Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dan indihirija, dan dog dau areg graga augwan dou yen, dauntoba yen yemaimo sesar mougwa hom touwero. Doba yen yeineg dau namcir. Doba sug sud hom dau yen en obsara aud sesarohob, kaba, Yesus Krisdus en edag gembala gesa taij naugb en ogod maman aremer augwan deseino en Mena. Anai en, kaba, en emedreg areg asesa Allah enin medoc mes mougwa hombuma. Doba en aimo augwan asesa namcirohob. Hang edeinyum naugb sug en ogod maman aremer augwan deseino Allah toua terimda.

² Anai sug Krisdus eic enin mogwihi bauwaharo dou Allah naugb maman sesar dag ginohob, kaba, edeinyum naugb sug Allah aigdougwo maman sesar augwan dau maman toua namcir. Dara en mogwihi gin, kaba, emedeinyum naugb sug Allah emaigdougwo mamanin maman sesar augwan dousero. Doba edeinyum naugb sug en aigdougwo lusud se cinogo augwan meren sesar augwan dau len toua.

³ Dangga hang, sug maman maimo Allah en mer an areg en arougb maman an gin terimda, kaba, gini ansins dag maman macinaga areg asesa Allah enin medoc mes augwan dag misen touohob.

⁴ Doba sud hom areg en eigdoumesa en moho dag en medoc dag hom dara Allah namcirohob, hanoba eni edreg dau en mer gin toua terimda, kaba, gini aninim dag en ereiyara. Anai gini ansins dag areg misen hom emeb se enin medoc mes touebma. Doba en medoc dag mes mogud dous.

⁵ Doba sud hom gareg en aimo Allah en mer augwan gin terimda, kaba, gini ens ainyes dag en medoc gororougb Allah dara en medoc augwan dag misenohob. Dangga gareg en eigdoumesa enin moho dag en medoc dag hom dara Allah enohob, kaba, esloulougb medam naugb men geicara augwan aninim dag Yesus Krisdus men geicara gin toua namcir. Anai sug maman maicara dag gin, kaba, maman macinaga dag maman mamdoc dag hom dara Allah dag misen touohob.

⁶ (2:5)

⁷ Dan indagunerij, dara dan indamouwerij gedig dan indoc gororougb yen, areg Allah arougb yen an gin, kaba, dag mer menenauwero. Doba yen youman dau augwan gini aimougtut sug emen emesai en mer dou yen sug nosohob.

⁸ Dangga yen yemehig dau en mer gin touwero. Doba yen yaimo en mer augwan gini eb ainyes esesa terimda, aninim dag Krisdus aimo Allah en mer augwan eb ainyes sug nosa touohob. Anai sug yen yeicara dag gin, kaba, yen yedag mouf misen gowun lobeigbogo men goubesa ediyebeiya namcir. Hang areg dan dog dou yen gin, kaba, dag mer mohon touwero, doba dag mer menau naugb yenohob.

⁹ Doba sud hom gareg en eigdoumesa en moho dag en einesa mouf ginohob. Hanoba en medoc mog mog an en maguner dara en medamouwer se Krisdus terimda, kaba, en emeinesa mouf dag misen touebma. Doba en eigtou se lobeigbogo smougb mougb terimda iteitoginaba.

¹⁰ Anai gareg en medoc mog mog an en maguner dara en medamouwer, kaba, en edag sud hom gedig loba osun dougwo en maires namcirohob. Hang en emaimo areg se mouf touwero. Doba en eigtou se lobeigbogo naugb en eraga men ucina gin dous. Doba gareg en medoc gororougb en maguner dara medamouwer gin terimda, kaba, en emeigtou se lobeigbogo deitero. Doba en ec se mouf dag misenohob. Hang en emedag sogo maga naugb sug sud hom ingma emetohob en aud sesar touwero.

¹¹ (2:10)

¹² Dan indihirija, dan dog surad gin dou yen, anai Krisdus omom naugb meijen sesar. Hang Allah aigdougwo meijen sesar augwan ogdoc men geicara gin dau yenohob.

¹³ Yusud, dan dog surad gin dou yen, anai yen yecinaga areg asesa Sud Hom Geis Huhugb Sugraga en medoc mes augwan dag misen. Dara yugdeh, dan dog surad gin dou yen, anai yen yemaimo areg Sud Hom Mobgos Maha arautut yen aud gin toua deitero. Doba yen yaiyan en dau yen namcir touohob.

¹⁴ Dan indihirija, dan dog surad gin dou yen, anai yen yecinaga areg asesa maman Mamina Allah en medoc mes augwan dag misen. Dara yusud, dan dog surad gin dou yen, anai yen yecinaga areg asesa Sud Hom Geis Huhugb Sugraga en medoc mes augwan dag misen touohob. Dara yugdeh, dan dog surad gini dou yen, anai yen yemobsara aud Bilis touwero. Doba yen yes agadgeij dougwo en toua namcirohob. Hang Allah en mer emediyebeiya dau yen meigdoc mes touwero. Doba yen yebin en mer gini se yen meigdoc mes, dara yen yaiyan Sud Hom Mobgos Maha dau yen toua terimda.

¹⁵ Sug yen meigdoc dag hom dara Allah dag ginohob, kaba, yen meigdoc gororougb lusud gedig Bilis oiharaga len se cinogo gini. Dara yen meigdoc emetrij naugb yen yaimo len aud meren geicara gecgu gin touwero. Doba yen yasid yenin dau namcir. Anai areg lusud se cinogo gin len merdoc etrij icira, dara areg len lauweila toutou, dara areg len merdoc agas an, kaba, augwan gini emen dau maman Mamina Allah enero. Doba en dau lusud gedig Bilis oiharaga len se cinogo gin dous. Dangga gareg en medoc gororougb lusud gedig Bilis oiharaga len se cinogo gin, kaba, en medoc gororougb maman Mamina Allah touwero. Doba en edag Allah men moc dous.

¹⁶ (2:15)

¹⁷ Dara lusud gedig Bilis oiharaga len, dara areg len merdoc etrij icira se cinogo gin, kaba, augwan emeb terberba touwero. Doba cum, kaba, ediyebeiya namcir. Doba gareg en medoc edag beim naugb en aimo areg Allah arougb en an gin, kaba, en eis huhugb terimda.

¹⁸ Dan indihirija, lona naugb sug aremer augwan ouwedoc, kaba, ebeij deinyorohob. Anai emen emesulou yenohob dag sug Sud Hom Eic Geic Mos dougwo Krisdus en agunyen, kaba, lona augwan ouwedoc namcir toua. Doba iteitogin, kaba, maman maiya dau men lusud leinyana lagunya debin mamanohob naugb sug len leic merus dou Krisdus toua terimda. Dangga hang, maman macinaga dag Lona Gouwedoc gini ebeij deinyor namcir touohob.

¹⁹ Sug nosa, kaba, len toua leis Ari dara maman. Doba len merdoc aninim dara maman se aremer areg maman mamdoc ebdebin an ginero. Dangga hang, len lemeigtou desij maman touwero. Doba len lasid lenin dau maman namcir naugb len lemeis Ari dara maman toua deitero. Anai sug len merdoc dag hom dara maman se aremer areg maman mamdoc ebdebin an dag misenohob, kaba, len lemasid lenin dau maman touwero. Doba len leigtou desij maman terimda. Dobnaro. Len lasid lenin dau mamanohob. Hang len lens lenin ainyes dou maman dag len merdoc dag hom dara maman touwerohob. Doba len merdoc dag hom dara Sud Hom Eic Geic Mos dougwo Krisdus gin dous.

²⁰ Doba yen, kaba, Yesus Krisdus gedig en ecabeci namcir, kaba, en esa Mena Gogoufu se yen meigdoc mesohob. Hang yen meiju emedgom dougwo aremer hom gin touwero. Doba en eic mou ouforoho dou yen naugb yen yecinaga meijouhw augwan asesa dag misen dau gin touohob.

²¹ Dangga areg dan dog dou yen gin, kaba, dan demog dou yen dau sug yen yemecinaga areg se geica gin touebma. Doba dan dog surad gin dou yen dau sug yen yecinaga areg misen ginohob. Hang yen yecinaga areg dag gereiyara, kaba, hom emeb se geica gin touwero. Doba areg se misen mogud dous.

²² Dangga gareg en emos emadi Yesus deseino lusud dag en emouwaden dau bogo dag lusud misen naugb en eigdoc len dau sesar men gogom augwan ginero. Doba en aideido dougwo en namcir kaba, en emaimo areg se geica touwero. Doba en edag sud hom gereiyara namcirohob. Hang en emedag Allah mogwihi mogo en dag misen touwero. Doba en edag Sud Hom Eic Geic Mos dou Krisdus en mogwihi mogo en dous. Anai gareg en aideido dougwo Yesus en edag Allah Meisi misen, dara en aideido dougwo Allah en edag Yesus en Mena misen gin toua, kaba, en medoc dag hom dara Krisdus touwero, doba en edag men moc gin dous. Doba gareg en os badi Yesus en edag Allah Meisi misen deseino lusud, kaba, en medoc dag hom dara en Meisi gini dousero. Doba en medoc dag hom dara en Mena gin touohob.

²³ (2:22)

²⁴ Dangga areg yen youman dau emen sug emen emesai Mer Geigouhw eisaugb Krisdus dou yen dau aimougtutohob, kaba, yen meigdoc emobsara dau ginlo. Doba yen yebin en mer gini se yen meigdoc mes namcir. Anai sug yen yeicara dag gin, kaba, yen yemobsara dau en Meisi dara Mena lan touwero. Doba yen meigdoc dag hom dara lan terimda toua.

²⁵ Hang maireseb menau geb huhugb emediyebeiya dau maman touwero, doba eb naugb maman toua namcir. Anai gin, kaba, aimo dau areg Krisdus en os dou mamanohob.

²⁶ Dan dog areg graga augwan dou yen, anai ligbum gedig len leic meruwemougb esesa naugb len laugwohosa yen dau ucina misen gin, kaba, len lagunyen debin yenohob.

²⁷ Dobnaro. Yen, kaba, Krisdus esa Mena Gogoufu se yen meigdoc mesohob. Dangga hang, emedeinyum naugb sug sud hom ingma en emedidib aremeijouhw hom dou yen touwero. Doba Mena Gogoufu gin, kaba, en ens aremeijouhw augwan dou yenohob. Anai en, kaba, en emarges dau yen touwero. Doba en eigtou se yen meigdoc mes namcir. Dara areg en ens dou yen, kaba, dag en emereiyara mougwa hom dou yen touwero. Doba areg en ens gin, kaba, en ens augwan se geica dou yen dous. Hang yen yemohoiya Mena Gogoufu en mer an areg en ens dou yen gin touwero. Doba yen yaimo augwan gin terimda. Anai sug yen yeicara dag gin, kaba, yen yemobsara dau Krisdus touwero. Doba yen meigdoc dag hom dara en namcir.

²⁸ Dangga hang, dan indihirija, eigouhw naugb yen yemobsara dau Krisdusero. Doba yen meigdoc dag hom dara en terimda. Hanoba yen yemedreg dau areg Allah arougb yen an gin touwero. Doba yen yaimo areg asesa enin medoc mes gin dous. Aninim dag yen yecinaga dag Allah en Meisi gin, kaba, en emedreg areg asesa Allah enin medoc mes mougwa hom touwero. Doba en aimo en mer se aremer augwan toua namcirohob. Anai yen meigdoc eica dag gareg en aimo ucina gedag beim gin terimda, kaba, en dous eng edag Allah mogwihi mogo en dag misenohob. Sug yen yeicara dag gin, kaba, igdebes emeba maman dau en sug en ens enin ainyes gini touwero. Doba maman maic mamus naugb magasa eni se Lona Sug En Ecicugwen gin toua namcir.

²⁹ (2:28)

1 Yohanes

Video 1 Yohanes 2

Ikuti Kami:

KONTAK | PARTISIPASI | DONASI