen nakon molya etan engaya gwek,” ki zen ba hap ahakon kirekam egwe gweꞌan?
³⁰ Ëe Kristus hup de ol gol halada gwen wenya hen kirekam: Etan de engaya gwen sremkam, ki ee hen ba habe mwin-mwan enkam Kristus mo bose hap juwen hap de karekna oltowe gwenan?
³¹ Aya-wal oso-wal, ee Paulus, ee ama eiwa mwin-mwan enkam tin hip alp gwesik gwenan. Hwena em in zen ano isrip-sri gwibiridan wenyaye, sap em mese ano syala kon nere mae mo Bianna Kristus Yesussu laibliblak. Zep ee bejene emsa boton ta gwibin.
³² Hwena eiwa de tin nikon engaya gwen sremkam, ki ee waba habe gwe tihi jal-jal makare zi niban Efesusk awe goleilman gwek. Eiwa de engaya gwen sremkam, ki men kirekam eKristen gwen srem wenya egu gwenan, nen hen kirekam emaka lowehe gweꞌan. Sap zen man egu gwenan, “Nen sap esa derek-derek enkam lowehe gwer, sap kaꞌan esa juwer.”
³³ Hwena desan de ang tan hap home ki emsa gubiridal, sap em de karek-karek gol gwen zi niban hen boton tam zi niban esiri gwenkam, ema zebon mae osan ang tanank.
³⁴ Zep em insa orana li lablak, em etan lwanda halzan, hen karek gol gwensa em baes tan. Sap mes dam gwesik, em ahakon Alapsa de tame tan sremna. Zep em emaka esaher gweꞌan, sap ebon mae onakon ahakon man tim nul gweꞌan, “Zini bejen etan tin nikon engaya gwen.”
³⁵ Hwena ebon mae onakon ahana sa asa takensiblila, “Zen banakarekam sa tin nikon luk tal? – banakare tim niban?”
³⁶ Kirekam de takensin zini zen enlala joblo-topna. Gandum danna kama hulak de dre nwanun sremkam, zen bejen eini ten.
³⁷ Nen kim gandum dan maena eiyas il gwenan, zen tim niban home eiyas il gwenan, hwena dan en naka.
³⁸ Hwena Alap zep danna in hap timni zere mo dwam gwibin sin anakan gol gwizimnira: Gandum dan nakon zen hendep gandum tim hip sa jower. Mulkwan dan nakon hendep mulkwan tim hip sa jower. Zen kirekam sa hen Alap juwen nakon tim ese naban nesa luwen tabiri.
³⁹ Okamanak de ensasa nabare kire-kirena, men ki nen zini, otweranna, mawana, hen hogwena, neno mae mo sopna sren-srenna. Apdenak hom.
⁴⁰ Hen kirekam– nglinak de kire-kirena, hen okamana awe dena. Nglinak de kire-kirena, zeno mae mo nwe-awesna sren. Okamanak awe dena, zen hen sren.
⁴¹ Yakla nwe mo nwe-awesna sren. Ben mo hen sren, hen keis mo sren. Keisni hwena man kon hen etan esren-sren gwek.
⁴² Zen hen kirekam– tim niban de juwen nakon engaya gwen hap denaye: Dekam timni sren. Tinkim mensae batre gwen timni lo lasik gwibirin, zen san de otane dansa de ik ginni kiye. Hwena dekon kim sip gweꞌak, zen dekam batren srem tim hip sa jower.
⁴³ Timni mensae lo lasik gwibirin, zen ulop gwibin wenyaka hen soson srem wenyaka. Hwena etan kim de luk taꞌak, dekam timni in hwena nwe-awesna hen soson tanganna.
⁴⁴ Mensae lo lasik gwibirin, zen auhu-kamana an kore tim nika. Hwena timni men debane luk taꞌak, zen ngatan zi mo langnak dep dena. Zep neno mae mo auhu-kamanak de tim de lwankam, zen dekam de dam gulsun, “Ngatan zi mo langnak dep de timni hen ki.”
⁴⁵ Zen in zep Alap mo olak nonol zini Adam Bak hap dena anakarekam lwak, “Alap kim ensasana hop ta soneblaka, dekam zep ngaya gweka.” Zep nen Adam onakon zebe auhu-kamanak de engaya gwen hap de timni ulin gwenan. Hwena angkam Yesus hen Adam mo kim zep nwe-mase gweꞌara, sap zen Zebon onakon esa hendep de lowehen hap de timni ulin.
⁴⁶ Zep hen kirekam, ngatan zi mo langnak dep de timni bejen nonol jowen. Zen in zep auhu-kamanak dep de timni nonol jowe gwenan. Hwena lun zep ngatan zi mo langnak dep de timni jowe gwenan.
⁴⁷ Nonol zini Adamsa, zen kama nakon de yang tasinni. Hwena zewe de Adam makare Zini, Zen ngatan zi mo lang nakon de hata zanna.
⁴⁸ Men kirekam nonol kama nakon de yang tasin zini in mo timni lwablak, nen an hen angkam kire nike lowe heꞌan. Hwena ngatan zi mo langnak kime yaing gweꞌak, zen dekam esa Yesus mo tim makan eliweher.
⁴⁹ An kirekame angkam kama nakon de yang tasin zini in mo kim lowe heꞌan, lamkam hen kirekam esa ngatan zi mo lang nakore Zini in mo kim lowehe gwer.
⁵⁰ Zep aya-wal owo-wal, bol-zaun tanganna an zen: Kala bare timni an han ngatan zi mo langnak bejen nen yaing gwen– men zewe Alap kitak irik giꞌiraye. Hen batre gwen timni an han bejen nen batre gwen srem langnak yaing gwen.
⁵¹ Emki esane gwen. Mensa zini orep tame nul srem gwek, ee ama desa angkam ebe mae hap srip gulsuzimꞌin: Nen kitak molye juwek, hwena kitak esa eliweher.
⁵² Zen mumuk ennak sa ngli ang makan lwal– kime aumwa hap de sramin aukuna insa esane gweꞌakye. Dekam juwen wenya, zen sa ebatre gwen srem tim niban luk tal. Hen nama de engaya gwen wenya, nen dekam esa kirekam hen eliweher.
⁵³ Timni an debane juwe gwenan, zen tin srem tim hip sa eliweher. Hen batre gwen timni an, zen batren srem tim hip sa eliweher.
⁵⁴ Zep kirekam kim de lwaꞌak, juwe gwen tim de tin srem tim hip eliwe henkam, dekam Alap mo olak men kirekam lwak, kirekam sa hendep jower, “Nen eisrip-sri gwen, sap Alap mes juwen orana jek-jak taka.”
⁵⁵ “Nen angkam ba hap de tinsi airi gwibin hip? – sap tin hip de orana angkam hom.”
⁵⁶ Tin mo sosonna, zen neno mae mo karek-karek nakon hata gwenan. Hwena neno mae mo karek-karekna mae nakon mam gwesik gwenan: Musa mo titi tabin ola kon.
⁵⁷ Hwena nen Alapsa nen anakan gu gweblan, “Ema asa sam tabirki,” sap Zen mes Kristussu nebe mae hap zer sonezimki– Zen de juwen orana insa jek-jak tan hap, hen engaya gwen hap de orana insa de sal tazimdin hipye!
⁵⁸ Zen in zep, aya-wal oso-wal, zen zao en emki tatem ezaun. Hen Bian en hap de syalak emki lowehe gwen. Sap ena tawana: Mensa Bian hap de syala ol gwenan, zen waba hap hom. Syala in mo eini esa lamkam hla kul.