Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Manga anạ u sěmbaụ jamạat'u Mawu su Korintus! I kau seng nikuiangu Mawu Ruata e nakoạ umat'E ual᷊ingu i kau e kai tataghuaneng i Kristus Yesus, dingangu patikụ taumata baẹ su tampạ sude apam měmpạněmba Mawung kitẹ i Yesus Kristus e kai Mawun sire ringangu Mawung kitẹ l᷊ai. Iạ, i Paulus, dingangu anạ u sěmbaụ i kitẹ i Sostenes, mẹ̌lẹ̌harapẹ̌ karimạko Ruata i Amang i kitẹ dingangu Mawu Yesus Kristus mẹ̌gěllịu al᷊amatẹ̌ dingangu karal᷊unsemahẹ̌ si kamene. Iạ němohẹu suratẹ̌ ini kere sěngkatau rarolohang i Kristus Yesus, nihengkẹ u Ruata sẹ̌sane ringangu ual᷊ingu lai kapulun'E.
2 (1:1)
3 (1:1)
4 Iạ sěntiniạ makịtarimakasẹ su Mawu Ruata mạanung kamene, u i kamene seng nakatarimạ tatal᷊ěntụ bọu Ruata limiun Yesus Kristus.
5 Ual᷊ingu i kamene e seng nakoạ tataghuanengi Kristus, kụ pẹ̌bawiah'i kamene e kalạ su patikụ sabarang. Kasingkạ i kamene su hal᷊ẹ̌ u patikụ e mambem maral᷊ung-dal᷊ung, masene lai i kamene e mang pelesa maněntirong kasingkạ ene.
6 Ené e mělẹ̌lahẹu Injilẹ̌ mạanung Kristus e seng liměnạ su ral᷊ungu naung i kamene,
7 hakịbeng i kamene tawe kakawusangu al᷊amatẹ̌ saral᷊ain manga sěmbaụ, těntal᷊ang i kamene reng měmpạngampal᷊ẹ̌ Mawung kitẹ i Yesus Kristus duměnta ringangu ikasilom patikụ taumata e.
8 I Kristus sẹ̌sane sarung mapẹ̌biah'i kamene sol᷊ong pangěnsueěnge tadeạu su tempong i Sie ruměnta kạpia e ute i kamene kaẹ̌bakengbe tawẹ apa sal᷊ane.
9 Mawu Ruata e pạngimangengbe kahěngang. I Sie kai Ruata kụ seng nẹ̌kui si kamene makoạ sěmbaụ dingangu Ahuse, i Yesus Kristus, Mawung kitẹ.
10 Manga anạ u sěmbaụ! Dingangu arengu Mawung kitẹ i Yesus Kristus, iạ e mẹ̌dẹ̌dorong takadeạu i kamene mẹ̌sěngkanaung kěbị; tadeạu kumbahangbe piạ pẹ̌sasilontahẹ̌ sutal᷊oarang kamene. Karimạko i kamene masěmbaụ, sěngkanaung dingangu sěngkapẹ̌tiněnnạ.
11 Batụu manga anạ u sěmbaụ bọu wal᷊eng Klo"e mẹ̌běke si siạ u piạ pẹ̌bawul᷊o sutal᷊oarang kamene.
12 Hatede ute kai piạu wọi kamene mẹ̌bẹ̌bera, "Iạ tumol᷊e si Paulus," piạ lai měbẹ̌bera, "Iạ tumol᷊e si Apolos," i sire wal᷊ine nẹ̌bera u, "Iạ tumol᷊e si Petrus," arawe wal᷊inẹewe lai ute nẹ̌berạu, "Iạ tumol᷊e si Kristus."
13 Kụ unụewe i Kristus ipẹ̌kakakempang! I Paulus tawe nate nighantong baug'i kamene! I kamene mal᷊aing tawe nisahani waụgu makoạ murit'i Paulus arau ěng?
14 Tarimakasẹ iạ e tawe něnahani si kamene sarang sěngkatau, su l᷊ikud'i Krispus dẹ̌duang Gayus.
15 Kumbahangbe piạu sěngkatau makapẹ̌berau iạ seng bọu něnahani si sie makoạ tumatol᷊e si siạ.
16 (Ore těngadẹ̌, i Stefanus dingangu ral᷊ohom bal᷊ene, těngadẹ̌ kai iạ něnahani si sire. Ore lai su sěmbẹ̌kang ene e, su tahěndungku tangu semben tawẹ u wal᷊ine takụ nisahani.)
17 I Kristus něndolohu iạ e wal᷊inewe ipěnahani taumata, kaiso kawe ipělẹ̌habar'u Injilẹ̌ bọu Ruata; kụ ene harusẹ̌be koatengku wal᷊inewe ual᷊ingu, pande mahumbisara mạtaumata, tadeạu kawasam papateng Kristus su kalu piněnggantongang e tawe makoạ tạ kěhase.
18 Batụu si sai-saim mětẹ̌timona kawawinasa e, habaru kapapohong i Kristus su kalu piněnggantongang kai mạkoạ bẹ̌ke tạ kěhase. Arawe si kitẹ apang ipakạsal᷊amat'u Mawu e, habarẹ̌ ene e kawe kere kakakoạ u Mawu měnodẹ u kawasan'E,
19 u su Winohẹ Susi e, Mawu e něhengetang, "Kapapandem mapapande e sarung Takụ gagholangeng, dingangu katatahuěnnam masasingkạ e sarung Takụ i pakaparung."
20 Kụ apawue gunane taumata pande e? Apawe gunane i sire masasingkạ e tangu? Apawe gunane i sire tahapěnanẹ̌sui kasingkạ u dunia e? Mawu Ruata e seng niapakal᷊ahẹ u kapelesan dunia e mamben tạ l᷊ohone sěmatang.
21 U waẹbe kereapa kapanden taumata e, i sie tawe makakiral᷊a Mawu wọu kapandene sẹ̌sane. Kaiso ual᷊ingu Mawu Ruata e kai matahuěnna, tangu i Sie wotonge měngambang si sai-saing kụ mạngimang si Sie wọu habar'u Injilẹ̌ ilẹ̌habar'i kami e kụ kiral᷊ingkai tawẹ kěhase kahian dunia e.
22 Tau Yahudi e mẹ̌gẹ̌gausẹ̌ tanda makạl᷊aherang makoạ tialane, ringangu tau Yunani e mẹ̌gẹ̌gausẹ̌ kapelesan dunia ini.
23 Arawe i kitẹ e tangu kětạeng sěmatang mělẹ̌habar'i Kristus kụ seng napohong su kalu kuruisẹ̌. Habarẹ̌ ini e kai niměnggạ nakoạ katatanggaěng su tau Yahudi e, nikoạ kere habarẹ̌ niusẹ̌ kahian sire wal᷊ine tau Yahudi e. Ringangu i sire wal᷊ine tau Yahudi e mạngiral᷊ing ene e kai sěmbaụ katatungkọ.
24 Kai arawe si sai-sain seng nikuiangu Mawu Ruata e -- baewe tau Yahudi arau wal᷊ine Yahudi e -- habarẹ̌ ini e kai kere kakakoạ u Ruata měnẹ̌nodẹ u kawasan'E ringangu katatahuěnnan'E.
25 U kawawodoku Ruata e kai limembom pelesa wọu kapelesan taumata e; dingangu karal᷊omen Duata e, kai limembong katoghase wọu katatatoghasu taumata.
26 Manga anạ u sěmbaụ! Kěnang pẹ̌tahěndung kerea kakakoạ i kamene su tempọen Duata e nẹ̌kui si kamene. Kětạbeng kadodọ (mahal᷊i) sutal᷊oarang kamene e matatahuěnna e, arau kawasa, arau matatebone tumuhụ tingirangu taumata e.
27 U mamben pinẹ̌tatudẹ Duata e němile apang lẹ̌ěnnaěng bodokẹ̌ kahian dunia ini, tadeạu ipěnumea mapapande. Ringangu Mawu Ruata e mal᷊aing němile apang lẹ̌ěnnaěng lome kahian dunia ini, tadeạu apang matatuhasẹ̌ mal᷊ahasa e měngkamea.
28 Mawu Ruata e němile apang lẹ̌ěnnaěng masanạ, mahina, ringangu mundangu kẹ̌koateng tawẹ mangal᷊ene kahian dunia ini, tadeạu Ruata e mapakaghoghahu apang lẹ̌ěnnaěng kapiaěng e kahian dunia.
29 Ual᷊ingu ene ute tawẹ u sěngkatau makapěngobotu watangenge su těngom Mawu Ruata e.
30 Duata sẹ̌sane e seng napakariadim manga anạ u sěmbaụ e nasěmbaụ dingangi Kristus Yesus. Bọu anung Kristus, i kitẹ e niapakakoạ matahuěnna. Ringangu kai wọi Sie lai Ruata e napakariading kitẹ nẹ̌sěngkapiam batangeng i kitẹ e kapia ringangu Mawu, napakariading kitẹ e umate sahị (tutune) ringangu něngambang si kitẹ e.
31 Kụ kai kerẹewe kạbawohẹ su ral᷊ungu Winohẹ Susi u, "I saing kụ rụl᷊esạ e ute harusẹ̌be rụl᷊esạ u apang kinoạ u Mawu."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA