Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi ma Jo'oungu ma Dutu 'awi kawasa 'o Korintus ma kotaka! Ngini ma Jo'oungu ma Dutu wini'asokokau ma ngale niodadi to 'una 'awi kawasa, sababu ngini nimarimoiokau de ma Kristus Yesus de 'o sagala nyawa kiaka naga bato gee wisuba-suba ma Jou Yesus Kristus, 'una ge'ena to 'ona de mita to ngone nanga Jou. Ngoi 'o Paulus de nanga 'esa moi 'o Sostenes, mioga-ga'asoko tanu ma Jo'oungu ma Dutu de ma Jou Yesus Kristus nikula 'o co-catu de 'o sanangi. Ngoi ma Kristus Yesus 'awi su-suloko totulisi 'o surati ne'ena. Ngoi ma Jo'oungu ma Dutu ma sirete woigoraka todadi 'o su-suloko moteke to 'una 'awi mau.

² (1:1)

³ (1:1)

⁴ Ngoi kaitaurika to'amalaha ma Jo'oungu ma Dutuka ma ngale ngini, sababu ngini niamakekau 'o co-catu ma Jo'oungu ma Dutuno ma ngekomo ma Kristus Yesus.

⁵ Sababu ngini nimarimoiokau de ma Kristus, ma ngale ge'ena naga 'o sagala moi-moioka ma Jo'oungu ma Dutu winikulakau 'okia sonaa yaowa-owa posironga 'o gudai. Ge'ena dau ma dodaka ngini niosikanako ma sala ma ngale ma Jo'oungu ma Dutu 'awi mau, de niobarija niodotoko 'o sagala moi-moi gee nianako-nako.

⁶ Ge'ena 'isidumutu 'ato 'o habari ma ngale ma Kristus gee ma gou-goungu 'ania singinaka yawosangokau,

⁷ la 'o co-catu ka 'o ngai moi ma 'uwa 'ikurangi ma 'orasi ngini winida-damaa nanga Jou Yesus Kristus woboali de 'o nyawa 'iodumu wimake.

⁸ Ma Kristus ma sirete 'asa winiriwo la nia ngo-ngaku 'ikua-kuata sigado ma do-dogumika, la gee ma 'orasi 'una woboali 'ena to ngini nia sowono koi'iwa.

⁹ 'Okia naga ma Jo'oungu ma Dutu wojajiokau ge'ena ma raiokau wadiai. 'Unau ge'ena wini'asokokau ma ngale nimarimoi de 'awi Ngowaka, ge'ena la ma Yesus Kristus to ngone nanga Jou.

¹⁰ 'Esa moi riaka dodoto ka 'o ngo-ngaku moi, de ma Yesus Kristus to ngone nanga Jou 'awi ronga, ngoi toga'asoko tanu ngini nioodumu nimakadomoteke la 'uwa 'idadi 'o kadi-dingaka naga nginioka. Tanu ngini nimarimoi ka 'o singina moi de nia di-dibangi ka moi.

¹¹ Sababu 'o ngo Kloe 'ami woa ma dodaku yosidemo ngoino 'ato nginioka naga nimakaributuku.

¹² 'Ai dumutu ge'ena la nginioka naga munuka yongose 'ato, "Ngoi 'o Paulus towimoteke," munuka yongose 'ato, "Ngoi 'o Apolos towimoteke," de munukali yongose 'ato, "Ngoi 'o Petrus towimoteke," 'asa de munukasi yongose 'ato, "Ngoi ma Kristus towimoteke."

¹³ Ma Kristus ge'ena koidadiwa wipula-pula! Ko ngoi 'o Paulusuwa 'iso-songene 'isidele 'o gotade ma ngale tiniriwo ngini. De ngini ma ni'osiki ko de to ngoiwa 'ai ronga de ko ma ngalewa 'ato ngini to ngoi 'ai do-domoteke!

¹⁴ To'amalaha sababu nginioka komoiwa tini'osiki, duga ka 'o Krispus de 'o Gayus,

¹⁵ 'uwa sigado naga 'o nyawa yongose 'ato ngoi tini'osikokau la niodadi to ngoi 'ai do-domoteke.

¹⁶ Ee 'igoungu, 'o Stefanus de 'awi woa ma dodaku ge'ena ngoi taki'osiki. Ma 'iregu de go'ona ngoi toma-maoku komoiwau ngoi taki'osiki.

¹⁷ Ngoi ma Kristus woisuloko ko 'o nyawawa taki'osiki, ma 'ena tosihabari 'o Habari ma Owa ma Jo'oungu ma Dutuno, de ge'ena mita salingou tadiai ko de 'o nyawawa ma barija tosibicara, la ma Kristus wosongene 'o salipoka ma kuasa 'uwa kaiparacuma sababu kayasahewa.

¹⁸ Sababu 'o nyawa gee dua 'asa yobinasa, 'ona yongose 'ato 'o habari ma ngale ma Kristus wosongene 'o salipoka ge'ena ka 'o ngeluku. Ma ngone gee ma Jo'oungu ma Dutu wonasilahakau, panakokau 'ato 'o habari ge'ena ma ngale ma Jo'oungu ma Dutu wosidumutu 'awi kuasa 'iamoko ma sala.

¹⁹ Sababu naga 'o Buku 'Itebi-tebinoka 'isilefoku ma Jo'oungu ma Dutu wongose 'ato, "'O nyawa gee yoca-cawaro manga barija 'asa tadiai ma faedaa koi'iwa, de 'o nyawa manga singina 'iriko-rikoto 'asa taisangoka."

²⁰ Aa! Ma faedaa koi'iwa 'o nyawa gee yoba-barija go'ona, de ma faedaa koi'iwa gee yodoto-dotoko 'o besesongo 'o Musa wositota-totara moteke ka to 'ona manga di-dibangi. Mita ma faedaa koi'iwa 'o nyawa gee yoba-barija yomatiba-tibangi ka de 'o dunia ma nyawa manga di-dibangi. Ma Jo'oungu ma Dutu wosidumutokau 'ato 'o dunia ne'ena ma barija ge'ena ka 'o ngeluku.

²¹ Sababu ngaro kokia naga bato 'o nyawa manga barija, 'ona koya'akunuwa winako ma Jo'oungu ma Dutu ka de to 'ona ma sirete manga barija. Ma ngano ma Jo'oungu ma Dutu wobarija so wakisilaha 'o nyawa gee yongaku-ngaku 'unaka ma ngekomo 'o habari gee ngomi miositota-totara, gee 'o dunia ma nyawa yamaoku ka 'o ngeluku.

²² 'O Yahudioka yoga'asoko 'o no-nako 'ihera-herangi ma ngale 'isinyata 'ato ma Jo'oungu ma Dutu naga womanarama, de ko 'o Yahudiokawa yosilamo-lamo yanonu 'o barija.

²³ Ma ngone ne'ena duga kaposihabari ma Kristus wosongene 'o salipoka. Ma habari ge'enau 'o Yahudioka yomadegese ma ngale. De ko 'o Yahudiokawa 'ona yamaoku ge'ena ka 'o ngeluku.

²⁴ Ma 'o nyawa gee ma Jo'oungu ma Dutu waki'asokokau, 'o Yahudioka bolo ko 'o Yahudiokawa, 'o Habari ma Owa ma ngale ma Kristus ge'ena 'isidumutu ma Jo'oungu ma Dutu 'awi kuasa de 'awi barija.

²⁵ Sababu ma Jo'oungu ma Dutu 'awi manarama gee 'o nyawa yamaoku ka 'o haga-haga, ge'enau 'ifoloi 'ibarija de 'o nyawa manga barija. De ma Jo'oungu ma Dutu 'awi manarama gee 'o nyawa yamakeka koikuatuwa, ge'enau 'ifoloi 'ikuata de 'o nyawa ma guata.

²⁶ 'Esa moi riaka dodoto, bika niongano-nganono kokia 'ania jako ma 'orasi ma Jo'oungu ma Dutu wini'asoko. Moteke 'o nyawa ma di-dibangi, koyamuruokawa nginioka naga gee yoba-barija, bolo yopa-pareta, bolo 'o nyawa yola-laagomo.

²⁷ 'O nyawa gee 'o duniaka ne'ena yakimakeka yohaga-haga, go'onau ma Jo'oungu ma Dutu wakiiriki la 'o nyawa yoba-barija moteke 'o dunia ma di-dibangi yakimaeke. De 'o nyawa gee moteke 'o dunia ma di-dibangi yakimakeka koyokuatuwa, 'onau ma Jo'oungu ma Dutu wakiiriki la 'o nyawa gee yokua-kuata de yomo-moroini yakimaeke.

²⁸ Ma Jo'oungu ma Dutu wairiki 'o nyawa gee 'o duniaka ne'ena yamaoku kokiawa yakidaenuku, yotingoono, de manga faedaa koi'iwa, la ma Jo'oungu ma Dutu watorou gee 'o nyawa 'o duniaka yamaoku 'iparaluu ma sala.

²⁹ Koge'ena la ka moi ma 'uwa yomaie ma Jo'oungu ma Dutu wi bionoka.

³⁰ Ma Jo'oungu ma Dutuou ma sirete wodiai so ngini nimarimoi de ma Kristus Yesus. Ma ngekomo ma Kristus, ngone 'idadi pobarija, de ma ngekomo 'unali mita, ma Jo'oungu ma Dutu wodiai ngone pomarimoioli de de 'una, wonadiai ngone ka to 'una ma sirete 'awi 'umati, de wonasipidilokau 'o sowonoka.

³¹ So 'isoka gee 'isitulisuku 'o Buku 'Itebi-tebinoka, "'O nyawa gee yomau manga singina 'imore-morene, salingou yomorene sababu 'okia naga gee ma Kristus wodi-diai."

1 Korintus

Video 1 Korintus 1

Ikuti Kami:

KONTAK | PARTISIPASI | DONASI