¹ Zen in zep, bol-zaun tanganna nen nenaka de dawemkam kwasang gwibirida gwen hap ealp gwe-gwen. Deban Alap mo Enho de ebe mae hap sosonsa golzimdin hip em dawemkam edwam gwe-gwen– nonol tangan, dekam de Alap mo Enho mo sosonkam hamal hap de olsa ayang gul gwizimdin hip.
² Sap ebe hap de owas olsa de ton gwen hap denaka golblankam, dekam hwena ahasa home kim tonbirida gweꞌara. Dekam Alap ensae kim ton gweblaꞌara. Aha zi molya eno ola insa tame nul gwek, sap em owas ola inkam olk san denakae ton gweꞌara– Alap mo Enho mo sosonkam.
³ Hwena ebe hap de Alap mo Enho hamal hap de olsa dikim ayang gul gwizimdin hip de sosonsa golblankam, dekam zisi esa kim tatete ta gwibiri hen titi ta gwibiri, hen isrip-sri enlalasa esa kim ing ta sone gwizimdi.
⁴ Owas olkam men zen don gwibirin, zen zena en naka kim tatete da gwibirin. Hwena Alap mo Enho nakore hamal hap de ola men zen ayang nul gwizimnin, zen tingare Kristen zisi kim tatete da gwibirin.
⁵ Ëe sap ama emsa dwam gwibiridaꞌan– em de kitak owas olkam ton gwibin hip. Hwena dawem tangan wenya, diki Alap mo Enho nakore hamal hap de olsa em ayang gul gwizimdin. Sap kire hap de sosonna, jematsa dikim tatete tabin hip, zeno dawemna man taman kiniꞌan– owas olsa de ton gwen hap de soson nakonye. Hwena diki owas olsa de li yul sone gwizimdin hip dinik de ebon mae gwenkam bap. Ki airis. Dekam emaka jematnak de zini tatete la gwibiꞌin.
⁶ Zen in zep, aya-wal oso-wal, ee de owas ol en naban ebon mae onak golhata zankam, em dekam waba hap esa esane gwer. Diki Alap mo Enho nakore olsa de golhata zankam– em dikim Alapsa dawemkam tame tan hap denaka, ahaksa ebe mae hap de hamal hap de olsa ayang gulzimdin hip denaka, ahaksa Alap mo Enho nakon de ba maesa tame gun hup denaka, dekam em esa etatete gwer.
⁷ Zep owas ol enkam de tonbirida gwenna, zen men kiye– ensasa srem kire-kirena, men ki sulingni ahaksa gitara. Tawa srem nik de gublunkam ahaksa juzimdinkim, aha zi bejen anakan tame gun, “Terya desa kim taꞌara.”
⁸ Ahana hen men kiye– sraminsi de totoresa gubinni. Dekam bejen anakan tame gun, “An eijan hap dikim etamal gwen hap nenbirin.”
⁹ Zep hen kirekam– owas ol en naban de golhatankam: Dekam aha zi bejen dam gulsun. Eno ola in zalta dep sa lwal.
¹⁰ Okamanak awe, men-kore men-kore ola beyana, hen men zen ola insa bi neibiridak, zen kitak enlala naban don gwibirin.
¹¹ Hwena ee de aha zi mo olsa tame gun sremkam, ee amaka enlala gweblaꞌan, “Zen ano kore walsya hom.” Zen hen kirekam maka asa enlala gweblaꞌara.
¹² Zep jematnak bahem aha zi mo tame gun sremna kim tonbirida gwen. Hwena em ema esam gwesiꞌin, sap em Alap onakore sosonsa de gulin gwen habe edwam gwe-gwenan. Hwena diki dawem tanganna, Kristen zisi dikim tatete tabin hip de sosonsa de gul irin hip em hen Alapsa abe ta gwen.
¹³ Zen in zep, zini men zen owas olkam don gwibiꞌin, zen dikire Alapsa anakan abe da gwek, “Abe hap Emki li yul sone gwizimdin hip de sosonsa mas gulblun.”
¹⁴ Sap aena kime owas olkam Alapsa abe ta gwenan, dekam ano enho enna man ang gwe-gwenda, hwena ano enlalana hom tame gul gwenda.
¹⁵ Zen in zebe anakan dam gulsuk: Ëe sap asa enho ennak Alapsa owas olkam abe ta gwer, hwena ano enlalana hen mahala sa hen nere mae mo olkam abe la gwera. Hen enho nakon ee asa owas olkam de terya ban Alapsa isrip-sri gwe-gweblal, hwena ano enlalana hen mahala sa hen nere mae mo olkam isrip-sri e gweblala– dekam de aha zisi tatete ta gwibin hipye.
¹⁶ Sap em de tagal gwennak owas ol enkam Alapsa isrip-sri gwe-gweblankam, ki hwena ahakore wenya molya tol tame nul gwek. Zen tame gun sremkam eno ol gu sonenna in hap banakan dep? – anakan de ding gun nuye, “In eiwa.”
¹⁷ Sap eno owas olkam de ol gu sonenna in Bian zere en hap airis. Hwena wal bose wal okip, zen zalta dep dena. Sap dekam de etatete gwen hap dena hom dekon nulin gwenan.
¹⁸ Ëe ama dawemsa Alap hap gol gweblanan, sap ee owas olkam de hen-henkam ton gwenkam ama kitak emsa kwei-kwik guk.
¹⁹ Hwena Kristen zi de tagal gwennak, dekam ee ama anakan enlala gwe-gwenan, “Diki dawemna zeno mae mo tame gun olkam anik tihis mae enkam tonbirida gwek– dekakim etatete gwek. Owas olkam de tonbiridankam, sap sa ol-gunnu beya gwer, hwena zen waba hap.”
²⁰ Zen in zep, aya-wal oso-wal, Kristen zisi dikim tatete ta gwibin hip dena insa ebe mae hap ale gulzim, desa walas bete-tek mo kim bahem enlala gwe-gwibin. Kareksa de gon hap de enlalana, desa eiwa walas betek mo kim de enlala gwibinni airis. Hwena Kristen zisi dikim tatete ta gwibin hip de enlala blala, zen diki zen zise gwen.
²¹ Men-kore men-kore olkam de tame gun sremkam esane gwe-gwen hap dena Alap mo olak man lwak, Israelk de zini kim anakan gubiridakake, “Bian man guku, ‘Ëe asa aha zi aususa gubiridal– zen de eijan hap yaing gwe-gwe zankam zere mae mo olkam de nol drak-drak zi ausuna an hap ano jal gwibiridan olsa ayang gul gwizimdin hip. Zen men-kore men-kore zi mo ek tihi nakon sa ano jal ola insa tame gun sremkam esane gwe-gwer, hwena dekam Asa de salblan hap nama sa baes ta gwer.’”
²² Zep ayatna an kon man dam gwesinin: Owas olkam de tonbiridan naka de tame gun sremkam esane gwe-gwenna, zen Alapsa de dawemkam taibliblan zi hip hom dakastiꞌin. Zen diki anakare zi hip sam gwesik gwizimꞌin– men zen zere mae mo olkam de esane gwe-gwenna eblalen gwek, hwena nama nol drak-drakna. Hwena Alap mo Enho nakon de hamal hap de olsa esane gwenna, zen Alapsa de taibliblan zi hip man tangan sam gwesik gwenan, sap zen desan de ang tan hap mes ehohle gwek. Hwena Alapsa de taibliblan srem wenya kip hom sam gwesik gwizimꞌin.
²³ Hwena aya-wal oso-wal, eno mae mo tagal gwennak de Kristen gwen srem zi ang taꞌanam, hwena em de zao kitak owas olkam tonbinkim, zen maka emsa kil dibiꞌin, “An man emamak gweꞌan.”
²⁴ Diki dawem tanganna em de zeno mae mo tame gun olkam Alap mo Enho nakore hamal hap de olsa ayang gulzimdinkim, dekam maka zere mae mo enhonak aha-en aha-enkam anakan neisbiꞌin, “Eiwa, ano karekna mamna.”
²⁵ Hen dekam anakarekam maka neisbiꞌin, “Ano karek-karekna mensae aning gul gwenan, zen mes nolwet sonan.” Zen dekam maka bokle kom son naban Alapsa anakare ola ban boltere daꞌan, “Eiwa, emsa an Alap Zen golelowehe gweꞌara!”
²⁶ Zep aya-wal oso-wal, ee a kirekame mo emsa dwam gwibiridaꞌanye: Tagal gwennak em a kirekam em egwe gwen: Ahakon tersya de da gwek. Ahakon Alap mo olsa de tawa da gwibik. Ahakon Alap mo Enho nakore ba maesa de tame gunsu de ayang nul gwizimk. Ahakon owas olkam de eton gwek. Hen ahakon zeno mae moka de li nul sone gwizimk. Hwena zen kitak Kristen zisi dikim tatete tabin hip em kirekam syal ta gwen.
²⁷ Ebon mae onakon de owas olkam etoran hap edwam gwenna, beya tangankam bap zen. Diki dan, ahaksa dan-ahan man sam gwesiꞌin. Zen diki eissik-eissikkim zen etoran. Ahakon hen zen ehohle gwen– zen de zeno mae mo owas ola insa etan srip gulsuzimdin hip.
²⁸ Owas ola insa de srip gulsuzimdin hip de soson nabare zi de zewe gwen sremnak, dekam owas ola bare wenya in bap zen owas olkam eton gwen. Kirekam de lwankam, enlala ennak em Alap en han owas ola inkam zertoran.
²⁹ Hen kirekam, Alap mo Enho nakore olsa de ayang gulzimdin hip dena, zen hen dan ahaksa dan-ahan zen eton gwen. Hwena ahakorena, zen zeno mae mo ola insa de klis gun hup zen dawemkam esane gwe-gwen– anakare hap, “San ha zeno mae mo ola eiwa Alap mo Enho nakorena?”
³⁰ Hwena men zen dekam ayang gulzimdinni– zen de nama torannak de Alap mo Enho nakore ol teinikirin wenyak hatankam, dekam toran zini in zen golzausun. In zebon hatanna, zen dekakim hwena desa ayang gulzimki.
³¹ Kirekam de egwe gwenkam, dekam sap esa kitak Alap onakore ola eissik-eissikkim ayang ul gwizim– ekakim kitak etawa gwek hen etatete gwek.
³² Sap olsa de ayang gulzimdin hip de sosonna mensa zi hip ing ta sone gwizimnira, zen zini in mo sosonsa bejen kwei yul sone kinin– dekam dikim nabakam totoresa tonhan hapye. Hwena zini in sa anakan dam gulsulu, “Angkam anik ayang gulzimk,” ahaksa, “Anik eissik.”
³³ Sap Alap hom nesa dwam gwibiridaꞌara– nen de tagal gwennak totoresa men-man men-mankam nenaka tawa ta gwibin hipye. Sap Alap Zena hom men-man men-mankam ba maesa syal gwe-gwibirida. Hwena Alap aha-ere enlalakam gwe gwenda. Zep Zen man nesa hen kirekam de egwe gwen hap dwam gwibirida gwenda. Men kirekam tingare jemat-jematnak egwe gwenan,
³⁴ we walya zen tagal gwennak balk enkam zen ze lowehen. Desa bejen gubiridan– zen de etoran hapye. Zen diki zi wal zemka zen blikip gwesibiridan– men kirekam Alap mo epba olak lwakke.
³⁵ We wal de banakare maesa etawa gwen hap edwam gwenna, zen diki zi wal zemka zen golak takensibirida gwen. Hwena zen de tagal gwennak etorankam, zen hwena saherak kim zenaka kang nul gwenan.
³⁶ Ano ola insa de husus gwibin wenya, ee ama emsa gubiridaꞌan: Em bahem ekil gin, “Alap mo ola, ausuna abon mae en onak lwaꞌan.” Hen bahem etim gun, “Alap mo ola, ee ene dawemkam tame uk.”
³⁷ Ebon mae onak de Alap mo Enho naban de zergwen zi gwenkam, ahaksa sap hamal hap de olsa de ayang gul gwizimdin hip de zi, zen sa emsa anakan gubiridala, “Paulus insa nebe mae hap ale gul sonezimki, zen eiwa Bian onakorena.”
³⁸ Hwena ahanik de anakan gunkum, “Paulus insa ep ale gul sonezimki, zen boton,” zep em bahem desa hen sal gweblan, hen bahem anakan kil tin, “Zen an Alap mo Enho naban zergweꞌara.”
³⁹ Zen in zep, aya-wal oso-wal, emki dawemkam ealp gwe-gwen– Alap mo Enho nakore olsa de ayang gul gwizimdin hip. Hwena owas olkam de etoran hap bahem jalse gwibirida gwen.
⁴⁰ Hwena kitak sam-sam enkam emki syal gwe-gwibin. Men-man men-mankam bahem.