Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ O anakku, si enda kusuratken man bandu gelah ula ibahanndu dosa. Tapi adi lit kalak si erbahan dosa, lit kap kelang-kelangta mindo man Dibata, e me Jesus Kristus si ndalanken si bujur.

² Ia nanggung ukumenta erkiteken dosa-dosanta man Dibata, gelah kita iperdameken ras Dibata, janah labo dosanta saja, tapi pe dosa-dosa kerina manusia.

³ Adi patuh kita ngikutken perentah Dibata tandana kita nandai Dibata.

⁴ Adi lit kalak ngatakenca maka itandaina Dibata, tapi la ikutkenna PerentahNa, perbual kap ia, janah Kata si tuhu-tuhu i bas Dibata nari la lit i bas ia.

⁵ Tapi ise si ngikutken Kata Dibata, ia me si ngkelengi Dibata alu sempurna. Alu enda si eteh maka kita nggo ersada ras Dibata.

⁶ Kalak si ngataken maka ia nggeluh ersada ras Dibata, ia arus nggeluh bagi Jesus Kristus.

⁷ O teman-temanku si kukelengi! Perentah si kusuratken man bandu enda labo perentah si mbaru, tapi perentah si ndekah nge si nggo ipeseh man bandu mula-mulana nari. Perentah si ndekah e me berita si nggo ialokenndu i bas Dibata nari.

⁸ Amin bage gia, pedah si kusuratken enda banci ikataken pedah si mbaru, erkiteken perentah e nggo ialoken i bas Jesus Kristus bage pe i bas kam. Sabap kegelapen nggo bene, janah terang si tuhu-tuhu nggo ersinalsal.

⁹ Kalak si ngataken maka ia nggeluh i bas terang, tapi nembeh atena seninana, situhuna ia i bas gelap denga nge seh paksa enda.

¹⁰ Kalak si ngkelengi seninana, i bas terang kap ia nggeluh, janah i bas ia la lit si erbahanca kalak si deban ndabuh ku bas dosa.

¹¹ Tapi kalak si nembeh atena seninana, i bas gelap kap ia. Ia erdalan i bas gelap janah la ietehna ku ja ia lawes, sabap la ia erpengidah ibahan gelap e.

¹² O anakku, kusuratken enda man bandu, sabap dosandu nggo ialemi Dibata erkiteken Kristus.

¹³ Kam orang tua, kusuratken enda man bandu, sabap itandaindu Ia si nggo lit ope denga kai pe lit. Man bandu kam si nguda denga, kusuratken enda sabap nggo italukenndu si jahat.

¹⁴ O anak-anak si kitik denga, kusuratken enda man bandu, sabap itandaindu Bapa. Kusuratken enda man bandu orang tua, sabap itandaindu Ia si nggo lit ope denga tembe doni enda. Kusuratken enda man bandu kam si nguda denga, sabap kam megegeh; Kata Dibata nggeluh i bas kam janah nggo italukenndu si Jahat.

¹⁵ Ula kelengi doni enda ntah pe kai si lit i bas doni enda. Sabap adi ikelengindu doni enda la ikelengindu Bapa.

¹⁶ Kerina si lit i doni enda, si mengga ate kalak perdosa -- e me kai si idahna janah ngena atena seh maka man bana atena, ras kai si lit i doni enda si erbahanca meganjang ukur kalak; si e sada pe labo reh i bas Bapa nari, tapi i doni nari.

¹⁷ Doni ras kerina isina masap kap pagi; tapi si ndalanken peraten Dibata nggeluh kap rasa lalap.

¹⁸ O, anak-anakku, wari pendungi nggo ndeher! Bagi nggo ikataken man bandu maka musuh-musuh Kristus reh me; bage me genduari nggo teridah melala musuh-musuh Kristus. Arah e sieteh maka wari pendungi e nggo ndeher.

¹⁹ Kalak enda si tuhuna labo i bas persadanta, e me sabapna maka itadingkenna kita. Sabap adi tuhu-tuhu kin ia i bas persadanta, labo kita itadingkenna. Tapi ia nadingken kita gelah tangkas maka sekalak pe ia labo i bas persadanta nari.

²⁰ Tapi Kristus nggo mereken Kesah Si Badia man bandu, gelah kerina kam meteh Kata si tuhu-tuhu i bas Dibata nari.

²¹ Dage kubahan surat enda man bandu, labo erdandanken la ietehndu ketuhu-tuhun e, tapi erdandanken ietehndu nge. Janah kam pe ietehndu maka i bas pengajaren si benar e, la terdat kata bual.

²² Dage, ise kin si perbual e? E me kalak si ngataken maka Jesus e labo Raja Penampat si ipadanken Dibata. Ia me musuh Kristus; itulakna Bapa ras Anak e.

²³ Sabap kalak si nulak Anak e, itulakna pe Bapa e. Janah kalak si ngaloken Anak e, ialokenna pe Bapa e.

²⁴ Dage, berita si nggo ibegindu tangtangna nari arus maka tetap ibunikenndu alu mehuli i bas ukurndu. Sabap adi berita e tetap iperdiatekenndu alu mehuli, kam tetap nggeluh ersada ras Anak bage pe ras Bapa e.

²⁵ Janah enda me si ipadanken Kristus man banta, e me kegeluhen si tuhu-tuhu si la erkeri-kerin.

²⁶ Si kusuratken man bandu enda e me kerna kalak si sangana ersura-sura mabai kam papak.

²⁷ Tapi man bandu nggo ibereken Kristus KesahNa. Kidekah KesahNa e lit i bas kam, la perlu kalak ngajari kam. Sabap iajari KesahNa e me kam kerna kai pe, janah kai si IajarkenNa tuhu kap, labo salah. Dage, ikutkenlah pengajaren Kesah e, janah tetaplah kam ersada i bas persadan ras Kristus.

²⁸ O, anak-anakku, tetaplah kam i bas persadan ras Kristus, gelah katawari pe Ia reh, tetap ukurta dingen la perlu kita cebuni i bas Ia nari erkiteken mela siakap i bas Wari KerehenNa.

²⁹ Nggo itehndu maka Kristus nggeluh rikutken si ngena ate Dibata. Sabap e arus ka itehndu maka kasa kalak si nggeluh rikutken si ngena ate Dibata, ia me anak Dibata.

1 Yohanes

Video 1 Yohanes 2

Ikuti Kami:

KONTAK | PARTISIPASI | DONASI