Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Surat enda rehna i bas aku nari, Paulus si nggo ipilih Dibata rikutken sura-SuraNa, jadi rasul Kristus Jesus, bage pe i bas seninanta Sostenes nari.
2 Surat enda man perpulungen ni Dibata i Korinti, eme man kerina kalak si ipilih ras ikhususken Dibata jadi SikerajangenNa i bas persadan ras Kristus Jesus. Surat enda pe man kerina kalak subuk i japa pe ia ringan, si ertoto i bas gelar Tuhanta Jesus Kristus, eme Tuhanna dingen Tuhanta.
3 Dibata Bapanta ras Tuhanta Jesus Kristuslah mereken lias ate ras kemalemen ate man bandu.
4 La erngadi-ngadi kukataken bujur man Dibatangku kerna kam, erdandanken lias ate si nggo IberekenNa man bandu arah Kristus Jesus.
5 Sabap i bas persadanndu ras Kristus, kam nggo ipebayak i bas kai pe, i bas pengeranandu bage pe i bas pemetehndu.
6 Berita kerna Jesus Kristus nggo enteguh i tengah-tengahndu.
7 Seh maka i bas kam nimai Tuhanta Jesus Kristus encidahken DiriNa, la kam kurang kai pe kerna pemere-PemereNa.
8 Janah Kristus pe ngepkep kam seh ku kedungenna, gelah sanga Ia reh pagi ngadili doni enda IdapetiNa kam la ersalah.
9 Dibata e terteki kal. Ia kap si ndilo kam ku bas persadan ras AnakNa Jesus Kristus Tuhanta.
10 O senina-senina, kupindo man bandu i bas gelar Tuhanta Jesus Kristus: ersadalah katandu kerina, gelah ula sempat jadi perpecahen i tengah-tengahndu. Ersadalah ukurndu janah ersadalah sura-surandu.
11 Sabap piga-piga kalak i bas jabu Klue nari ngatakenca man bangku maka i tengah-tengahndu lit turah perjengilen.
12 Maksudku eme: maka sekalak-sekalak kam nggo erpihak-pihak. Lit si ngatakenca, "Aku arah Paulus," lit ka si ngatakenca, "Aku arah Apolos," deba nina, "Aku arah Petrus," janah lit pe si ngatakenca, "Aku arah Kristus."
13 Ibagi-bagiken kin Kristus man bandu? Paulus kin si mate i kayu persilang man gunandu? I bas gelar Paulus kin kam iperidiken?
14 Kukataken bujur man Dibata sabap sekalak pe kam la aku mperidikenca, seakatan Krispus ras Gayus.
15 Dage sekalak pe kam la banci ngatakenca maka kam nai iperidiken gelah jadi ajar-ajarku.
16 Lupa aku! Istepanus ras isi jabuna pe nai aku nge kepe mperidikenca; tapi lain si e la lit kuinget kalak si deban si kuperidiken.
17 Aku isuruh Kristus labo guna mperidiken, tapi guna meritaken Berita Si Mehuli, janah e pe labo erkiteken kinibeluhen manusia ngerana, gelah ula lasam kematen Kristus i kayu persilang.
18 Sabap berita kerna kematen Kristus i kayu persilang jadi kebodohen man kalak si nuju ku kebenen, tapi man banta si nuju ku keselamaten, berita e me gegeh Dibata.
19 Sabap nina Dibata bagi tersurat i bas Pustaka Si Badia, "Kukernepken me kepentaren kalak si pentar, janah Kusia-siaken me kinibeluhen kalak si beluh."
20 Dage, kai ertina kalak pentar, kalak si erpemeteh, ras tukang njabapi jaman enda adi nggo ijadiken Dibata kepentaren doni enda jadi kebodohen?
21 Sabap doni enda la ngasup nandai Dibata alu kepentarenna, emaka kepentaren Dibata nggo netapken guna nelamatken kalak si tek kerna berita si iakap doni enda eme kebodohen.
22 Kalak Jahudi mindo tanda sengget jadi bukti, janah kalak Junani ndarami kepentaren.
23 Tapi si iberitaken kami eme Kristus si ipakuken i kayu persilang. Berita enda erbahanca megelut kalak Jahudi janah kebodohen iakap kalak si deban si labo kalak Jahudi.
24 Tapi man kalak si nggo ipilih Dibata, subuk kalak Jahudi bage pe kalak Junani, Kristus e kap gegeh Dibata ras kepentaren Dibata.
25 Sabap kai si tempa-tempa kebodohen Dibata, si tuhuna pentaren asangken kepentaren manusia, janah kai si tempa-tempa kinilangasupen Dibata, si tuhuna gegehen asangken gegeh manusia.
26 O senina-senina, ingetlah kuga nai kam asum ipilih Dibata. La piga kam si pentar, ntah erkuasa, ntah pe kesusuren kalak si mehaga rikutken anggapen manusia.
27 Tapi guna pekitik kalak pentar, ipilih Dibata kalak bodoh rikutken anggapen doni enda; janah guna pekitik kalak si mbisa, ipilih Dibata kalak si la megegeh rikutken anggapen doni enda.
28 IpilihNa pe kalak si la meherga, si hina, dingen si la terpake iakap doni enda, guna engkernepken kai si ianggap doni enda penting.
29 Gelah ula ise pe meganjang ukurna i lebe-lebe Dibata.
30 Tapi kam nggo ipersadaken Dibata ras Kristus Jesus, janah nggo itetapken Dibata maka Kristus Jesus jadi kepentarenta. Erdandanken Kristus nge maka kita nggo rembak ras Dibata, khusus jadi SikerajangenNa, janah kita nggo ItebusiNa.
31 Emaka bagi lit tersurat i bas Pustaka Si Badia, "Kalak si ermegah ate, megahlah akapna kerna Tuhan."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA